Hebrie 13

1E eyɛ kori na nyjↄↄlↄ na chinlɛ lɛ yire nyjila kro nu. 2E na fumblↄ yiri e na pe le chichie. Ŋgi na, kre kepele ŋga na plɛ na yire mna nyjeeri bitumblↄ le, a pe nsra chin na bitumblↄ lɛ. 3E na mblɛ pe le nyuŋgo kre sↄↄnri, e pe na yire na pre ee wa nyuŋgo wa. A mblɛ pe kala nyaa kre, e pe sↄↄnri, mbe pe kanyana pe e kanyana. 4Yaa leŋgeere le yira fiɛn, e ki ŋga buuro, mbe wa waa shia leŋgeere tↄ na nɛɛrɛ ni. Ŋgi na, tiɛrifɛɛnlɛ na mblɛ pe leŋgeere klai kre krɛrɛ Nyiɛkpↄↄ we pe ndie tini. 5Yaa ti swa nyibinyiɛ pan e tnimu nu, ŋga e ta kpan, e ti mbe kre e yiɛ nyi. Ŋgi na, Nyiɛkpↄↄ yo mbo, "Mba mu ti ma, a mba laa mu kro fio." 6Kena e ti mbe o gbun ta mbe yo na, "Ni Tafun wre wi ni yafun, ni n na fiɛ ŋgi lewo na nyjuro we jaa ni pe hin?" 7E e loplombo mblɛ pra Nyiɛkpↄↄ ketaan kre yo e pan kre jawa, e pe tnimu ŋga nu pra nyi mna chin mu ku ku kre sↄↄnri, e pe shↄnlie twan. 8Yesu Kristo wre, imi na wra nyi aŋge kre, pan u nyi aŋga, a pan u nyi nyjila kro nu. 9Yaa shia ti mbe kee fↄnyi yɛ e jawala laa kpra kolo kre na. La, ki fna mbe Nyiɛkpↄↄ dumiɛ kre o lolonyi ŋga faŋga, ki n pe aliire mbra kooloe tataara na. Leele mblɛ pra taa yire mbra yire na kre nsra tnu ka ta. 10Sↄfue, mblɛ praa tnumu tuni Judae suminyuŋgo nu kre pe n kolo ni na pie sra ŋga Yesu wↄ kre yaka le nyuu. 11Judae sↄfu lopom titi wre naa lee na yurɛ nyimi ni Cheche Lawee Titi kre nu, na sisam sra woni, la, yurɛ pre kaara yire rɛ, chia kre mbookrↄ praa yire sroi. 12Kre kolo na chↄↄ Yesu na yire mna sɛ ku chia kre mbookrↄ, mna u nyimi tɛɛ mna leele sisam laa pe na. 13Kena e ti mbe o sɛ u pan chia kre mbookrↄ, mbe nyifɛɛrɛ o kro gbo. 14Ŋgi na chia kpiki n wa o pan tra ŋga na, la, chia ŋga kie pan kre na o yiɛ nyi. 15Kena e ti o yire Yesu na mbra Nyiɛkpↄↄ kaan mɛɛ nyjila kro nu. Kre yi mblɛ pra taa Yesu na kre sra ŋga praa Nyiɛkpↄↄ kaan. 16E na chichie pini, e na eyɛ kee yirɛ, ŋgi na yire sra nyjɛ na Nyiɛkpↄↄ yiɛ shↄ. 17E ndie tɛɛ e loplombo pan, e na lii pe kee na. Ŋgi na, pre kɛɛ e ŋmaa nyi pra e le, a pie sɛ pe tnumu kro nyu wↄ Nyiɛkpↄↄ yiɛ. Kena e ndie tɛɛ pe pan, mbe pe pe tnumu tun yɛshↄↄrↄ ni. Na e pe kee ndru kre, pie pe tnumu tun yɛshↄↄrↄ ni, na kre ma pe yiɛ we je. 18E na nyiɛtali e na o kaan. O jawala saan o na, ŋgi na, nyjila kro nu o chaa mbe kee chichie pe. 19A ni e tali tataara mbe e na nyiɛtali mbra ni kaan, na Nyiɛkpↄↄ we ndruu ni tun e pan wa yaari. 20Ni wejinyiŋge Nyiɛkpↄↄ wre tali na e kaan, ŋmba wra yire nyu nunu pee nyimi ŋga kii wa nyjila kro nu kre na, mna o Tafun Yesu Kristo wre nyi mu yili kuulo nu, na u paan pe o lefun kpↄↄ kre. 21Wre wra yire Yesu Kristo na mna e pe chasi, mbe e na ŋga u chaa, na ŋga na u yiɛshↄ pini. Wre Yesu Kristo wre wo yi yiɛnyiŋge nyjila kro nu. Amin! 22Ni wolo, ni e tali mbe e ndie tɛɛ mbe ni kaalɛɛ nyjɛ ni yuu na e gbeŋmba ŋga loo. Ŋgi na, ni hlɛ ŋga ni e nyunↄi kre n tnu. 23Ni chaa mbe e chin na pe o ŋmbrↄ Timotio wre wↄ nyuŋgo. A na waa pan yaari mu ni da kre, mi na wre we chaa mbe pan. 24E e loplombo pre kro, na Nyiɛkpↄↄ leele pre kro shaari o pan, o wolo mblɛ pe yiri Italia na kre e shaari kro. 25Yire na Nyiɛkpↄↄ dumiɛ e tni kro. Amin!

will be added

X\