1 Kena ŋga Nyiɛkpↄↄ wuuhaa ŋga kee u yo mu tɛɛ kre wa tɛ kre, e ti mbe o u fiɛ, mbe wa kↄↄ wa gbun na pimi ni, mbe wa sɛ u wuuhaa wa. 2 Ŋgi na? O ketaan kre loo imi na pra ki loo kre, la, kee kre pra loo kre nsra pe tnu ni pe pan. Ŋga kra tia rɛ, pe nsra ki loo na shↄnlie ni. 3 La, wre mblɛ o shↄ mu li kre we le u wuuhaa wa, imi na u ki yo kre, mbo, "Ni krↄ na kun a ndaa da na, 'Pia le ni wuuhaa wa.' " La, Nyiɛkpↄↄ na u kee kro pe mu kↄ, nyjila ŋga ni wra waŋgra gbeele mu kↄ kre. 4 La, pe ki nyunↄ mu tɛɛ Nyiɛkpↄↄ hlɛ kre nu haka na, ŋga Nyiɛkpↄↄ na yirɛ kro gbeele ble kↄↄnanu mu kↄ kre, ki kↄↄnashin wo kre na wra wuu. 5 A kee nunu kre u yuu mna mbo, "Pia le ni wuuhaa kre nu." 6 A mblɛ pra klu mu ketaan kre loo kre nsra sɛ Nyiɛkpↄↄ wuuhaa kre nu, ŋga pra ndikana pe kre ndra na. A na plɛɛ wa mbe sɛ u wuu haa kre nu kre, 7 ki tia Nyiɛkpↄↄ nyjila ka wↄ mu tɛɛ, a kre yi aŋga. Yɛlɛ tataara na tro, a Nyiɛkpↄↄ na chin mu yire Devid na mu ki yo mbo, "Aŋga, na e Nyiɛkpↄↄ mana loo kre, yaa shia ndikana pe!" 8 Na Joshua na ja mna sɛ na leele pre ni Nyiɛkpↄↄ wuuhaa kre, kaa Nyiɛkpↄↄ wa na ble fↄŋgↄ ka le na. 9 Kre ndra na, wuublee wa Nyiɛkpↄↄ leele pan tɛ. 10 Kena ŋmba we le Nyiɛkpↄↄ wuuhaa kre, kena u tnumu ŋga u tun wuo shↄhaa u sɛ, imi na Nyiɛkpↄↄ na tnumu tun mu kↄ mna wuu kre. 11 Kena kolo kro na kre, e ti mbe o gbeŋmba na oo le Nyiɛkpↄↄ wuuhaa kre nu. Mbe o wa waa shia ndikana nunu kre ka pe mbaa ki kolo la. 12 Nyiɛkpↄↄ nyu kayooro kre, ŋmaa wa ki nu, a faŋgaa wa ki nu, mu tna mu wɛ brↄfiɛn yiɛ shiin na, kre ki kuun na lee lewo nu, mbe sɛ su na kie lewo lam yira kro chin, mu ja na lewo loloŋgo kee kro kpra kuun. 13 Yira ŋga wre Nyiɛkpↄↄ gbeele kre, ka n wa mbe jaa ndra u yiɛ, yi krɛrɛɛ wa u yiɛ wra yi le na nyiɛlɛ ni. Ki tia Nyiɛkpↄↄ yiɛ oo sɛ kee kro nyu wↄ. 14 Kena ŋga o Nyiɛkpↄↄ Pↄ Yesu wre ta o Sↄfu Lopom titi, a u sɛ tni mna Nyiɛkpↄↄ nyi ŋga, e ti mbe o shↄnlie ŋga o ta kre yii kɛshiin. 15 O Sↄfu lopom titi wre rɛ, u pe lewo ŋmba u o pↄlɛm chin. Nyu chaara ŋga nu o nyi kre, pra u nyu cha ma, la u nsra sisaa pe. 16 Kena e ti mbe o gbun ta mbe sɛ Nyiɛkpↄↄ dumiɛ ŋujↄↄn kre jaara, mbe u o fooro le, mbe o dumiɛ ta, na kee ka o shian mbe u ki pe mbe o ŋga.
