Efisoe Hlɛ 6

1Biile, ŋga e pe Kristofɛɛnlɛ ŋga, kee ŋga ki fna e pe yi na, ee li e sefɛɛnlɛ kee na. 2Mu lɛ, na mu lo ŋga buuro, Nyiɛkpↄↄ mbra yire nu, ŋga chiin u le, mu u nyu yo mu taa ki na. 3Mbo, "na mu pe ma mu kee kro we nyu mbe mu ŋga, a mu ŋmaa we tnu tra ŋga na." 4Sefɛɛnlɛ, yaa na e biile pini mbe pe krↄ na kuun, la, e yire o Tafun wre na e na pe poorii, e na paara e na pe nyina. 5Tinlɛ, e na lii e tafɛɛnlɛ kee na tra mna, fiɛrɛ na seeree, na loloŋgo nunu ni, e na pini to na Kristo e sumi. 6Ki n pe nyjila ŋga ni pee wa e jaara mbra e pni chiin nu ki fna e na ŋga ki fna pini, la, na pe n wa e jaara kuraa kre, e lam nunu tɛɛ e tnumu ŋga Nyiɛkpↄↄ chaa tun, na Kristo tinlɛ lɛ yire. 7E lɛɛ wↄ e sumi, yaa na jawa na lewo e sumi, la, e ti mbe e jawala pe na o Tafun e sumi. 8E jawa na O Tafun wre we ndro kro ŋga u fↄtↄↄrↄ, na tnu wi ŋu o, na tnu ma ŋu o, we mu ŋga mu tnumu chichie ŋga mu tun fↄtↄↄrↄ. 9Tafɛɛnlɛ, e na e tinlɛ pini chiriri, yaa na pe pini lamsusrom kee. E sↄↄnri na yire na e tinlɛ pre kro, ee Tafun ni nyjeeri, ŋmba wra ndro yiɛ le mbe u kpra kun. 10Ŋga ki kro tↄ yi na, ŋga yire na o Tafun wre pe nunu kre ndra na, e yire u jaŋga kpↄↄ ŋga kii wa u nu kre na a e sheli. 11E ŋunↄ wiyirɛ nyjɛ Nyiɛkpↄↄ e ŋga yire kro le, kre ee jaa yire mbe wi na Sutna fana kee yire ni. 12Ŋgi na, wre na leele ma o ta na wii, la, wre na lamsusrom ŋumu fuɛn nyjɛ yii wa nyiɛ yiɛ na pre o ta, pre pe ŋunumu, na jaŋga, na faŋga lii wↄmu waŋgra ŋga nu o nyi ŋga nu. 13Kena e Nyiɛkpↄↄ ŋunↄ wiyirɛ le fuŋgaami, na ble sisaa kre waa to, mbe e ja mbe yire mbe wi na Sutna wre ni. Na e waa ja mu wi na u ni mu sɛ kↄ kre, mbe e jaa yire e yire haa. 14Kena e eyɛ kna, e kpra wru e greree, e grere na ki ni. E fraka, mbe e e frakaa kre pe e ŋunↄ wi dodoŋgi. 15E eyɛ kna, e sɛ ketaan ŋga ki paan na wejinyiŋge ni kre kpali, mbe ki pe na e kpawrɛ yi. 16Nyjila kro nu e e shↄnlie pe na e ŋunↄ wiyira ŋga lewo yiri mbe ki u tↄ yi. Na e kre ta, Sutna wre snimi nyjɛ yi nyini kanhun yire kro, ka wa e ta. 17Mbe e e ŋmaashↄmu pe e ŋunↄ wi juule, mbe Nyiɛkpↄↄ kee ŋga Kpra Ŋumu wre e ŋga kre pe e brↄfiɛn ŋunↄ wi wo. 18Yire kee nyjɛ krɛrɛ e na yi pini na nyiɛtalaa ni, mbe Nyiɛkpↄↄ ya e na. Kee ŋga kie pe kpan, e ki nyiɛtali imi na Kpra Ŋumu wre we e nyina. Yire kee nyjɛ ndra na, e eyɛ shie nyjila kro nu, yaa shia pra. Nyjila kro nu e ta nyiɛtali e na Nyiɛkpↄↄ kro leele kro kaan. 19E na nyiɛtali e na ni kaan, na ni yo mbe paara, mbe Nyiɛkpↄↄ ni ŋga kee ŋga mbe yo, mbe ni gbun ta mbe ketaan kre kee ŋga ki ndra kre kee yo mbe leele loo. 20Ketaan kre saara na pe tↄↄnrↄ mɛnyi le ni na. Kena e nyiɛtali, mbe ni gbun ta mbe ketaan kre kee yo imi na ki fna. 21Tichiko, o ŋmbrↄ ŋmba o kori, a u pe o Tafun wre kpra sumifun wre, we paan ni kee kro yo e pan, mbe e chin ŋga nu ni nyi mna. 22Kre na ni yila mu na u tuni e pan, mbe u paan ŋga nu o nyi mna kro yo e pan, mbe ki ti e gbun nyjii e na. 23O lɛ Nyiɛkpↄↄ na O Tafun Yesu Kristo wre pe e kro ŋga wejinyiŋge, na shↄnlie, mbe e ŋga koroo nyjila kro nu. 24Mblɛ pe O Tafun Yesu Kristo wre kori na kpra ni kre, pre na Nyiɛkpↄↄ dumiɛ ki tni.

will be added

X\