Nyiɛkpↄↄ Bitumblↄ Hlɛ 4

1Ŋga praa paara na leele pre nyina kre, sↄfue loplombo pre, na sumindoo kre shiefɛɛnlɛ lopom na Sadukie pre na pan pe na. 2Kra pe pe krↄ ni na Pita na Jↄn leele pre nyina, mu yire Yesu na, na kunnyiɛ kee kre yuu na pe nyina. 3A pra pe yii, a na yila na kↄ kre ndra na, a pra sɛ pe le nyuŋgo mbe nyiŋge pe se tun. 4La, leele mblɛ pra pe kee kre loo kre, tataara na ki shↄnli, a pe bilɛ pre nyu na da kagbeŋ kunↄ. 5Ŋga nyiŋge na se kre, pe ŋulo, na pe loplombo pre, na nyinafɛɛnlɛ pre na pan mu fni Jerusalɛm na, 6na sↄfu lopom Hana, na Kaifa, na Jↄn na Alɛksandria, na leele mblɛ pra yiri sↄfu lopom wre katoo wa kro na sɛ fni wa. 7A pra pan na Jↄn na Pita ni, mu yire pe lalaa, mu pe wie mbo, "Ŋmbi jaŋga ndee ŋmbi mɛɛ ni e tɛɛ mu kee kre pe hin?" 8Bawa Pita ŋmba na Kpra Ŋumu wre na wɛ kre na yiri mna yo pe pan mbo, "Tolɛɛlɛ na loplombo, 9aŋga na e o wie chichie ŋga yaŋu ŋmba ta na faŋga ŋga u ta ŋga kee waa, 10ni chaa mbe e kro na Israel leele kro chin, na Nazrɛt ndro Yesu Kristo ŋmba e na kan kanyana kumu kaan na kre, ŋmba Nyiɛkpↄↄ na nyi mu yili kumu nu kre, u mɛɛ nu blↄ ŋmba faŋga ŋga ta kre. 11'Wre wi dnɛ ŋga yire nyuŋgo sinfɛɛnlɛ na yo na ki n nyu kre, a nde kre ki kↄ mu pe nyuŋgo kre ndra faŋga kre,' 12A ŋmaashↄmu ka n wa ndro wa na wa nu, a mɛɛ fↄŋgↄ ka n wa waŋgra ŋga nu a kii wa ndro wa nu mbe o ŋmaa ta ki nu." 13Ŋga pra Jↄn na Pita gbun-kuuro kre nya ma kre, a pe chin na pe pe leele mblɛ pe n da mu hlɛ twan, mu pe lewaala plɛ kre, kra ndru mu pe pe kawako ni, a pra chin na pre na Yesu na tni. 14A ŋga pra blↄ ŋmba pra tra kre nya na uu wa pe jaara wa kre, pe nsra kee ka ta mbe yo mbe pe taan. 15A pra tia pra pe yile fimi na, a pra bↄↄnri, 16mbo, "Kena kee ŋgi oo leele mblɛ pe hin? Kawako kee nyjɛ yi yire pe na mu pe yire krɛrɛ, Jerusalɛm leele tataara yi nya, a waa jaa kee ka pe mbe yi kaala na. 17La, ŋga oo pe mbe kee kre pe piin kre wa kro mbra kpali na kre, jaari ki fna mbe o pe jaari mbe pia Yesu wre mɛɛ tɛɛ mbe paara kuraa mbe ndro nyina na." 18A loplombo pre na Jↄn na Pita yeeri na, mna yo pe pan na pia shia paara ndee mbe Yesu mɛɛ yeeri kuraa mbe ndro loo. 19A Pita na Jↄn na kna mu yo pe pan mbo, "Na ki fraka Nyiɛkpↄↄ yiɛ na ki fna mbe o e nyu kee loo mbe wɛ wre Nyiɛkpↄↄ wo na kre, e ki kpra kun. 20La, wre rɛ, waa ki ja, fↄŋga wre ŋga o nya na ŋga o loo kre kee yo." 21A pra pe jaari kpↄↄ na, mna pe wa lenɛɛrɛ pre ndra na, pe nsra chin imi nyini pie pe pe. Yaka na ma. Kee kre pra pe kre ndra na, lenɛɛrɛ naa Nyiɛkpↄↄ kaan mɛɛ. 22Na blↄ ŋmba na kre kawako kee kre na pe kre, na u wɛ yɛlɛ fuloe shiin na. 23Ŋga pra pe wa kre, a pra pan pe wolo pre pan. 24Ŋga pra ki loo kre, pra loloŋgo nunu wru mna yo Nyiɛkpↄↄ pan mbo, "O Tafun, ŋu ŋmba mu nyjeeri na tra gbeele na epo na nyjɛ yii wa ki nu kro ni, 25mna yire Kpra Ŋumu wre na mna tia o tolɛɛ Devid, mu sumifun wre na yo na, 'Ŋgi ki tia a waŋgra leele na kanyaa leni na kewɛɛ jawa ŋga hin? 26Ŋulo mblɛ pee wa waŋgra ŋga nu yiri mu yire sholo, a pe loplombo na fni na nyu pini nunu o Tafun Nyiɛkpↄↄ wre, na u Kristo ŋmba u wↄ wre na.' 27A yɛŋgɛ na, pe fni yɛŋgɛ chia ŋga na, Hɛrodi na Pontio Pilato na waŋgra leele na Israel leele kro, pe fni mu nyu ta nunu mu sumifun cheche Yesu ŋmba mu wↄ kre na. 28Na pie kee nyjɛ mu jawa, na mu kɛ tnumu nyjɛ mu yo mu tɛɛ na yie pe yire krɛrɛ na pie yi pe. 29Kena o Tafun, pe kee nyjɛ pe pini na o piɛri nyjɛ le, mu mu sumifɛɛnlɛ ŋga faŋga, mbe pe gbun ta mbe mu kee kre yo, 30mbe mu mu kɛ tini mbra yambla trai, mbe nyaari mu pↄ cheche Yesu wre mɛɛ na mbe kawako kee pe." 31Ŋga pra nyiɛtali mu kↄ kre, lawee ŋga nu pra fni kre na seeri, a Kpra Ŋumu wre na pan mu pe kro nyi, a pra faŋga ta mnaa Nyiɛkpↄↄ kee kre yuu. 32Shↄnlifɛɛnlɛ pre kro na jawala nunu na nyu nunu wru. A wa nsra u krↄ yirɛ wru mu pe wre nunu wee, la, pe krↄ yirɛ na pe pe kro wee. 33A bitumblↄ pre na jaŋga kpↄↄ ta, mnaa Yesu kunnyiɛ kre dansiɛrɛ lii. A Nyiɛkpↄↄ na nyu pe na kro. 34Shianfun nsraa wa pe nu. Ŋgi na, pe mblɛ praa wa na tra na kalonyi ni kre kro na yi prɛ, mna pan na yi swa ni bitumblↄ pre yiɛ, 35na pe yi yↄↄlɛ mbe pe kro ŋga imi ki pe kro shian. 36Pan Josɛf ŋmba bitumblↄ pre na ŋga mɛɛ mbo, Banabas, ki nyina na gbeŋmbaa lefun. A wra pe Levi ndro, ŋmba u yiri Kipro tra na kre, 37wraa wa na tra ka ni, a wra sɛ ki prɛ mna pan na swa kre ni bitumblↄ pre yiɛ.

will be added

X\