Hebrie 3

1Kena ni wolo shↄnlifɛɛnlɛ mblɛ Nyiɛkpↄↄ yeeri kre, e Yesu jawa, e u shↄ e li, wre Nyiɛkpↄↄ tun na u paan pe o Sↄfu lopom titi. 2A wra kpra kolo wru, mna li ŋmba wra u tun wre kee na, imi na Mbose na li kee kre na Nyiɛkpↄↄ katoo kre. 3Lewo ŋmba u katoo siin kre mɛɛ taa mu wɛ katoo kre titi na, kre ki tia a Yesu yɛnyiŋge wɛ Mbose na kre. 4La, katoo kro lewo u ki siin, a nde Nyiɛkpↄↄ u yirɛ kro gbeele. 5Mbose rɛ, wra kpra kolo wru, mna sumi Nyiɛkpↄↄ katoo wa na tnu wi, mna kee nyjɛ Nyiɛkpↄↄ naa paan mbe yo mbakↄ kre krɛrɛ kee yo. 6La, Kristo na kpra li Nyiɛkpↄↄ katoo na Nyiɛkpↄↄ Pↄ ŋmba u u katoo le wi, Nyiɛkpↄↄ wre katoo lɛ wre, na o ŋga na o kaan kre yii kɛshiin, na yɛshↄↄrↄ, na shↄnlie ni, wala. 7Kena imi na Kpra Ŋumu wre yo kre mbo, "Na e Nyiɛkpↄↄ mana loo aŋga kre, 8yaa shia ndikana pe, imi na ni leele na ni hla, mna ni penle nyjila ŋga ni praa wa fimi lawee yire nu kre. 9Imi na e tolɛɛlɛ na ni penle mna ni tnumu nya yɛlɛ fuloeshiin kre. 10Kre ndra na krↄ na ni kun na pre leele pre ni, a ndaa yo pe pan na pe fun ni na pe lolonyi nu kolo kro na, a pe n ni chin. 11Kra tia ni krↄ na kun, a ndaa da mna pe ŋga na pe wa wa sɛ ni wuuhaa kre nu." 12Ni wolo, kena e eyɛ le chichie, mbe wa waa shia jawala sisaa le, mbe u shↄnlie wa, mbe laa Nyiɛkpↄↄ ŋmba uu wa blenyini wre kro. 13Kena e na paara e na eyɛ gbeŋmba, mbe sisaa pee wa wa fana mbe u ndikana pe. 14A na o o shↄnlie jle kre yii kɛshiin mu sɛ su waŋgra kla ble kre, wre na Yesu we sɛ tni lawee nunu nu. 15La, imi na Nyiɛkpↄↄ kee kre pe nyunↄ mu tɛɛ kre yo kre mbo, "Na o waa u mana loo aŋga, waa shia ndikana pe, imi na pra pe mna u hla fa kre." 16A mblɛ haa pra u mana loo mna je mu u hla kre hin? Leele mblɛ ni Mbose na yiri Egypt na kre na lɛ. 17Leele mblɛ ni Nyiɛkpↄↄ na krↄ wru yɛlɛ fuloeshiin kre hin? Leele mblɛ pra sisam pe u na mna ku ku fimi lawee nu kre na maa? 18A mblɛ haa wra da mu ŋga na wa ti pe sɛ u wuu ndoo kre nu kre hin? Mblɛ pra ndikana pe u kee kre na kre na lɛ. 19Kena fuŋgaami ŋga o chin na pre leele mblɛ nsra le u wuuhaa wa, ŋga pe nsra u shↄ mu li kre ndra na.

will be added

X\