Kokosae Hlɛ 1

1Mi Pↄↄl ŋmba ki yire Nyiɛkpↄↄ chaara na, a ni pan mu pe Yesu Kristo bituŋu kre, na o ŋmbrↄ Timotio, wre pan hlɛ ŋga yiri, 2na shie Nyiɛkpↄↄ leele mblɛ pee wa Kolosa na kre pan, o wolo Kristofɛɛnlɛ kprafɛɛnlɛ mblɛ pre na Kristo pe nunu kre. O lɛ Nyiɛkpↄↄ wre u e dumi mbe e ŋga wejinyiŋge. 3Nyjila kro nu na o nyiɛtali na e kaan kre, o o Tafun Yesu Kristo lɛ Nyiɛkpↄↄ wre kaan mboo. 4Ŋgi na, o e shↄnlie ŋga e Yesu Kristo shↄ mu li kre loo, mu imi e Nyiɛkpↄↄ leele kro kori kre loo. 5Ŋga kpra ketaan kre na klu mu da e na kre, e na dankna ŋga ketaan kre kaan kre kee loo. Kena e shↄnlie na e koroo ŋga e ta kre, dankna ŋga e ta kre na ki yire, a fↄtↄↄrↄ ŋga na e kaan kre, Nyiɛkpↄↄ ki tɛɛ nyjeeri wa na e sri. 6Ketaan kre paan na dwamu ni, mu na kpali na shie waŋgra kro nu. Imi na ki pini e nu mu yire ŋga ble e na Nyiɛkpↄↄ dumiɛ kee kre loo, mna pan mu imi sembremu ki nyi nya kre. 7O ŋmbrↄ sumifun Epafra, ŋmba o kori, a u yire o jeelee na, na tnumu tuni Kristo pan kpra ni kre, wre wra e nyina Nyiɛkpↄↄ dumiɛ kee kre. 8U pan mu e koroo ŋga Kpra ŋumu wre e ŋga kre, kee yo o pan. 9Kre kee ŋga ndra na, mu yire ŋga ble o na e kee loo kre, o nyiɛtali na e kaan nyjila kro nu. O Nyiɛkpↄↄ tali na u ti mbe e jawala ta imi na u chaa, mbe ti mbe e kachindɛ, na nↄↄloo ŋga u Kpra ŋumu kaan kre tni e nu. 10Kre e jaa tni imi na o Tafun wre chaa, mbe jaa ŋga ki tna u pan pe nyjila kro nu. E tnimu kre we kepele chiriri sɛŋgɛ sɛ kolo kro na, a kie ti e Nyiɛkpↄↄ chin kpↄↄ mbe ya. 11Ni tali na Nyiɛkpↄↄ u yire u yɛnyiŋge jaŋga kre na u e ŋga faŋga, mbe ki ti mbe e jaa frↄ, mbe eyɛ yii kee kro nu. 12E na Nyiɛkpↄↄ kaan mboo na yɛshↄↄrↄ ni, wre u tia e pe leele mblɛ ee jaa paan yira ŋga u tɛɛ u biile pan u kania ŋunumu nu kre ka ta. 13Wre u o shↄ mu yili wↄmu jaŋga kɛɛ, mu pan o ni U Pↄ ŋmba u kori kre ŋunumu nu. 14U Pↄ wre na o yire mu o yɛ ta, ŋgi na, u o sisam kro ti mu o kɛ. 15Pan Kristo nyi na Nyiɛkpↄↄ wi, lewo wa jaa Nyiɛkpↄↄ nya, la, lewo Kristo nya. Wre wi yirɛ nyjɛ Nyiɛkpↄↄ gbeele kro ndra. 16Wre na wra yire mna yirɛ nyjɛ yii wa nyjeeri na tra kro gbeele, yirɛ nyjɛ o nyaa, na nyjɛ n na nyaa kro. Wre na Nyiɛkpↄↄ na yire mna ŋumu mblɛ nu jaŋga nyi, pra ŋunumu lii, mu peyɛ pe tafɛɛnlɛ, na faŋgafɛɛnlɛ pre kro gbeele. Wre na Nyiɛkpↄↄ na yire mna yirɛ kro gbeele a wre wra yi gbeele mu ŋga. 17Wraa wa a Nyiɛkpↄↄ na chin mu yirɛ kro gbeele wre u yirɛ kro yii mu mbra a yi yirehaa ta. 18Wre wi u wejiŋge kre ndra, u wejiŋge kre yi sumifɛɛnlɛ pre. Wre na sumifɛɛnlɛ pre yire mu pan, a wre wra klu mu nyi mu yili kuulo nu, a ki tia u yiɛ klu yira kro pan. 19Nyiɛkpↄↄ wre chaara na ki yire a u Pↄ wre pe na wre Nyiɛkpↄↄ titi wi. 20A mu yire u Pↄ wre na kre, Nyiɛkpↄↄ wre titi u jawala pe na we ndru mbe yirɛ kro wru mbe pan u jaara. Nyiɛkpↄↄ yire u Pↄ wre kumu ŋga u ku kanyana kumu kaan na kre na mu pan na wejinyiŋge ni, mu yire ki na mu ndru mu yirɛ nyjɛ yii wa nyjeeri na tra kro wru mu pan u jaara. 21Nyjila ka nu yire na Nyiɛkpↄↄ haa na le, a e na u yii loŋgo, ŋgi na, sisam kee e jawa na yi pini. 22La, fuŋga rɛ, Nyiɛkpↄↄ yire u Pↄ wre kumu kre na mu e wru mu pe u nↄↄlↄ, mbe yire ki na mbe e pe cheche, nɛɛrɛ ka wa pe e na, a ndro wa e kee ka ta mbe yo, mbe ki ti e jaa yire u yiɛ. 23Kena ki fna e pe kprafɛɛnlɛ nyjila kro nu, mbe yire gbiŋmbi na nyuŋgo nↄↄ yi, mbe yaa shia ti mbe pe e mↄŋↄ mbe laa e dankna ŋga e na ta nyjila ŋga nu e na ketaan kre loo kre kro. Kre ketaan ŋga ki kpali waŋgra kro nu, a kre na mi Pↄↄl yire mu pe sumifun. 24Fuŋga ni yiɛshↄ ni kanyana ŋga ni nya e ndra na kre na. Kristo saara na, ni yila mu sumifɛɛnlɛ mblɛ lɛ Kristo wejiŋge kre na, na kala nyaa, mbe sɛ su na mbe kanyana ŋga ki kro mbe ni nya kre nyu le. 25A Nyiɛkpↄↄ ni pe u sumifɛɛnlɛ pre sumifun, wre u ni ŋga kre tnumu kre na ni ki tun e nyumu saara na. Tnumu kre yi na mbe u kee kre kpali. 26Ki pe kee ŋga u ndra lewo na fuŋga ma, la, fuŋga u ki wↄ mu u leele nyina. 27Nyiɛkpↄↄ kee ŋga u chaa yi na, u kee ŋga u ndra kre na we ki wↄ mbe u biile nyina, u kee ŋga ki ndra kre pe kawako kee, a ki yɛnyiŋge kpↄↄ, a u ki tɛɛ lewo kro pan. Kee ŋga ki ndra kre yi na. Kristoo wa mu tni e lolonyi nu, ki nyina na ee Nyiɛkpↄↄ yɛnyiŋge kre ka ta. 28Kena Kristo kee o kpali na ndro kro nyina. O leele kro jaari na pe nyina, o yire Nyiɛkpↄↄ kachindɛ na, na paan na ndro kro ni Nyiɛkpↄↄ yiɛ, mbe ki ti mbe leele kro lɛ Kristo nu. 29Kolo ŋga na ndaa tro mna chin mu ja mu kre tnumu ŋga tun kre yi na, ndaa wi mu faŋga kpↄↄ ŋga Kristo kaan, a kra tnumu tuni ni nu kre tɛɛ mu tnumu kpↄↄ tun.

will be added

X\