Hebrie 12

1Kena ŋga oo wa na dansiɛfɛɛnlɛ tataara mblɛ nyini ni a pe fɛ mu o kun ŋga, e ti mbe o yirɛ, na sisam nyjɛ yie o yii, mbe o tↄ kolo kre kuun wa, mbe oyɛ yii mbe tafɛŋgɛ ŋga kii wa o yiɛ kre fɛ. 2Mbe e ti mbe o oyɛ wru mbe taa Yesu na, wre na ki yire a o shↄnlie ta mbe sɛ su ki nyukↄↄnrↄ na. Wre Yesu wre wra yɛshↄↄrↄ ŋga kraa wa u yiɛ kre le, mna frↄ kanyana kumu kaan kre na, a u nsra nyifɛɛrɛ wru mu pe yaka, mna sɛ tni Nyiɛkpↄↄ ŋujↄↄn kre kalie. 3E Yesu ŋmba wra kanyana tataara yire nya, mna frↄ ta kre sↄↄnri, imi nyini sisampefɛɛnlɛ na u pra mu da. Kena yaa shia ti mbe e sↄↄnrↄ ku, mbe e ndru kro. 4ŋgi na, mu yire ŋga e wii na sisam taanla, e ta mu wi mu da mna pe yire e gboo na tun. 5Kee nyjɛ Nyiɛkpↄↄ na yo mna e le gbeŋmbaa na u biile lɛ yire kre, e yi fɛɛ ree? Mbo, "Ni Pↄ, na ni mu ndie tinii kre, maa shia ki le kee fiɛn, a na ni mu nyina sisam ŋga mu pe kre, maa shia ti mu yiɛ je." 6Ŋgi na, lewo ŋmba ni kori kre ndie ni tinii, na ŋmba ni yeerii ni pↄ wre gbuun na fwa ni. 7Na e lɛ wre e ndie tinii, e na kala nyaa kre, e frↄ, Ŋgi na e kanyana nu Nyiɛkpↄↄ e nyina mbe e chin na u biile lɛ yire. Pↄ ŋmbi uu wa a u lɛ n da mu u ndie tini tun hin? 8Na u n e ndie tini imi na u u biile pre kro ndie tinii kre, kena u lɛɛ lam biile ma yire. 9O lɛɛlɛ mblɛ pee wa tra mna kre, pe o ndie tinii, a na pe o ndie tinii kre, o pe kaan buuro. Kena yira ŋgi kie ti mbe waa o lɛ Nyiɛkpↄↄ wre fiɛ kpↄↄ mbe ŋmaa ta hin? 10Nyjila chiɛri ni o lɛɛlɛ mblɛ pee wa tra mna pre teeri na o ndie tinii imi na pe chaa. La, Nyiɛkpↄↄ rɛ, wre ki pini o chichie ŋga oo ta na, imi kie pe mbe o pe cheche na wre wi. 11Nyjila ŋga pe o ndie tinii kre, o yiɛ na shↄ, la, na ndie tinii kre nyila tro kre, mbe yɛshↄↄrↄ pan. 12Kena e ti mbe e kɛnyi, na e kosie nyjɛ yi pe e na yɛyiɛ kre sheli, 13mbe e na nyaari kooloe nyjɛ yi fraka na, imi kie pe mbe mblɛ pe fuuru kre saanla mbe faŋga ta. 14E gbeŋmba na yire na ndro kro we tni wejinyiŋge nu, mbe pe cheche e tnimu nu. Ŋgi na, ndro n wa mbe o Tafun wre nya, fↄna u pe cheche. 15E dↄↄta mbe wa waa shia laa Nyiɛkpↄↄ dumiɛ kre kro. E eyɛ le chichie, mbe sisam waa shia wa pe na imi tiŋge sisaa fini tinyi nu, mbra yi ŋmbilɛ klai na ki sisam ni kre yi. 16E dↄↄta mbe wa waa shia na tiɛri, ndee mbra waŋgra kee pini mbe Nyiɛkpↄↄ fɛɛ imi na Esau na pe kre. Wre wra yila sro na mna u sem lopom prɛ. 17Yire titi e chin na kre kee ŋga kↄkro kre, ŋga wraa u lɛ dwamu chaa kre, u n nsra ki ta, wra kna mu kro tↄ, a na wa jaa u jawala chinɛ, kra u shian a wra nyɛni tataara. 18E n pan, imi na Israel leele na pan nyua ŋga na ee jaa kɛ taa kre jaara, Sinai nyua kre, kre kraa nyini kanhun, mu wↄ kprikpri, a fuflɛ na gbuun ki na, 19a brↄɛn badɛnyi naa tini ki na, a paaraa naa wa ki na. Ŋga Israel leele pre na yi tiŋge loo kre, pe nsraa chaa mbe mana kre loo na, a praa tali. 20Ŋgi na, na pia jaa kee ŋga mana kre yuu kre loo, mbo, "Na yurↄ gbun nyua kre na kre pe u waari na dnɛ ni mbe gbo." 21Lawee kre na pe fiɛrɛ ni mu tro, a Mbose titi na kna mbo, "Mi titi, ni fiɛ, ki tia ndaa seeri." 22La, yire rɛ, nyua Ziↄn jaara e pan, Nyiɛkpↄↄ ŋmba u le wre chia e pan, nyjeeri Jerusalɛm kre, mna nyjeeri bitumblↄ kagbeŋ kagbeŋ nyi kre. 23E pan mu chaa Nyiɛkpↄↄ biile mblɛ u klu mu se pre yɛshↄↄrↄ fnimi nu, pre mɛɛ u nyunↄ nyjeeri wa. E pan Nyiɛkpↄↄ ŋmba u leele kro kpra kuun kre lawee. E pan leele mblɛ pe fraka, a Nyiɛkpↄↄ pe pe cheche kre ŋumu lawee. 24E pan Yesu, ŋmba u yire nyu nunu yoo fↄŋgↄ kre na, mu yire lewo na Nyiɛkpↄↄ lalaa wre jaara, e pan nyimi ŋga pe nyaara, a kra kee chichie pini mu wɛ Abɛl nyimi kre na kre na kre lawee. 25Kena e eyɛ le chichie, mbe yaa ŋmba u paara kre kee kre je. Leele mblɛ pra jaari tra mna kre na kee kre loo, mna ki je, a kra tia pe nsra shↄ u krↄ kuↄn kre nu, kena wre mblɛ pe yire nyjeeri na jaari kre, na o kee kre je kre, waa shↄ u kɛɛ. 26Ŋga wra yire Sinai nyua kre na mna paara kre, tra na seeri, a fuŋgaami u ki yo mu tɛɛ mbo, "Mbe tra nyaara haŋa. A tra chiin ma, la, nyjeeri we chaa." 27Mbe ki nyaara haŋa, kre kee ŋga nyina chasi na, yirɛ nyjɛ u wa yire kro, we yi nyaara, mbe yi kla, kena nyjɛ wa nyaara kre, yie kro. 28Kena e ti o Nyiɛkpↄↄ ŋga mboo. Ŋgi na, o o ŋga waŋgra ŋga kia jaa nyaara mbe kla, kre ndra na, e ti mbe o Nyiɛkpↄↄ sumi, mbe u yiɛshↄ o na, mbe o u fiɛ, mbra u dↄↄtaa. 29Ŋgi na, o Nyiɛkpↄↄ wre pe kanhun ŋga kie yirɛ kro kla.

will be added

X\