Nyiɛkpↄↄ Bitumblↄ Hlɛ 5

1Bawa blↄ wa, praa u yeeri Anania na u chↄ Safira, na sɛ pe tra ka prɛ, 2a wre na u chↄ wre na swa kre ka kun mu ndra, mna pan na ki kↄↄn ni bitumblↄ pre yiɛ. 3A Pita na kna mu yo Anania pan mbo, "Yira ŋgi ki tia Sutna mu loloŋgo nyi ma hin? A mu tra kre swa ka kun mu ndra mu pan mbe kala fnɛ Kpra Ŋumu wre pan ŋga hin? 4Ŋga tra kre naa wa kre, na mu wo maa? A ŋga mu ki prɛ mu kↄ kre chↄↄ, swa kre mu wo yi. Kena ŋgi ki tia mu jawala ŋga nyini wru hin? Leele pan ma mu kee ŋga fnɛ, la Nyiɛkpↄↄ pan mu ki fnɛ." 5Ŋga Anania na loo ma to, a wra to mu ku. Ŋga kra pan ma kre fiɛrɛ na lenɛɛrɛ mblɛ pra ki loo kro yii. 6A nyanyjɛbɛɛlɛ pre na yiri rↄ, mna u bali mna u tↄ na yira ni mna sɛ u le. 7Ki kↄkro kie pe nyjila nununu taarɛ kre, u chↄ na pan wa, na u n ŋga ki pe chin. 8A Pita na kna mu u wie mbo, "Kpra yo ni pan. Kena imi e na tra kre prɛ mu shↄↄ?" A chlↄ wre na yo, "Ɛnhɛɛn, pan o na ki prɛ mu shↄ." 9A Pita na kna mu yo u pan mbo, "Ŋgi ki tia e kro nyu pe nunu mbe paan o Tafun wre Ŋumu wre pe mbe le ŋga hin? Le, leele mblɛ pe sɛ mu plↄ le kuraa pe paan kre, a pan pie mu wru mna mbe sɛ le na." 10Titɛɛ kre nu wa to, a wra to u yiɛ mu ku. Ŋga nyanyjɛbɛɛlɛ pre na pan kre, na chlↄ wre ku na, a pra u wru mna sɛ le u plↄ mbɛɛ na. 11Ŋga kra pan ma kre, fiɛrɛ na sumifɛɛnlɛ pre, na mblɛ pra kee yire loo kre kro yii. 12A Nyiɛkpↄↄ na yire bitumblↄ pre na mna kawako kee tataara pe kre tra kre nu wa. A pe kro na nyu nunu wru mnaa chaa na fni Sↄlↄmↄn bamba kre na. 13Leele mblɛ pra kro kre nsra sro mbe chaa pe nu, la, pra pe shↄnli kpↄↄ. 14A praa leele taa tataara mu wɛ fa na, bilɛ na chiɛlɛ na pan mu ya tataara. 15Hali a praa yambla tru na paan na teeri lete na, na pe sniŋgei dɛŋglɛ na, sniyirɛ na, kena na Pita tro rɛ, mbe u ndiile kuraa to pe plɛ na, mbe pe faŋga ta. 16Kra tia chiɛ nyjɛ yira wa mbɛɛlɛ na wa kre krɛɛrɛ leele na pan mu fni Jerusalɛm na, mnaa paan na yambla na mblɛ nu ŋumufuɛn nyi ni, a pra pe kro tra kro. 17A sↄfue pre lopom wre na Saduki leele mblɛ pra nyu ta nunu mu ya u na kre, na yila nyibinyiɛ na, 18mna sɛ bitumblↄ pre yii mna sɛ le nyuŋgo, mna praa lewaala leni kre. 19Bawa Nyiɛkpↄↄ bituŋu na pan wa ble, mna nyuŋgo kre krↄɛ nyaa mna pe wↄ mu yo pe pan mbo, 20"E sɛ yire suminyuŋgo wa e ŋmaa kre kee yo e leele nyina." 21Ŋga pra loo ma kre, ŋga nyiŋge na se bnimi pupu to, a pra le suminyuŋgo wa mna na leele nyina Nyiɛkpↄↄ kee kre. Bawa sↄfu lopom wre na mblɛ pra ya u na kre na sɛ fni, mna loplombo kala lifɛɛnlɛ pre na Israel loplombo pre kro yeeri mna pan mu fni, mna leele tun na pe sɛ bitumblↄ pre wↄ nyuŋgo wa mbe pan. 22Ŋga leele pre na sɛ a pe nsra bitumblↄ pre nya nyuŋgo wa kre, a pra ndru mna pan mu yo loplombo pre pan, 23mbo, "O sɛ da na pe nyinyi yire krↄ yire tↄ kama, a yi shiefɛɛnlɛ pree wa mu yire yire yi nyu na, a ŋga o krↄɛ yire nyaala kre, a o n ndro nya wa." 24Ŋga sumindoo kre shiefɛɛnlɛ lopom wre, na sↄfue loplombo pre lopom wre na kee kre loo ma kre, pe jawala na kla kee kre na, na mni kie taa hin? 25Bawa ndro na pan mna yo pe pan mbo, "E le, bilɛ mblɛ e na le nyuŋgo kre, pee wa mu yire sumindoo wa na leele nyina." 26Ŋga pra ki loo ma kre, shiefɛɛnlɛ lopom wre na sumifɛɛnlɛ pre na yiri mna sɛ bitumblↄ pre yii mu pan, pe nsra ki pe na jaŋga ni, yaka ndra na ma. Praa fiɛ na leele pre we pe waari na dnɛ ni. 27A pra pan na bitumblↄ pre ni mna pan mu yire kala lifɛɛnlɛ pre lalaa. A sↄfu lopom wre na pe wie, 28mbo, "O nsra e jaari na yaa shia mɛɛ ŋga nyini wru mbe leele nyina kee ka na kree? A e je mu kee ŋga kpali Jerusalɛm na mna kro, na chaa mbe nyina na wre o u kumu pimi li." 29A Pita na bitumblↄ pre kro na kna mbo, "Kpra na, ki fna mbe o Nyiɛkpↄↄ wo loo mbe wɛ lewo wo na. 30O tolɛɛlɛ Nyiɛkpↄↄ wre na Yesu ŋmba e na kan kaan kre na kre nyi. 31Wre Nyiɛkpↄↄ kↄ mu sɛ tɛɛ u kalie mu u pe lopom, na ŋmaashↄfun, mbe ki yire kre na mbe Israel leele pe jawala chinɛ, mbe sisam tinkɛɛ ta. 32A wre na Kpra Ŋumu ŋmba Nyiɛkpↄↄ u kee pefɛɛnlɛ kaan kre, wre lɛ kee kre dansiɛfɛɛnlɛ." 33Ŋga pra kee ŋga loo ma kre, kra pe tↄↄra kpↄↄ a pra sɛ bↄↄnri na pie bitumblↄ pre gbo. 34Kre nyjila kre, na Farisiie ndro waa wa kala lifɛɛnlɛ pre nu wa, u mɛɛ naa Gamaliel, a wra pe mbra nyinafɛɛnlɛ pre wa, ŋmba leele pre kro na shↄnli paa. A wra yiri mna tia pra yili na bitumblↄ pre ni mbɛɛ na chiɛri. 35A wra kna mu yo pe pan mbo, "O wolo Israel leele, e eyɛ le chichie kee ŋga e chaa mbe leele mblɛ pe ŋga na. 36Kie pe nyjila chiɛri ka yi ŋga, blↄ wa na yiri, u mɛɛ naa Teuda, a wra yiri mna uyɛ pe mbo lekpↄↄ wi, a leele we pe na lafɛɛ jijirɛ nyi, na taa u kro, a pra kↄ mu u gbo, a u kotↄmblↄ pre na nyina, a u kee kre na to. 37Kre kↄkro kre, Juda ŋmba wra yiri Galilii na kre na yiri nyjila ŋga nu praa leele tↄↄnrii kre nu, pan wre na leele ta tataara a pra taa u kro na chↄↄ, a wre na kↄ mu taa ka na, a u kotↄmblↄ pre na nyina. 38Kena fuŋgaami kee ŋga, ni yuu e pan na yaa leele mblɛ pe yaka, e pe ti mbe pe sɛ. Yaka ndra na ma. Na pe kolo ŋga ndee tnumu ŋga pe tuni ŋga, na lewo jaŋga ni pe ki pini kre, pie pra. 39La, na Nyiɛkpↄↄ pan pe jaŋga kre ta kre, yaa jaa ki kla, mbe kia shia kↄↄ pan na Nyiɛkpↄↄ ni e tuni." 40A pra u kee kre nↄↄ loo mna tia pra bitumblↄ pre yeeri mu pan, a pra pe frↄ fwɛ ni, mna pe jaari na pia shia Yesu mɛɛ tɛɛ mbe paara na. A pra chin mu pe wa a pra sɛ. 41A bitumblↄ pre na yili kala lifɛɛnlɛ pre yiɛ na, a pe yiɛ na shↄ mu tro, na pe pe jawa na pe fna mbe kala nya Yesu mɛɛ ndra na. 42Blenyini ŋga, pe nsra Yesu dansiɛrɛ kre, na u kee kre nyinaa ti, pe katoe nu, na pe suminyuŋgo wa, praa nyina na Yesu wi Kristo ŋmba Nyiɛkpↄↄ wↄ wre.

will be added

X\