Kokosae Hlɛ 4

1Tafɛɛnlɛ, e na tinlɛ pini ŋga ki fraka, mu nyu. E sↄↄnri na yire chↄↄ ee wa na Tafun ni nyjeeri Nyiɛkpↄↄ lawee. 2E nyiɛtalaa yii kɛshiin, e na sri, e na Nyiɛkpↄↄ kaan mboo. 3Na e nyiɛtali, e na tali e na wre kaan na, mbe Nyiɛkpↄↄ o ŋga kolo mbe o jaa u kee kre kpali, mbe jaa Kristo kee ŋga ki ndra kre kee yo. ŋgi na, kre ndra na pe ni yii mu le nyuŋgo kre. 4Kena e nyiɛtali mbe ni jaa paara chasi imi na ki fna. 5Leele mblɛ pe n Kristo shↄ mu li kre, yire na pre e tni kachindɛ kolo na, kolo chiɛri ŋga ee ta kre, e e shↄnlie kre kee yo pe pan. 6Nyjila kro nu ki fna mbe e paara pe pan yɛshↄↄrↄ ni, mbe ki tna ndie, ki fna mbe e chin imi ki fna e kee nyu wↄ ndro pan chiriri. 7O ŋmbrↄ Tihiko ŋmba o kori, a wra tnumu tuni kpra ni, a wre na wre kro pe o Tafun wre sumifun, na u tnumu tuni kre, we paan ni kee kro yo e pan mbe e loo. 8Kre na ni yila na u tuni e pan, mbe u paan imi na o nyi mna kro kee yo e pan, mbe ki ti e yiɛshↄ. 9Wre na Onismↄsi, o ŋmbrↄ sumifun ŋmba e kori, a u pe kprafun, a u chaa e nu kre pie pan. Kee nyjɛ yi pini mna kro pie paan yi yo e pan. 10Aristako, ŋmba pe mi na wre yii mu le nyuŋgo kre, u e shaari kro, pan chↄↄ Marko, Banabas sele ndro wre e shaari na. E klu mu loo na na waa pan e pan wa na ki fna e u yii chichie. 11Joshua ŋmba pe yeeri Justo wre e shaari na. Pre leele taarɛ mblɛ lɛ Judae mblɛ pe Kristo shↄ mu li mna, a mi na pre na Nyiɛkpↄↄ ŋunumu kre tnumu tuni, pe ya ni na kolo tataara na. 12Epafra e shaari, wre chↄↄ u yiri e nu wa, a u pe Yesu Kristo sumifun. Nyjila kro nu u nyiɛtali lɛɛ nunu ni na e kaan, na tali na Nyiɛkpↄↄ u ti mbe e jaa yire gbiŋmbi, mbe lɛ Nyiɛkpↄↄ nu, mbe Kristo shↄ mbe li na loloŋgo kro ni, mbe jaa ŋga Nyiɛkpↄↄ chaa kro chin. 13Mi titi we jaa u tnumu kpↄↄ ŋga u tun mu yire na tun mu yire na Laodikia, na Hierapoli leele ŋga kre dansiɛrɛ li. 14Luka, o Dↄkita ŋmba o kori wre, na Dɛma e shaari. 15E o wolo mblɛ pee wa Laodikia na kre shaari o pan, pre na Nimfa, na sumifɛɛnlɛ mblɛ pe fni u katoo kre kro. 16Na e hlɛ ŋga tↄↄnri mu kↄ kre, e gbeŋmba na ee ki tↄↄnri mbe Laodikia sumifɛɛnlɛ pre loo na. Na pe e hlɛ kre kee loo mu kↄ kre, hlɛ ŋga pre we e ŋga kre, mbe e ki tↄↄnri mbe ki kee loo na. 17E yo Achipo pan na mbe u le na O Tafun tnumu ŋga pe le u kɛɛ kre, na we ki tun mbe kↄ. 18Mi titi kɛ nyunↄmu yi ŋga. Mi Pↄↄl, ni e shaari. Yaa shia ni tↄↄnrↄ mɛnyi nyjɛ pra le ni na yire kee fɛɛ. Yire na O Tafun wre dumiɛ e tni.

will be added

X\