Nyiɛkpↄↄ Bitumblↄ Hlɛ 9

1A Sↄↄl ŋmba wra kro na piɛrɛɛ na kumu fuflɛ foo na woni twanfɛɛnlɛ pre na kre na sɛ sↄfu lopom wre pan, 2mna sɛ u kɛ hlɛ shↄ mbe sɛ na ki ni Damasko na, mbe sɛ le pe fninyinyi yire nu mbo na waa leele nya, mblɛ pe taa kre shↄnlie kolo ŋga na kre, bilɛ o, chiɛlɛ o, mbe u pe yii mbe pe pↄ mbe pan na pe ni Jerusalɛm na. 3A Sↄↄl na yiri mu to kolo na shie, ŋga wraa mbra Damasko na kre, titɛɛ kre nu na lawee nyi mu yiri nyjeeri mu pan mu u kun mu fni. 4A wra foli mu to tra, mna mana ka loo na ki u yeeri mbo, "Sↄↄl, Sↄↄl! Mni a mu ni pra ma hin?" 5A Sↄↄl na kna mbo, "Ŋu wi ŋmbi hin, ni Tafun?" A mana kre na kna mbo, "Mi wi Yesu ŋmba mu pra kre. 6Yiri mu le chia kre lam. Na mu le ki na kre, ŋga ki fna mbe mu pe kre, pie ki yo mu pan." 7A wre na bilɛ mblɛ praa shie kre, na yire na kpoolo lɛ. Pra kee kre loo a pe nsra ndro nya. 8A Sↄↄl na yiri tra wa mu nyiɛlɛ nyaa mbe lawee le kre, na u fun nyiɛlɛ na, u nsraa nyaa. A bilɛ pre na u yii kɛ na mna le na u ni Damasko lam. 9U ble nununu taarɛ, na wa nya, na wa ka, na wa gbↄ. 10Kre nyjila kre na twanfun waa wa Damasko na wa a praa u yeeri Anania. Wre wra Nyiɛkpↄↄ kee nya nyiɛlɛ na, a o Tafun wre na yo u pan mbo, "Anania!" A wra kna mbo, "Ni we, ni Tafun." 11A o Tafun wre na yo u pan mbo, "Yiri mu sɛ lete fraka wo kre na, mu sɛ wie blↄ ŋmba pe yeeri Judas wre katoo, mbe pe mu nyina Sↄↄl ŋmba u yiri Tarso na kre, mu nya na uu wa na Ni tali, 12mu nya nyiɛlɛ na na blↄ ŋmba pe yeeri Anania pan mu kɛ taa u na, mbe u nyiɛlɛ yire nyaa." 13A Anania na kna mbo, "Ni Tafun, ni wre blↄ ŋmba kee loo lenɛɛrɛ pan. Sisam ŋga nyini u taa leele chichiele mblɛ pee wa Jerusalɛm na kre na. 14A u sɛ hlɛ shↄ sↄfue loplombo pre pan mbe paan mblɛ pe mu mɛɛ yeeri chia ŋga na kre kro yii mbe sɛ." 15A o Tafun wre na kna mu yo u pan mbo, "Sɛ! Blↄ ŋmba wi ndro ŋmba mi titi wↄ mbe u ni mɛɛ tio mbe sɛ waŋgra leele pre, na pe ŋulo, na Israel leele kro nu. 16Mi chↄↄ mbe u nyina, kanyana nyjɛ yi fna mbe u nya ni mɛɛ kre ndra na." 17A Anania na yiri mna sɛ le katoo ŋga nu Sↄↄl na nyi kre nu, mna sɛ kɛnyi taa u na mna kna mu yo u pan mbo, "Ni chunu Sↄↄl, o Tafun Yesu ŋmba wra uyɛ wↄ mna mu nyina mu kolo ŋga mnaa kuun kre nu kre, wre u ni tun na ni pan mu lawee mbe mu nyiɛlɛ yire nyaa, mbe Kpra Ŋumu wre pan mbe tni mu nu." 18Titɛɛ kre nu, na yira ka pe na mbro krↄ yi, na ki yili Sↄↄl nyiɛlɛ mu to, a u nyiɛlɛ yire na nyaa a wraa nyaa. Ba wra yiri to, a pra u ndra je. 19A wra chin mna yaka cha mu le lɛɛ, a faŋga na pan. A wre na twanfɛɛnlɛ mblɛ praa wa Damasko na wa kre na tni wa mna mu chiɛri. 20Titɛɛ kre nu na Sↄↄl u Yesu kee yuu pe fninyinyi yire nu, na Yesu wi Nyiɛkpↄↄ pↄ wre. 21A leele mblɛ pra u nya mna u kee kre loo kre kro, kra pe pe kawako ni. A pra kna na peyɛ wie mbo, "Blↄ ŋmba ma wraa leele kuu Jerusalɛm na, Yesu mɛɛ ŋga ndra na kree? Hali mna yila ki na mna pan Damasko na mna, mbra paan mblɛ pee wa mna mu taa Yesu mɛɛ kre na kre yii haa mbra sɛ sↄfue loplombo pre ŋga Jerusalɛm na kree?" 22Bawa Sↄↄl na faŋga ta u dansiɛrɛ kre wraa lii kre nu kuraa mu ya, a wra tia sra na wↄ Judae mblɛ praa wa Damasko na wa kre na, na Yesu wi Kristo ŋmba Nyiɛkpↄↄ wↄ wre. 23Ble tataara yɛ kↄkro kre, Judae pre na sɛ bↄↄnri, na Sↄↄl chaa mbe gbo. 24A Sↄↄl na pe kolo kre nya, na pe u sri chia kre kooloe na lafo na blee, mbe u yii mbe gbo. 25A Sↄↄl twanfɛɛnlɛ pre na u tre chia kre mbookrↄ na kakɛɛ ni ble ka, a wra fɛ. 26Ŋga Sↄↄl na ndru mna sɛ le Jerusalɛm na kre, wraa chaa mbe sɛ chaa twanfɛɛnlɛ pre nu. A na twanfɛɛnlɛ pre kro na u fiɛ, na pe n u shↄnli na u kaari twanfun chiriri. 27Bawa Banabas na sɛ na u ni bitumblↄ pre yiɛ na, mna sɛ kee ŋga o Tafun na wↄ mu Sↄↄl nyina Damasko kolo kre na kre, na ŋga wraa wa Damasko na imi na wra Yesu kee kre yo na gbun ni kre, mna yi krɛrɛ yo pe pan. 28Ŋga kra pan ma kre, Sↄↄl na pre na tni Jerusalɛm na wa. 29A wra gbun ta, na ketaan kre yuu o Tafun wre mɛɛ nu. A wraa paara na Griikie pre nyina, a wre na pre naa nyu kna peyɛ ni. A pre na kↄ na u chaa mbe gbo. 30Ŋga u ŋmbilɛ pre na ki loo kre, a pra sɛ na u ni Kaisaria na, mna sɛ yire wa, mna tia wra sɛ Tarso na. 31Fuŋga kra pan na sumifɛɛnlɛ mblɛ praa wa Judea na Galilii na Samaria na kre kro na wejinyiŋge ta, mna faŋga ta mu ya, mna tni Yesu mɛɛ na u fiɛrɛ nu. A pra li Kpra Ŋumu wre kolo na, mna na nɛɛi na yaa. 32Ŋga kra pan nyjila ka nu a Pita naa kila sumifɛɛnlɛ pre na na tro kre, wra sɛ da Nyiɛkpↄↄ leele mblɛ praa wa Lida na kre na. 33Bawa wra sɛ blↄ wa da na u fuuru mu kro u dɛŋglɛ na kie pe yɛlɛ kↄↄnataarɛ, u mɛɛ na Enea. 34A Pita na kna mu yo fna wre pan mbo, "Enea, Yesu Kristo mu tra, kena yiri mu mu dɛŋglɛ yire gbeele." Titɛɛ kre nu to, a wra taan mu yiri mu yire. 35Ŋga leele mblɛ praa wa Lida na Sarↄn na wa kre na u nya kre, a pe kro na kna mna o Tafun wre kee kre shↄnli. 36Kre nyjila kre na twanfun chlↄ waa wa Jopa na u mɛɛ naa Tabita, ki nyina na safiun. Wre chlↄ ŋmba, chichie pee na ndro fooro chiɛn, kre na yi u tnumu. 37A kra pan na yire ble yire nu kre, chlↄ wre na yaa mna ku. A pra u weli mna sɛ u sniŋge abansru nyuŋgo ka nu nyjeeri. 38Ŋga twanfɛɛnlɛ pre na loo na Pita wa Lida na, haa nyjↄ kre, a pra leele shiin wↄ mu tun u pan na pe sɛ u tali mbe u pan nyaanyaa. 39A Pita na yiri a wre na leele pre na pan Jopa na wa. Ŋga Pita na le Jopa na kre, a pra nduu na u ni abansru nyuŋgo ŋga nu pra gboo wre tɛɛ kre nu. Na Tabita nↄↄlↄ lekuchiɛlɛ wa mu yire u jaara na nyɛni. A praa dodonyi na yonyi nyjɛ Tabita naa piin na pe kaan u gbugbam nyjila kre woni na leele nyina. 40A Pita na pe kro yile fimi na mna kosie kan mna nyiɛtali, mna kna mu yo gboo wre pan mbo, "Tabita yiri!" A Tabita na u nyiɛlɛ nyaa. Ŋga wra Pita yiɛ nya to, a wra yiri mu tni. 41A Pita na kɛ tini mu u yii mu u yire mu yire sholo, mna Nyiɛkpↄↄ leele pre na lekuchiɛlɛ pre yeeri, mna pe nyina u wi na u nyi. 42Leele mblɛ praa wa Jopa na kre kro na kee kre loo, a tataara na o Tafun wre shↄnli. 43A Pita na tni Siimↄn jeribaa wa katoo Lida na wa ble tataara.

will be added

X\