Galatie Hlɛ 6

1Ni wolo, na e e wa nya a wra sisam ka pini kre, yire mblɛ nu Kpra Ŋumu wre nyi kre fna mbe ufun wre fraka, la. ki fna mbe e ki pe na koroo ni. Mbe yire titi na eyɛ dↄↄtaa, mbe wa waa shia sɛ kre penlee kre nu. 2Kena na kala ka waa e wa da kre, e ya eyɛ na, na e pe ma kre, kena e li Kristo mbra na. 3Na wa uyɛ le, maa uyɛ jawa ndro wa nyini, a u nda ndro wa kre, mu chin na uyɛ u fana. 4Ndro kro u le imi na u kepele nyi, u uyɛ kpra kun. Na ŋufun kepele nyu kre, kre mu jaa kee chiriri ŋga mu pe tɛɛ mbe muyɛ kpↄↄ, mbe ma kee ŋga wa pini le mbe mu wo pe. 5Ŋgi na, ndro kro we u sisam ŋga u pe tio. 6Lewo ŋmba pe nyina Kristo ketaan kre, u ti mbe u nyinafun chin yira ŋga u ta. 7Yaa eyɛ fana, ndro n wa mbe jaa Nyiɛkpↄↄ pe fana yira ŋga lewo we luu, kre we kun. 8Pan ki nyi na falifun yirɛ ndru, na lewo waa tia u wejiniŋge yirɛ yiɛklu u pan kre, kena pan ki nyi na yirɛ u luu, na yi kun nyjila waa da, kumu we kun. Pan ki nyi chↄↄ, na lewo wa tia Kpra Ŋumu wre yiɛklu u pan u kepele nu kre, pan ki nyi na yirɛ mu luu, na waa yo we yi kun kre, blenyini ŋmaa we kun. 9Kena yaa ti mbe chichie pee pe o pan fnaa ni. Ŋgi na, na o n pra chichie pee na wala. Nyjila ka we da mbe o ki tnu ta. 10Kena nyjila ŋga oo ta kpan, ki fna o chichie pe o ŋmbilɛ na, mblɛ na ki fna o chichie pe kpↄↄ lɛ o ŋmbilɛ Kristo shↄnlifɛɛnlɛ. 11E le, mi titi kɛ nyunↄmu yi nyjɛ, e n nya imi na yi kpↄↄ kpↄↄɛ. 12Leele mblɛ pe chaa mbe peyɛ kpↄↄ na lewo wejiniŋge yirɛ ni kre, pre pe chaa mbe e e fɛnyi knumu jaŋga na. Pe yire kee nyjɛ pini, ŋgi na, pe n na chaa mbe leele yire Kristo kumu kre kee na mbe pe pra. 13Pre mblɛ pe tia pe pe fɛnyi knumu kre kuraa pe n na lii Mbose mbra yire na. Chaa pe chaa mbe e fɛnyi knumu, mbe e ta mbra peyɛ kpↄↄri, na pe e ta mu e fɛnyi knumu. 14La, mi rɛ, mba yaka tɛɛ mbe niyɛ kpↄↄ fio, fↄna o Tafun Yesu Kristo kanyana kumu kaan kre ni bↄkↄ. Ŋga Kristo na ku kanyana kumu kaan na kre ndra na, na ni yiɛ wa mu waŋgra ŋga le kre, ki pe na waŋgra pe kan kanyana kumu kaan na, a ki pe na pe mi titi kan kanyana kumu kaan na na. 15Na pe mu fɛŋgɛ kun o, na pe n ki kun o, ki n shian. Ŋga ki shian yi na, Nyiɛkpↄↄ we mu chinɛ, mbe mu pe lewo fↄŋgↄ. 16Leele mblɛ pie taa kre kolo ŋga ni nyina ŋga na kre, Nyiɛkpↄↄ we pre na u leele kro ŋga wejinyiŋge, mbe pe fooro chin. 17Ni kee haŋa yi kre, wa waa shia ni le kanyana kee ka nu na, ŋgi na, klɛ tloe nyjɛ yii wa ni na kre nyina na Kristo tnu wi mi. 18Ni wolo, yire na o Tafun Yesu Kristo wre dumiɛ e tni. Amin.

will be added

X\