Hebrie 6

1Fuŋga ma oo nↄↄ hle mbe yo oo fa kewɛɛ, na jawala chinɛɛ, na Nyiɛkpↄↄ shↄnlie kee yo, la, ki fna mbe o sɛ yiɛ, mbe lopokee twan mbe ya yire kejle yire na. 2Ndrɛ jee, na imi pe kɛnyi taari shↄnlifɛɛnlɛ na mbe pe Kpra Ŋumu ta, na kunnyiɛ, na Nyiɛkpↄↄ kpra kuↄn kre, waa kro yire na na. 3E ti o sɛ yiɛ. Na Nyiɛkpↄↄ li ki na, ŋga oo pe yi, oo sɛ yiɛ. 4A kia jaa pan na mblɛ pe da mu Nyiɛkpↄↄ kee kre loo mu ndru mu laa ki kro kre, na pie ja mbe pe jawala chinɛ na. Ŋgi na? Pe da mu Nyiɛkpↄↄ kaniɛ kre nya. A kɛyirɛ nyjɛ yi yiri nyjeeri kre, pe da mu ka ta, mu da mu Kpra Ŋumu wre ta. 5A pe chin na Nyiɛkpↄↄ nyu kee kre tna, a pe da mu blenyini ŋmaa ŋga kie pan na kre jaŋga kee loo. 6Kena na pe je mu laa kee kre kro kre, kia jaa pan na pie pe jawala chinɛ na. Pan ki nyi Nyiɛkpↄↄ Pↄ wre pe kani kaan kre na na, mu tia nyifɛɛrɛ u gbo lete na. 7Nyiɛkpↄↄ u tra ŋga na nyiɛ paan mbe ki ki gbↄ kre dwan, mbe yirɛ nyjɛ pe luu ki na yire jaa nyu mbe yi luufun ŋga. 8La, na tra kre waa wuuro, na nyaa bribri fin kre, kena kia mbakↄ ka nyu, kena ki da mbe pe ki sun. Ki kↄlↄ yi na pie kanhun le ki na mbe ki sro. 9Wolo, na o paara e pan imi kre, o n na e jawa na sisaa ni, e ŋmaashↄmu kre ndra na o chin na e dwamu ta. 10A Nyiɛkpↄↄ rɛ, u fraka, ki tia tnumu ŋga e tun kre, wa ki fɛɛ, ndee imi na e e kooroo nyina Nyiɛkpↄↄ pan mu na e wolo Kristofɛɛnlɛ pre le kre, wa ki fɛɛ. 11Kee ŋga na o yiɛ nyina o na chaa yi na mbe e kro yiɛnyina e gbeŋmbaa kre ni ma mbe sɛ su waŋgra kↄ ble, mbe yirɛ nyjɛ na e kaan yire kro pe ma. 12O n na chaa mbe gbashia le wa nu, la, o chaa mbe e pe na mblɛ pra yire shↄnlie na frↄ na, mna Nyiɛkpↄↄ yira ŋga wra yo we pe ŋga kre ta kre lɛ. 13Ŋga Nyiɛkpↄↄ na u nyu yo Abraham pan fa kre, ŋga ndro nsraa wa mu da na u ni mbe u u da kre ndra na, wre Nyiɛkpↄↄ wre titi mɛɛ ni wra da mu u ŋga. 14Mna yo Abraham pan mbo, "Kpra na, mbe mu dwan, mbe ti mbe mu sele leele nɛɛ." 15Abraham na frↄ, ki tia wra Nyiɛkpↄↄ nyu ŋga wra yo u pan kre yira ta. 16Na lewo yo we da kre, lekpↄↄ ŋmba u wɛ u na u dani, daŋga rɛ, kre ki kakra tataara nyu kuun. 17Kena ŋga Nyiɛkpↄↄ naa chaa mbe mblɛ pie u nyu kee ŋga u yo kre ta kre chin na wa u kee kre chinɛ kre ndra na, wra uyɛ da mu ya kee kre na. 18Yire kee shiin nyjɛ, u nyu yoo, na u daŋga kre, yia jaa chinɛ, a Nyiɛkpↄↄ wa kↄ yi na mbe pe kafnu. Ki tia wre mblɛ o fɛ mu pan u shↄmu nu kre, o yire haa ta, mbe o kaanhaa ŋga kii wa o yiɛ kre yii chiriri. 19Oo wa na yirehaa gbiŋmbi ni, o shↄmu ŋga na o kaan kre na. O dankna kre le nyjeeri Cheche lawee titi kre nu. 20Bawa Yesu yila o na mu yiɛklu mu sɛ, mu sɛ pe sↄfu lopom titi Mɛlchisɛdɛk sↄfumlie kolo na.

will be added

X\