Galatie Hlɛ 1

1Mi Pↄↄl pan hlɛ ŋga yiri na shie Nyiɛkpↄↄ sumifɛɛnlɛ mblɛ pee wa Galatia na kre pan. Mi Pↄↄl, lewo na nyjuro ma u ni yeeri, ndee mu ni tun na ni paan pe bituŋu, la, ni yeeree kre yiri Yesu Kristo na o Lɛ Nyiɛkpↄↄ ŋmba wra u nyi mu yili kuulo nu kre pan. 2Mi na o wolo mblɛ pee wa mna kre kro, o yire Nyiɛkpↄↄ sumifɛɛnlɛ mblɛ ee wa Galatia na wa kre kro shaari. 3O Lɛ Nyiɛkpↄↄ na o Tafun Yesu Kristo pe e dumi mbe e ŋga wejinyiŋge. 4Imi kie pe mbe Kristo o shↄ mbe yili waŋgra sisam nu kre ndra na, wra li o Lɛ Nyiɛkpↄↄ wre nyu kee na, mna yila o sisam na mna pan mu ku mu o ŋga. 5Nyiɛkpↄↄ wo yi yɛnyiŋge nyjila kre nu. Amin. 6Ki ni pe kawako na ki n mu kruaa, a e na feni na laari ŋmba u yire Yesu Kristo dumiɛ na mu e yeeri wre kro, mu sɛ na taari ketaan fↄŋgↄ kro. 7E ti ni yo mbe e loo, ketaan ka n wa haka na, la, leele plɛ pe e jawala klai, na chaa mbe Kristo ketaan kre kna. 8La, na mi na ni wolo pre, ndee nyjeeri bituŋu wa waa pan mu ketaan ka kpali e pan, a ki yili kiyɛ na ŋga o na klu mu kpali e pan kre ni kre, kena u fun atɛ. 9O klu mu kre kee ŋga yo e pan, a fuŋgaami ni ndru na ki yuu na. Na ndro waa pan mu ketaan ka kpali e pan, a ki yili ki yɛ na ŋga e na klu mu loo kre ni kre, kena u fun atɛ. 10Kena kee nyjɛ ni yuu ŋga nyina na ni chaa mbe leele yiɛshↄ ni na ree? Pan ma ki nyi. Chaa ni chaa mbe Nyiɛkpↄↄ yiɛshↄ ni na. Na chaa ni chaa mbe leele yiɛshↄ ni na kre, kena Kristo sumifun ma mi. 11Ni wolo, e ti ni yo e pan mbe loo, ketaan ŋga ni kpali kre, lewo pan ma ki yiri. 12Ni nsra ki loo mu yiri lewo pan, a lewo ma wra ni nyina ki yi. La, Yesu Kristo wre titi wra ki wↄ mu ni nyina. 13Yire titi e ni tnimu ŋga nu ndaa nyi fa kre loo, imi ndaa Judae sumiɛ kolo kre yii kɛshiin, mna Kristo sumifɛɛnlɛ pre fiŋge imi na kra fna, mna gbeŋmba na mbe pe kla. 14Ŋga ndaa Judae sumiɛ kolo kre yii kɛshiin kre na, ndaa yiɛ klu ni ndra nyini Judae pre pan, mna li o tolɛɛlɛ paala yire na imi na ki fna. 15La, nyjila ŋga pe nsra ta mu ni se tun kre, na Nyiɛkpↄↄ klu mu yire u dumiɛ na mu ni wↄ na ni paan u sumi. A ŋga Nyiɛkpↄↄ na 16u pↄ wre wↄ mu ni nyina, mbe ni yire u na mbe u ketaan kre kpali mbe mblɛ pe n pe Judae pre nyina kre, ni nsra sɛ ndro wie kee ka, 17a ni nsra sɛ Jerusalɛm na mna sɛ bitumblↄ mblɛ pe yiɛ klu kre wie yaka. Ndaa yire wa to, mna sɛ Arebia na, mna ndru mu pan Damasko na. 18Ni yɛlɛ taarɛ a ndaa chin mu sɛ Jerusalɛm na, mna sɛ Pita nya a mi na wre na paara, a ndaa tni u jaara kranu shiin. 19Ni nsra bitumblↄ pre wa nya na, fↄna Jemisi, o Tafun chunu wre bↄkↄ. 20Kee nyjɛ ni e nyunↄi ŋga pe kpra, Nyiɛkpↄↄ chin na kafinɛ ma. 21Kre kↄkro ni ndaa sɛ Siria, na Kilikia lawee yɛ nu. 22Kre nyjila kre na Kristo sumifɛɛnlɛ mblɛ praa wa Judea na kre n ni chin. 23Ni kee nyjɛ plɛ na yo pe pan yire chiin pra chin, mbo, "Blↄ ŋmba wraa o fiŋge fa kre, fuŋga u kee ŋga shↄnlie na wraa leele yiri na pe klai kre kpali." 24Ki tia ŋga ndaa pini kre ndra na, praa Nyiɛkpↄↄ kaan mɛɛ.

will be added

X\