Efisoe Hlɛ 3

1Mi Pↄↄl, Yesu Kristo saara na pe ni yii mu le nyuŋgo mna, mbo ni yo na yire mblɛ e n pe Judae kre, na e pe Nyiɛkpↄↄ leele. 2Ni shↄ mu li na e loo na Nyiɛkpↄↄ u yire u dumiɛ saara na, mu ni ŋga kre tnumu ŋga na ni ki tun e pan. 3Nyiɛkpↄↄ na u kee ŋga u ndra kre wↄ mu ni nyina, ni klu mu ki kee ka nyunↄ fa chiɛri. 4Kee ŋga ni nyunↄ kre, na e ki tↄↄnri, ee nↄↄloo ŋga ni ta Kristo wre kee ŋga ki ndra kre nu kre ka twan. 5Fa kre, Nyiɛkpↄↄ nsra leele nyina kre ndra ndra kee ŋga. La, fuŋga Nyiɛkpↄↄ yire u Kpra Ŋumu wre na mu kee kre wↄ mu u bitumblↄ cheche, na u kee nyanyofɛɛnlɛ pre nyina. 6Ke kpra kre yi na, ki yire ketaan kre na, a leele mblɛ pe n pe Judae pre pan mu dwamu ŋga Nyiɛkpↄↄ we Judae ŋga kre ka ta, pe pan mu pe nunu wejikaara nunu nu, mu pan mu Nyiɛkpↄↄ nyu ŋga wra yo na we ti ki yire Yesu Kristo na mbe pan kre ka ta. 7Nyiɛkpↄↄ u yire u dumiɛ na mu ni pe ketaan kre sumifun, u faŋga ŋga ni u tnumu tuni kre na u yire mu ni pe ma. 8Nyiɛkpↄↄ leele pre kro nu, mi wi pe kotↄŋu, a nde mi Nyiɛkpↄↄ ŋga kre kolo ŋga na ni ketaan kre yo leele mblɛ pe n pe Judae pre pan, mbe pe nyina dwamu kpↄↄ ŋga kii wa Kristo jaara. 9Mbe leele kro nyina imi na Nyiɛkpↄↄ kee ŋga u ndra kre tnumu tuni mu da. Nyiɛkpↄↄ ŋmba wra yirɛ kro gbeele kre, wra u kee kre ndra fa, 10imi kie pe mbe fuŋgaami nyjila ŋga nu o nyi ŋga, mbe ki yire sumifɛɛnlɛ pre na, mbe jaŋgafɛɛnlɛ, na faŋgafɛɛnlɛ mblɛ pee wa nyjeeri wa kro Nyiɛkpↄↄ kachindɛ nya kooloe tataara na. 11O Tafun Yesu Kristo na Nyiɛkpↄↄ yire mu kre jawala ŋga pe mu tɛɛ. 12Na Yesu na o kro pan mu pe nunu, a o u shↄ mu li kre, oo oyɛ ta, mbe gbun ta mbe sɛ Nyiɛkpↄↄ yiɛ. 13Kena ni e tali, yaa ti mbe e sↄↄnrↄ ku na ni kala nyaa e ndra na, nyjɛ ni nyaa ŋga krɛrɛ, tnu ŋga ee ta ndra na yi. 14Kre kee ŋga ndra na, ndaa kosie kan tra o Lɛ Nyiɛkpↄↄ wre yiɛ. 15Wre Ndoo wre pan sele ŋga kii wa nyjeeri, na ŋga kii wa tra kro ki mɛɛ ta. 16Ndaa Nyiɛkpↄↄ tali mbe u yire u yɛnyiŋge dwamu kre na, mbe yire u Kpra Ŋumu wre na mbe e ŋga faŋga, 17mbe ki ti mbe Kristo wre yire e shↄnlie na mbe paan tni e nu. Ni Nyiɛkpↄↄ tali na u ti mbe e yire koroo na mbe didinyi kan. 18Mbe ki ti mbe yire, na Nyiɛkpↄↄ leele kro, mbe e jaŋga ta, mbe nↄↄloo ta, mbe chin imi na Kristo koroo kpↄↄ titi. 19Nyiɛkpↄↄ u ti mbe e Kristo wre koroo ŋga ki kpↄↄ mu wɛ lewo jawala na kre chin, mbe wre titi Nyiɛkpↄↄ wre paan tni o nu. 20Nyiɛkpↄↄ ŋmba u yire jaŋga ŋga ki tnumu tuni o nu kre na, na pini na weni nyjɛ o u tali, na nyjɛ o jawa na kre. 21U wo yi yɛnyiŋge sumifɛɛnlɛ pre nu, na Kristo nu nyjila kro nu. Amin.

will be added

X\