Nyiɛkpↄↄ Bitumblↄ Hlɛ 8

1A Sↄↄl wre chↄↄ wra li Stefano kum kre na. A kre ble kre, shↄnlifɛɛnlɛ mblɛ praa wa Jerusalɛm na wa kre prara na wɛ kuraa, a pra pe nyina mu sɛ Judea na Samaria tra kre na, fↄna bitumblↄ pre, pre chiin pra kro wa. 2A Nyiɛkpↄↄ chinfɛɛnlɛ plɛ na Stefano wru mna sɛ le, mna u nyɛni chichie. 3A Sↄↄl wre na ja mna shↄnlifɛɛnlɛ pre tↄↄra kpↄↄ mnaa lee kalonyi nu na bilɛ na chiɛlɛ woni na shie na pe leni nyuŋgo. 4A mblɛ pra nyina kre na sɛ na kila na Nyiɛkpↄↄ kee kre yuu na tro. 5Bawa Filipo na sɛ Samaria chiaa ka na mna sɛ Kristo wre kee yo mu pe nyina wa. 6Ŋga lenɛɛrɛ pre na u kee kre loo mna kawako kee tataara nya kre, a pra nyu nunu pe mna ndie tɛɛ u pan. 7A ŋumufuɛn mblɛ praa wa pe nɛɛrɛ nu na gblee badɛnyi tɛɛ mu yili yili pe nu. A pe finla na pe mblɛ sooloe yira ku ku kre tataara na faŋga ta. 8A yɛshↄↄrↄ kpↄↄ na pan chia kre na. 9Kre nyjila kre, blↄ wa naa wa waŋgra kre nu u mɛɛ naa Siimↄn, a wra pe lewo ŋmba wraa dobodobo woni kuraa a kra Samaria leele pre pe kawako ni. A wra uyɛ pe na lekpↄↄ wi waŋgra kre nu. 10Wre blↄ ŋmba, waŋgra kre biile na pe loplombo kro na taa u kee ŋga we yo na mbo, "Blↄ ŋmba wi Nyiɛkpↄↄ jaŋga kre, ŋga pe yeeri jaŋga kpↄↄ kre." Kra tia pra taa u kee na kama. Ŋgi na, 11wra u kↄmfↄↄrↄ kre tɛɛ mu pe ndra li mu mu. 12A ŋga pra kↄ mna Nyiɛkpↄↄ ŋunumu kre ketaan kre na Yesu Kristo mɛɛ kre loo Filipo pan kre pra u shↄnli, a pe bilɛ na pe chiɛlɛ na tia pra pe ndrɛ je kro. 13Hali Siimↄn wre titi na shↄnli a pra u ndra je na. Ŋga pra u ndra je mu kↄ kre, a wra taa Filipo na, ŋga wra kawako kee na kekpↄɛ yire nya ma kre, a kra ndru mu u pe kawako ni kpↄↄ. 14Ŋga bitumblↄ mblɛ praa wa Jerusalɛm na kre na loo na Samaria leele Nyiɛkpↄↄ kee kre shↄnli kre, a pra Pita na Jↄn wↄ mu tun a pra sɛ pe le. 15Ŋga pra sɛ kre, a pra sɛ nyiɛtali mu pe ŋga mbe pe Kpra Ŋumu wre ta. 16Yaka ma kra tia, na Kpra Ŋumu wre n ta mu pan pe wa nu tun, na pe ndrɛ chiin pe je mu le o Tafun Yesu wre mɛɛ nu. 17A Pita na Jↄn na kɛnyi taa taa pe na, a Kpra Ŋumu wre na pan mu tni pe nu. 18Ŋga Siimↄn na nya na bitumblↄ pre kɛnyi taari leele pre na a praa Kpra Ŋumu wre taa kre, a wra yo we pe ŋga swa. 19Mbo, "E mi ŋga jaŋga ka na ɛ, mbe ndro ŋmba na mbe kɛ taa kpan mbe u Kpra Ŋumu ta uyɛ nu." 20Bawa Pita na kna mu yo u pan mbo, "Nyiɛkpↄↄ we ŋu na mu swa kro kla, na mu jawa na swa pe teeri na Nyiɛkpↄↄ kɛyira kre loni. 21Kee ŋga, mu wo n wa ki nu, a mu n krↄyira ni ki nu, na mu loloŋgo n fraka Nyiɛkpↄↄ yiɛ. 22Kena mu jawala chinɛ mu laa mu sisam kro, mu Nyiɛkpↄↄ tali aada we mu sisam ŋga kii wa mu loloŋgo nu kre ti mbe mu kɛ. 23Yaka ndra na ma, ni ja mu nya na muu wa na susrom kpↄↄ ni, a sisam mu fɛ mu kun." 24A Siimↄn wre na kna mbo, "Jande, e o Tafun wre tali e ni ŋga mbe kee nyjɛ e yo nyjɛ waa shia kaari ni pan jiɛnlɛ kee." 25Ŋga pra dansiɛrɛ kre li mna o Tafun wre ketaan kre yo wa kre, a pra ndru na shie Jerusalɛm na mna ketaan kre yo Samaria tra nu wa krɛrɛ mu sɛ. 26Bawa Nyiɛkpↄↄ bituŋu na paara mu Filipo nyina mbo, "Yiri mu sɛ tapanhaa kolo ŋga ki yire Jerusalɛm na mu sɛ Gasa na kre na." Kre kolo kre, nyaa kolo yi. 27A wra yiri mna sɛ. Ŋga we le na Etiopia blↄ waa ŋmba, a wra pe Etiopia ŋuchlↄ Kandake lepↄↄ ŋmba wraa u swa kro le. Na u sɛ Jerusalɛm na mu sɛ sumi, 28mu ndru na paan mu tni u soo kaa nu mu na Nyiɛkpↄↄ kee nyanyofun Yisaia hlɛ kre tↄↄnri. 29A Ŋumu wre na yo Filipo pan mbo, "Flo mu da soo kaa ŋga na." 30A Filipo na fɛ mu sɛ blↄ wre jaara. Ŋga wra loo na Yisaia hlɛ blↄ wre tↄↄnri kre, a wra u wie mbo, "Kee ŋga mu tↄↄnri ŋga mu ki nↄↄ loo?" 31A blↄ wre na kna mbo, "Mni mbe pe mbe jaa ki nↄↄ loo hin? Fↄŋga ndro ni nyina ki yi?" A wra Filipo tali na u nduu mbe paan tni u jaara. 32Kee ŋga wraa tↄↄnri kre na yi kre mbo, "Pan pra u yii mu sɛ na pe shiee sɛ mbↄↄ gbo. Imi na mbↄↄ pↄ pieri u yooro knumufun yiɛ kre, pan u nsra nyu kun. 33Pra u yiɛ gbun mna kekpra kre fɛɛlɛ. A ŋmbi we jaa u kro leele chin mbe nyina na hin? Na pe u ŋmaa kla tra mna." 34A blↄ wre na kna mu Filipo wie mbo, "Jande, kena ŋmbi kee Nyiɛkpↄↄ kee nyanyofun ŋmba yuu ŋga hin? Wre titi kee u yuu ree, ndro fuŋu wa kee u yuu hin?" 35Bawa Filipo na yire mna paara mna yili Nyiɛkpↄↄ kee kre pe nyunↄ kre na, mna Yesu ketaan kre yo mu u nyina. 36Ŋga praa shie kre, a pra sɛ da lↄↄ ka na. A blↄ wre na kna mu yo Filipo pan mbo, "Le, lↄↄ yi kre. Kena yira ŋgi kie ni tↄ ni ndra jee kolo hin?" 37A Filipo na kna mu yo u pan mbo, "Na mu mu loloŋgo kro tɛɛ mu shↄnli mu kↄ, kena koloo wa ki na mbe ni mu ndra je." A blↄ wre na kna mbo, "Ni shↄnli na Yesu Kristo wi Nyiɛkpↄↄ Pↄ wre." 38A blↄ wre na tia soo kaa kre na yire a pe kro shiin na tii mna le lↄↄ kre nu. A Filipo na blↄ wre ndra je. 39Ŋga pra yili lↄↄ kre nu na yilii fimi na kre, a o Tafun Ŋumu wre na pan mu Filipo wru, a blↄ wre na u cha mu la, mna to u kolo na shie. 40A Filipo na sɛ yili Asoto na, mna tro mu ketaan kre yo chiɛ nyjɛ yiraa wa wa yire kro na, mna sɛ su Kaisaria na.

will be added

X\