Galatie Hlɛ 2

1Kie pe yɛlɛ kɛmbↄjijirɛ kↄkro kre, mi na Banabas na ndru mu sɛ Jerusalɛm na, ŋga o naa shie kre, o na sɛ na Tito ni. 2Nyiɛkpↄↄ wra ki wↄ mu ni nyina na ki fna ni kre kolo kre sɛ. Ŋga o na sɛ le kre, wre na sumifɛɛnlɛ pre loplombo pre chiin na fni, a ndaa pe nyina ketaan ŋga kee ni kpali leele mblɛ pe n pe Judae pre pan kre. Ni nsra chaa mbe ni tnumu ŋga ni tun, na ŋga ndaa paan mbe tun kre pe waara. 3Ni ŋmbrↄ Tito wre, nde na Griikie wo wi, a nde ni nsra tia wra u fɛŋgɛ kun. 4Nde leele plɛ naa wa mu chaa o nu, mna peyɛ pe na o plɛ lɛ, pre naa chaa mbe Tito u fɛŋgɛ kun. Pre leele mblɛ na ju mu pan mu chaa o nu, na o le, ŋga wre na Yesu Kristo pe nunu, a o oyɛ ta kre na. Praa chaa mbe o li pre Judae mbra yire na, mbe pe na tinlɛ lɛ. 5Imi kie pe mbe ketaan ŋga kii wa ketaan kre nu kre wa jaa chinɛ e pan kre ndra na, o nsra pe ŋga kolo fiɛn kuraa. 6La, mblɛ pra pe na pre lɛ sumifɛɛnlɛ pre loplombo pre nsra kee ka ta mu yo ni pan. Ŋga ki tia ndaa yuu ma rɛ, mɛɛ ŋga ni pre loplombo pre na nyi kpan, mi kee ka na ma kre ni, Nyiɛkpↄↄ na lewo yiɛ le mbe chiin u kpra kun. 7La, pre titi na chin na Nyiɛkpↄↄ na ni ŋga tnumu na ni ketaan kre kpali mblɛ pe n pe Judae pre pan, imi na wra Pita ŋga ketaan kre mbe u ki kpali Judae nu kre chↄↄ. 8Nyiɛkpↄↄ jaŋga saara na, wra ni pe bituŋu leele mblɛ pe n pe Judae pre nu, imi na wra Pita pe bituŋu Judae nu kre chↄↄ. 9Jemisi, na Pita, na Jↄn, pre pra pe na pre lɛ sumifɛɛnlɛ pre loplombo, pra nya na Nyiɛkpↄↄ wra ni ŋga kre tnumu ŋga, ki tia pra kɛ shↄ mi na Banabas pan. Ŋga kra pan na o kro pe tnumu nunu tunfɛɛnlɛ kre, o na paara mu fni, a wre na yo na oo na tnumu tuni leele mblɛ pe n pe Judae pre nu, mbe pre na tnumu tuni Judae nu. 10Kee ŋga pra ta mu yo o pan yi na, o na shiafɛɛnlɛ mblɛ pee wa sumifɛɛnlɛ pre nu kre sↄↄnri, a na kre kee ŋga na ni yiɛ nyina kpↄↄ. 11Ŋga Pita na pan Antokia na kre, ndaa u yiɛ kee yo u pan leele yiɛ na, ŋgi na, na u punu. 12Jemisi na leele plɛ tun Antokia na wa, nyjila ŋga ni pre leele mblɛ nsra ta mu pan wa kre, na Pita na shↄnlifɛɛnlɛ mblɛ pe n pe Judae pre chaa na lii. La, ŋga leele pre na le mu kↄ kre, a wra uyɛ kun pe na, wre na pre nsraa chaa na lii na, ŋgi na, wraa fiɛ mblɛ praa chaa mbe mblɛ pe n pe Judae pre fɛnyi knumu pre na. 13Ŋga kra pan ma kre, Judae mblɛ praa wa wa kre naa pini imi Pita na pe kre, hali Banabas na pe pe ma na. 14Ŋga ndaa nya na kolo chiriri na ma pe tro, a kee ŋga praa pini kre nsra kpra kolo ŋga kii wa ketaan kre nu kre wru kre, ndaa paara Pita pan pe kro yiɛ na, "Ŋu Pita, Judae wo wi ŋu. Ŋu na leele mblɛ pe n pe Judae pre chaa, a ki sɛ pe na Judae wo ma ŋu. Kena yira ŋgi ki tia mna chaa, leele mblɛ pe n pe Judae kre, mbe pe kaari Judae jaŋga na hin?" 15"Kpra na, Judae pe o se, leele mblɛ pe n pe Judae, mu pe sisam pefɛɛnlɛ pre plɛ ma wre. 16Nde o chin na Yesu Kristo shↄnlie ki tii mbe lewo fraka Nyiɛkpↄↄ yiɛ, ki n pe ŋga lewo we li nyjɛ Mbose mbra yire yo na yi. Wre chↄↄ, o Yesu Kristo shↄ mu li, a ki yire o shↄnlie ŋga o ta u nu kre ndra na, mbe o fraka Nyiɛkpↄↄ yiɛ. Ki n pe ŋga oo li nyjɛ Mbose mbra yire yo na yi. Ŋgi na, ndro n wa mbe jaa li nyjɛ mbra yire yo na, mbe fraka Nyiɛkpↄↄ yiɛ. 17Kena ŋga wre na Kristo pe nunu, mbe ki ti mbe o fraka Nyiɛkpↄↄ yiɛ ŋga, ki nyina na, o pe sisam pefɛɛnlɛ na leele mblɛ pe n Nyiɛkpↄↄ chin lɛ ree? Kena ki nyina na Kristo u o gbeŋmba a o na sisam pini ree? Pan ma ki nyi. 18Kena yira ŋga ni yo ki n nyu mu ki kla kre, na ndaa ndru na ki gbeele, kena ki nyina na ni mbra taan. 19Mi Pↄↄl, pan ki nyi na Mbose mbra yire yi ni gbo, a ni ku mu yili mbra yire kɛɛ, mbe ki ti mbe ni tni mbe pe Nyiɛkpↄↄ wo. Mi na Yesu ku u kanyana kumu kaan kre na. 20Kena ki tia mi titi ma nii wa kre tnimu ŋga nu na, la, Kristo uu wa mu tni ni nu. Kre ŋmaa ŋga nu ni nyi fuŋgaami ŋga, Nyiɛkpↄↄ Pↄ wre shↄnlie ni ni tni ki nu. Wre u ni kori, mu yila ni na mu u ŋmaa wa mu fun. 21Nyiɛkpↄↄ dumiɛ ŋga u ni ŋga kre, ni n ki je. Kena na kie jaa yire Mbose mbra na, mbe lewo jaa fraka Nyiɛkpↄↄ yiɛ na kre, kena Yesu kumu kre pe waara."

will be added

X\