Nyiɛkpↄↄ Bitumblↄ Hlɛ 3

1Ki ble ka na kie pe nyjila taarɛ lafo na, pe nyiɛtali nyjila kre, Pita na Jↄn na chaa na shie pe suminyuŋgo wa. 2Kre nyjila kre, na blↄ wa, u fna mu yire u bimi, a praa u tru blenyini na shie na teeri suminyuŋgo kre jlonwee nyu ŋga praa yeeri Chichie kre na, mbe wra leele mblɛ pe shie suminyuŋgo wa kre tali yirɛ. 3Ŋga fna wre na Pita na Jↄn nya na pe shie sumindoo wa kre, a wra pe tali na pe u ŋga yaka. 4A Pita na Jↄn na yiɛ kan blↄ wre na, a Pita na kna mu yo u pan mbo, "Ta o le!" 5A blↄ wre na kna na pe le ma na we yaka nyini ta pe pan. 6A Pita na kna mu yo u pan mbo, "Swa n wa ni pan mbe ni mu ŋga, la, ŋga ni ta mbe mu ŋga ye. Yesu Kristo, Nazrɛt wo wre mɛɛ nu, yiri mu nyaari!" 7A Pita na u kalie kɛ yii mu u yire mu yire sholo. Titɛɛ kre nu to, a blↄ wre jenyaarɛɛ na u sooloe na yire u na. 8A wra yiri mu yire, na nyaari, a wre na Pita na Jↄn na le suminyuŋgo wa, a wraa nyaari na yeni na Nyiɛkpↄↄ kaan mboo. 9A leele pre kro na u nya, imi na wraa nyaari na Nyiɛkpↄↄ kaan mɛɛ ma kre, 10pra u chin na wre wra yila talaa na mnaa jiin suminyuŋgo kre jlonwee nyu ŋga pe yeeri Chichie kre na kre. Kra tia kee kre na pe kro pe kawako na kefolo kuraa mu tro. 11A ŋga pra nya na u kun mu mbra Pita na Jↄn na ma kre, leele tataara na pan mu fɛ mu pe kun, bamba ŋga praa yeeri Sↄlↄmↄn bamba kre lawee, a kra pe pe pan kawako ni mu tro. 12Ŋga Pita na pe nya ma kre, a wra kna mna yo pe pan mbo, "O wolo Israel ee, yira ŋgi ki tia kee ŋga e pe kawako ni ma ŋga hin? Ndee ŋgi ki tia e na o le haan ma na o jaŋga ndee o chichie ki tia blↄ ŋmba na nyaari ŋga hin? 13Abraham na Isaki na Jekↄb Nyiɛkpↄↄ wre, o lɛ Nyiɛkpↄↄ wre, wre u u pↄ Yesu ŋmba e na wↄ mu ŋga, a Pilato na u ŋga tamu mna chaa mbe u wa a e na je kre, u yɛnyiŋge kre yi. 14A yire na sumifun ŋmba u fraka mu pe cheche kre je, mna yo na linkufun e chaa. 15A ŋmaa-ŋgafun wre rɛ, a e na wre gbo. A wre Nyiɛkpↄↄ nyi mu yili kumu nu kre, a ki dansiɛlifɛɛnlɛ lɛ wre. 16A u mɛɛ kre, na shↄnlie ŋga kii wa u mɛɛ kre nu kre, kre ki blↄ ŋmba e chin ŋga ŋga faŋga, a e kro u nya mna fuŋgaami ŋga kre. Shↄnlie ŋga kii wa Yesu nu kre, kre ki u ŋga faŋga chiriri e yiɛ ŋga na kre. 17Kena fuŋgaami, ni wolo, ni chin na chiin e n ki chin, imi na e loplombo pre n ki chin kre. 18Kena imi Nyiɛkpↄↄ na yire u kee nyanyofɛɛnlɛ pre kro na, mna yo mu tɛɛ kre, ki pan ma yɛŋgɛ na Kristo wre we pan mbe kala nya tataara. 19Kena e e jawala chinɛ, e ndru e taa u kro, mbe Nyiɛkpↄↄ e sisam pↄ mbe laa e na. 20Na ki pan ma kre, o Tafun Nyiɛkpↄↄ wre we e ŋga wejinyiŋge tnimu, mbe u ti Kristo ŋmba wra wↄ mna e ŋga fa kre, mbe u pan. 21Wre u fna mbe kro nyjeeri wa mbe sɛ su nyjila ŋga nu Nyiɛkpↄↄ we u kee nyjɛ wra yire u kee nyanyofɛɛnlɛ chechee pre na mna yo mu tɛɛ kre pe fↄnyi kro. 22Mbose wra yo mbo, 'Nyiɛkpↄↄ kee nyanyofun ŋmba u pe na mi wi kre, wre e Tafun Nyiɛkpↄↄ we yire e nu mbe e ŋga. Wre pan ki fna mbe e ndie tɛɛ. U kee ŋga we yo e pan kro mbe e ki loo. 23A ndro ŋmba u nsra ndie tɛɛ wre Nyiɛkpↄↄ kee nyanyofun wre pan kre, pie ufun wre kla mbe yili Nyiɛkpↄↄ leele nu.' 24Mu yire Nyiɛkpↄↄ kee nyanyofun Samuel na mu pan mu su u kro wolo mblɛ pra pan kro kre, pra yire ble nyjɛ kee yo. 25A yire lɛ pre Nyiɛkpↄↄ kee nyanyofɛɛnlɛ pre na nyu ŋga Nyiɛkpↄↄ na yo e lɛɛlɛ pan mu tɛɛ kre biile, imi na wra yo Abraham pan kre mbo, 'Mu sele ndro na mbe yire mbe waŋgra ŋga leele kro dwan.' 26Kre ndra na, ŋga Nyiɛkpↄↄ na u Pↄ wre nyi kre, a wra klu mu u tun na u paan u ŋga dwamu ŋga kie e kna mbe yili e sisam pee nu kre."

will be added

X\