Nyiɛkpↄↄ Bitumblↄ Hlɛ 7

1Bawa Judae sↄfu lopom wre na u wie mbo, "Kee nyjɛ pe yuu ŋga krɛrɛ yɛŋgɛ yi ree?" 2A Stefano na kna mbo, "Ni wolo, na ndoe, e ndie tɛɛ e loo ni pan. Yɛnyiŋgefun Nyiɛkpↄↄ wre na uyɛ wↄ mna o lɛ Abraham nyina nyjila ŋga nu wra wa mu tni Mesopotemia na kre, ki kↄkro wra pan mu tni Haran na. 3Mesopotemia na wa Nyiɛkpↄↄ na yo u pan mbo, 'Yiri mu tra ŋga na, mu yili mu leele nu, mu sɛ tni tra ŋga mbe mu nyina ŋga na.' 4A wra ki loo mna yiri Kaldie tra kre nu mna sɛ tni Haran na. A u lɛ kum kↄkro wa kre, Nyiɛkpↄↄ na tia wra pan mu tni tra ŋga na e nyi mu tni aŋga ŋga na. 5A nde Nyiɛkpↄↄ nsra u ŋga krↄyira ka tra kre na, hali jele dunu tra kuraa u nsra u ŋga ki yi, la, Nyiɛkpↄↄ na u nyu yo mu u ŋga na wre na u nanae wo yi kre tra ŋga, a nde na kre nyjila kre, na Abraham n ta mu pↄ ta tun. 6A ŋga Nyiɛkpↄↄ na yo mu taa u kee kre na yi na, mu nanae pre we sɛ pe fumblↄ, leele plɛ tra na yɛlɛ lafɛɛ jijirɛ, mbe pe pe wru tinlɛ mbe pe fiŋge. 7A waŋgra ŋga leele pie sɛ sumi kre, mbe pefɛɛnlɛ ndie tini. Kre kↄkro kre, mbe ni ti mu nanae pre ndru mbe paan ni sumi tra ŋga na. 8A Nyiɛkpↄↄ na yo Abraham pan na fɛkↄↄnrↄ u wru mu pe yira ŋga ni pie nyu nunu kre le, kre nu Abraham na Isaki se, ki ble kↄↄnataarɛ ble na kre, a wra u blɛm kun. A Isaki na yiri mu Jekↄb se, a Jekↄb na yiri mna o tolɛɛlɛ kɛmbↄshiin pre se se. A pra pe kro blɛm knumu kro. 9A o tolɛɛlɛ kɛmbↄshiin pre na prara tɛɛ mna pe nunu prɛ, praa u yeeri Josɛf, mna Egypt leele plɛ ŋga. A Nyiɛkpↄↄ na taa Josɛf kro, 10mna u wↄ mu yili kanyana kro nu, mna u ŋga dwamu na kachindɛ Egypt ŋunu Farao yiɛ, a ŋunu wre na u pe Egypt tra kre, na u katoo lopom. 11A nyjila ka na pan a klo ka na to Egypt na Kaanan tra nu wa kro, a wejiwrɛm kpↄↄ na pe da kro, a kra pan na o tolɛɛlɛ pre nsraa sro taa na lii. 12Ŋga Jekↄb na loo na sro wa Egypt na kre, a wra klu mu o tolɛɛlɛ pre wↄ mna tun wa sro pan. 13Ŋga pra ndru mna sɛ wa shiin wo na kre, kre nu Josɛf na uyɛ wↄ mna u nyjↄↄlↄ pre nyina, a kre nu Farao na Josɛf sele leele chin. 14Bawa Josɛf na leele tun a pra sɛ u lɛ Jekↄb wru na u sele leele ni kro mna pan, praa fuloe taarɛ na kɛmbↄkunↄ. 15Ŋga Jekↄb na sɛ tni Egypt na wa kre, wre na o tolɛɛlɛ pre na kↄ mu ku ku wa. 16A pra pan na pe ni Sekem na, mna pan mu pe le le dnɛ wee ŋga Abraham na swa fiŋge tɛɛ mu lↄ Hamↄ biile pan Sekem na kre nu. 17Ŋga nyu kre Nyiɛkpↄↄ na le Abraham pan kre nyjila naa dani kre, u nanae pre naa nɛɛi na yaa. A pra nɛɛ tataara Egypt na, 18mna sɛ su nyjila ŋga nu ŋunu fↄŋgↄ ŋmba u n na Josɛf chin na pan mu tni jↄↄn kre na. 19Wre ɛ ŋunu ŋmba wra kachindɛ kolo ka wru mna o sele leele pre pↄↄri ndra shelee ni, mna tia praa pe biile fiɛn fiɛn waa, mna na pe kuu. 20Kre nyjila kre pra Mbose se, a wra nyu Nyiɛkpↄↄ pan, a pra u pↄↄri nyiɛpↄ taarɛ u lɛ katoo. 21Ŋga kra pan na pia ja mbe u ndra na kre, a pra sɛ u wa. A Farao pↄ bichable wa na sɛ yili u na mna u wru, mna sɛ u pↄↄri mna u wru mu pe u pↄ. 22A pra Mbose nyina Egypt kachindɛ ŋga mu chin ŋga kro, a kra tia wra pe lekpↄↄ, u paaraa na u kepele nu. 23Ŋga wra li yɛlɛ fuloe shiin kre, kra pan u jawala nu na ki fna mbe u sɛ u wolo Israel leele pre le. 24Bawa wra sɛ da na Egypt ndro wa u wolo pre wa piin sisaa, a wra yire u chia wo wre kro, mna Egypt wo wre gbun mu gbo. 25Mbose na jawa na, u wolo pre we yire kre na mbe chin na Nyiɛkpↄↄ we yire u na mbe pe shↄ mbe yili kanyana kre nu, a u wolo pre nsra ki jawa ma. 26Ŋga nyiŋge na se na, a wra ndru mu pan wa kre, wra nya na plɛ tuni na, a wra yo we pe lalaa gbeele, mbo, 'Bilɛ, leele nunu lɛ yire, yira ŋgi ki tia e na eyɛ pini sisaa ŋga hin?' 27A ŋmba wraa kefↄↄn kre piin u ŋmbrↄ wre na kre na Mbose ŋunↄ mu wa mbo, 'Ŋmbi u mu tɛɛ o ŋunu na o kpra kunfun hin? 28Mu chaa mbe ni gbo imi na mna Egypt ndro wre gbo aŋge kre ree?' 29Ŋga Mbose na loo ma kre, a wra fɛ mna sɛ tni Midian tra na, hali mna se wa bibilɛ shiin. 30Ŋga wra yɛlɛ fuloe shiin ta wa kre, Nyiɛkpↄↄ bituŋu na sɛ uyɛ wↄ mna u nyina fimi lawee ka nu Sinai nyua kre lawee, nyaa shↄↄ ka nu. 31Ŋga Mbose na kanhun kre shↄↄ nyini nya ma kre, kra u pe kawako ni, a wra flo mu da ki na mbe ki le chiriri, a o Tafun Nyiɛkpↄↄ wre na u yeeri kanhun kre nu. 32Mbo, 'Mbose, mi wi mu lɛɛlɛ Nyiɛkpↄↄ wre. Mi wi Abraham na Isaki na Jekↄb Nyiɛkpↄↄ wre.' A Mbose na seeri, u n nsraa chaa mbe ki le na. 33A o Tafun wre na yo u pan mbo, 'Mu kpawrɛ yire wↄ mu jeelee na. Tra ŋga na mu yire kre, ki pe tra cheche. 34Kanyana ŋga nu ni wolo mblɛ pee wa Egypt na kre nyi kre, ni ki nya, a ni pe nyɛnɛɛ kre loo. Kre na ni paan mbe pe wↄ mbe yili yire kanyana yire nu. Kena pan mbe ni mu tun mbe mu sɛ Egypt na wa.' 35Mbose ŋmba pra je mna yo u pan na ŋmbi u mu tɛɛ ŋunu na kpra kunfun wre, wre chↄↄ Nyiɛkpↄↄ na u bituŋu wↄ mu nyina nyaa shↄↄ kanhun kre nu, mna u tun na u sɛ pe, pe ŋunu na pe shↄfun. 36Wre wra sɛ pe wↄ mu yili na pe ni Egypt na, mna kawako kee pe Egypt tra na wa, na epo nyiɛ kre nu, na fimi tra kre nu yɛlɛ fuloeshiin. 37Wre Mbose ŋmba wra yo Israel leele pre pan mbo, 'Nyiɛkpↄↄ kee nyanyofun ŋmba u pe na mi wi kre, wre Nyiɛkpↄↄ we yire e nu mbe e ŋga.' 38Wre Mbose ŋmba na bituŋu wre praa wa Israel leele pre nu fimi tra kre nu, a bituŋu wre naa paara Mbose na o tolɛɛlɛ pan Sinai nyua kre na kre, a Mbose na ŋmaa kee kre shↄ mna pan mu o ŋga kre. 39La, o tolɛɛlɛ pre nsraa chaa mbe u nyu kee loo, a pra u kun mu wa mna chaa pe lolonyi nu, kaa na pee wa Egypt na. 40A pra yo Aarↄn pan mbo, 'Jande sɛɛnlɛ pe o pan, mbe yi yiɛ klu o pan, fuŋgaami ŋga, o n chin kee ŋga ki Mbose ŋmba u yiri na o ni Egypt na kre ta.' 41A Aarↄn na nuu pↄ wa gbeele mu pe ŋga yire ble yire nu, a praa sra woni mu na sɛɛn kre kaan a pe yiɛ na shↄ pe kɛ nyu tnumu kre pra tun kre na. 42A Nyiɛkpↄↄ na krↄ kna mu wa pe na, kee kre ndra na, mna pe ŋga kolo a praa nyjeeri yirɛ sumi. Imi na Nyiɛkpↄↄ kee nyanyofɛɛnlɛ pre ki nyunↄ pe hlɛ kre nu kre mbo, 'Israel leele, mi e na yurɛ na yirɛ tɛɛ mu sra wↄ mu ŋga yɛlɛ fuloe shiin, fimi tra kre nu kree? 43Mna na e Molok nyuŋgo, na Rafen wↄlↄ, na e sɛɛnlɛ nyjɛ e na pe kre sumi. Kre ndra na mbe e ni mbe sɛ wa Babilↄn kro.' 44O tolɛɛlɛ na kre yoŋgo nyuŋgo kre ta fimi tra kre na, ŋga kra nyina na Nyiɛkpↄↄ wa pe kro. Imi na Nyiɛkpↄↄ na Mbose nyina ki nyunↄmu na u ki pe kre. 45Kre yoŋgo nyuŋgo kre na kro o tolɛɛlɛ na Joshua pan nyjila ŋga nu Nyiɛkpↄↄ na waŋgra kre leele ni pe yiɛ mna tia pra pe yirɛ wru kre. Yaka nsra kre yoŋgo nyuŋgo ŋga ta mu pan mu su Devid nyjila na. 46Wre Devid ŋmba wra dumii kpↄↄ ta Nyiɛkpↄↄ yiɛ, mna Nyiɛkpↄↄ tali na u ti mbe u nyuŋgo sin mbe wre Yakↄb Nyiɛkpↄↄ ŋga. 47A nde Sↄlↄmↄn, Devid pↄ wre, wre wra kↄ mu kre nyuŋgo kre sin mu Nyiɛkpↄↄ ŋga. 48A la, nyjeeri Nyiɛkpↄↄ wre na tni nyuŋgo ŋga pe kɛ tɛɛ mu sin nu, imi na Nyiɛkpↄↄ kee nyanyofun wre na yo kre, 49mbo, 'O Tafun yo na nyjeeri yi ni ŋunumu jↄↄn, a tra yi ni jeelee taa yira, kena yira ŋgi nyuŋgo sembremu mu sin mbe ni ŋga mbe ki ni yiɛ nyi hin? Ndee ni wuuhaa yi ŋgi hin? 50Ni kɛ nyu tnumu ma nyjɛ krɛrɛ ree?' 51Yire ndikambla, e e lolonyi na e ndiile tↄ mu yo na e e blɛnyi knumu ndra na, kena Nyiɛkpↄↄ leele lɛ yire. Na Kpra Ŋumu wre toni kolo nyjila kro nu. Imi na e lɛɛlɛ na pe kre chↄↄ, kre kro e taa. 52Nyiɛkpↄↄ kee nyanyofɛɛnlɛ pre ŋmbi haa e lɛɛlɛ pre nsra pra hin? A pra mblɛ pra klu mu pan mu Kprafun wre paan kre kee yo kre yii mna gbo gbo. Wre Kprafun wre e wↄ mu gbo kre. 53Yire e na Nyiɛkpↄↄ mbra yire ta mu yili nyjeeri bitumblↄ pre pan, a e je e n li yi na." 54Ŋga leele pre na Stefano kee nyjɛ wra yo kre loo kre, pe krↄ na kun na u ni kpↄↄ a praa nyu mɛɛri u na. 55A na Stefano rɛ, na Kpra Ŋumu wre u nyi, a wra yire mu yiɛ wa mu le nyjeeri dumm mna Nyiɛkpↄↄ yɛnyiŋge kre nya, mna Yesu nya na uu wa mu yire Nyiɛkpↄↄ kalie. 56A wra kna mu yo pe pan mbo, "E le! Ni nya na nyjeeri nyaa a Lewo Pↄ wree wa mu yire Nyiɛkpↄↄ kalie." 57A pra gble badaaŋga le mna kɛnyi tɛɛ mu pe ndiile yurↄ yurↄ, mna tin mu sɛ wo u na. 58Mna u suuru mu yili na u ni mbookrↄ mna sɛ u waari na dnɛ ni. A mblɛ pra dansiɛrɛ li mu u taanla kre na pe dodonyi wↄ wↄ mu tɛɛ blↄ ŋmba praa yeeri Sↄↄl kre yiɛ. 59Ŋga praa Stefano waari na dnɛ yire ni kre, a wra nyiɛtali mu yo mbo, "Ni Tafun Yesu, ni ŋumu shↄ!" 60to, mna kosie kan mna mana kpↄↄ tɛɛ mu fuu mbo, "Ni Tafun, jande pe sisam ti mu pe kɛ." Ŋga wra yo ma to, a wra fii.

will be added

X\