Kokosae Hlɛ 2

1Tnumu shelee ŋga ni tun, yire na Laodikia leele, na leele mblɛ pe n da mu ni nya na nyini ni tun pan kre, e ti mbe ni e nyina ki yi. 2Imi kie pe mbe pe gbunnyiŋge ta kre na ndaa yila mu kre tnumu kre tun, mbe ki ti mbe pe peyɛ yii na koroo ni, mbe ki ti mbe pe Kristo chin pe jawala nu kpiki, na kpra nↄↄloo ni. A kie ti mbe pe Nyiɛkpↄↄ kee ŋga ki ndra kre chin, kee kre yi Kristo wre titi. 3Nyiɛkpↄↄ jawala na u kachindɛ krↄyirɛ nyjɛ yi ndra kre, wre wi safwa ŋga ki yi nyaari. 4Kena ni yuu e pan, yaa shia ti mbe ndro e fana na kewɛɛ ni, imi nyini yie tna mbe da kpan. 5Kii wa na ni wejiŋge n wa e jaara, nde nii wa e jaara ŋumu nu. Ni yiɛshↄ na ni nya na e yire chiriri, mu yire e shↄnlie ŋga e ta Kristo nu kre na, mu chaa mu yire gbiŋmbi. 6Ŋga e ta mu Yesu Kristo wru mu pe e Tafun ŋga, yire na wre e pe nunu. 7E didinyi kan u nu, e lɛ u kee nu, e sheli u shↄnlie nu, a imi na pra e nyina kre, e na mboo kaan nyaanyaa. 8A e dↄↄta, mbe ndro waa shia yire lewo kachindɛ kewɛɛ tɛɛ mbe e fana mbe e pe tinlɛ. Leele jawala kee nyjɛ pe leele nyina, a yi yiri waŋgra ŋga ŋumufuɛn pan kre, yire kee yire Kristo pan ma yi yiri. 9Nyjila ŋga ni Kristo naa wa tra kre, Nyiɛkpↄↄ kepele kro naa wa u nu. 10A ŋga yire na wre pe nunu kre ndra na, Nyiɛkpↄↄ e ŋga ŋmaa kpra ni. Kristo ŋunumu lie, na u jaŋga wɛ ŋumufuɛn mblɛ pe jaŋga, na ŋunumu lii kro na. 11Ŋga yire na wre pan mu pe nunu kre na, pan ki pe na e fɛnyi pe knumu, a e fɛkↄↄnrↄ kre n pe kolo ŋga na leele yire na pe fɛnyi knumu kre kolo na. La, fɛkↄↄnrↄ ŋga rɛ, pan ki nyi na Kristo u e kun mu laa wejikaara sisam na. 12ŋgi na, ŋga pra e ndrɛ je kre, ki nyina na pe yire na Kristo chaa mu le, mu yire na wre chaa mu nyi. Yi krɛrɛ yire e shↄnlie ŋga e ta Nyiɛkpↄↄ faŋga tnumu ŋga u tun nu kre na, Wre wra Kristo wre nyi mu yili kuulo nu. 13Nyjila ka nu e sisam na tia e na pe na e ku Nyiɛkpↄↄ haa, ŋgi na, Judae ma yire, ki tia e nsra Mbose mbra yire chin. La, Nyiɛkpↄↄ yire Kristo na mu pan na e ni ŋmaa nu. Nyiɛkpↄↄ o sisam kro ti mu o kɛ. 14O fↄlↄ nyjɛ o li a yi o taan yire krɛrɛ, u yi kun mu yili wa, yire na yi mbra nyjɛ yira o pↄ yire kro, u yi jaŋga kan mu mbra kanyana kumu kaan kre na. 15Kanyana kumu kaan kre na Kristo yire mu ŋumufuɛn mblɛ pe jaŋga, na ŋunumu lii kre gbo, mu tia nyifɛɛrɛ pe gbo leele yiɛ na. 16Kena ŋga ee li, ndee ŋga ee gbↄ kre, yaa ti mbe ndro mbra le ki na e pan, ndee mbe yo e pan na ki fna e ble yɛ wↄ mbe yire pe ble cheche, ndee mbe yo e pan na nyiɛpↄ ŋga kie yili kpan, ki fna e ki ble li, ndee mbe taa Judae blenyini kee yire na. 17Yire kee nyjɛ krɛrɛ mbakↄ yirɛ chichiele yire foto yi, a yire yi Kristo wre. 18Kena yaa ti mbe ndro e gbun na pimi ni, mblɛ pe yila kee nyjɛ pe nyaa nyiɛlɛ na, na yuu na pre nyu mu wɛ leele kro na kre, pe peyɛ nyjii kafinɛ kolo na, na nyjeeri bitumblↄ sumi. Pre leele mblɛ nyini lewo jawala pe wru mu tɛɛ na peyɛ kpↄↄri, a pe n kolo chiriri ka ni mbe jaa yire ki na mbe peyɛ kpↄↄ. 19Pre leele pre, pe Kristo ŋmba wi sumifɛɛnlɛ ndra kre, pe u je. Wre u u wejiŋge kre le, na ki kaan sro, u wejiŋge kre yi sumifɛɛnlɛ pre. Wre u wejiŋge kre yii ki sooloe na, mu yi mbra a ki pe nunu, a kra lee imi na Nyiɛkpↄↄ wre chaa mbe ki pe. 20Yire na Kristo chaa mu ku, ki tia e n wa ŋumufuɛn mblɛ pe ŋunumu lii tra ŋga na kre jaara na. Kena ŋgi ki tia a e na chaa mbe e tnimu pe na waŋgra ŋga wolo lɛ yire ŋga hin? Ŋgi ki tia a e na lii mbra nyjɛ leele le na ŋga hin? 21Mbra nyjɛ pe le na, "Maa shia kɛ taa ŋga na!", "Maa shia ŋga le nyuu!", a "Maa shia kɛ taa ŋga wa na!" 22Yire sro nyjɛ krɛrɛ, na lewo ta mu ka le nyuu mu kↄ, kena ki tnu kↄ. Yire mbra nyjɛ krɛrɛ leele pe yi le, na yi nyina. 23Kpra na leele plɛ jawa na mblɛ pe yire mbra nyjɛ le, na yuu na ki fna mbe lewo nyjeeri bitumblↄ sumi kre, na pe pe kachimblɛ. Pre pe peyɛ nyjii, na pe wejiŋge fiŋge; kolo ŋga ki n pe Nyiɛkpↄↄ kolo na. Nde yire mbra nyjɛ krɛrɛ tnu chiriri ka n wa yi nu, a yira ya leele na mbe pe laa pe wejiŋge sisaa na.

will be added

X\