Nyiɛkpↄↄ Bitumblↄ Hlɛ 28

1Ŋga o na yili krↄ kre nu mna pan fimi na kre, bawa o na loo na kre epo lalaa tra kre mɛɛ Malta. 2Bawa leele pre na koroo ŋga ŋmbrↄ o n da mu nya tun tɛɛ mna o ŋga mmaŋge kama, mna kanhun gbɛɛri o pan, na nyiɛ paan a weere naa kuu ma. 3Bawa Pↄↄl na kejenyi yɛ koli na leni kanhun, jaa na wↄↄ wa yi nu, a ki gbɛŋgɛ na le u nu, a wra yili mu Pↄↄl kɛ nu na pɛli. 4Ŋga bawa leele pre na nya na wↄↄ wre pɛli Pↄↄl kɛ na ma kre, a pra kna na yuu peyɛ pan mbo, "Kafinɛ ma, linkufun wi blↄ ŋmba, hali ŋga u n ku epo kre lam ŋga na ki kɛ, yaka wa jaa ti u shↄ ŋga nu." 5A Pↄↄl na wↄↄ wre nyaara mna wa kanhun kre nu, hali yaka nsra u ta. 6A leele pre naa u le na we tintin, ndee we na foli mbra to titɛɛ kre nu wa mbra ku. A pra u le chiin na yaka n dona u taa, a kra tia pra ndru mna pe jawala chinɛ mna kna na yuu mbo, "Sɛɛn ka nyini wi kre." 7Mna o na nyi kre mbɛɛ na, tra yɛ naa wa wa mu pe ŋunu Publio wee, wra pe tra kre ŋunu. A wra o yii imi kra fna ble taarɛ. 8Kre nyjila kre, na kabro Publio lɛ gbun mu sniŋge nyuŋgo, a wraa shie kaan na. A Pↄↄl na le u kro, mna sɛ nyiɛtali mna u ŋga, mna kɛnyi taa u na, a yira kre na sɛ kuraa. 9Bawa tra kre leele mblɛ praa yaa kro na Pↄↄl kee loo, mna fɛ mna pan u lawee, a wra pe tra kro. 10Ŋga kra pan ma kre, pra o kɛ yirɛ tataara. Ŋga o na yo oo sɛ kre, a pra o ŋga yirɛ nyjɛ yira o shian kro. 11Nyiɛpↄ taarɛ kↄkrↄ kre, a o na Alɛksandria krↄ ka bali na pe Attae foto kan ki yiɛ, a kra pan mu weere nyjila kre li kre lↄↄ lalaa tra kre na. 12A o na sɛ yire Sirakusa na mna li wa ble taarɛ. 13Bawa o na yiri mna kna mna to Regio na. Ki nyisee na, a fuflɛ ŋga ki yirii tapanhaa kre na gbun. Ŋga nyiŋge na se kre, a o na sɛ le Putioli na mna tii krↄ kre nu. 14Bawa o na o wolo plɛ nya, a pra o tali na o tni pe jaara ble kↄↄnashin. Kena imi o naa lee Rom na yi kre. 15Kre nyjila kre, na o wolo mblɛ praa wa Roman kre o kee loo, mna pan mu kun mu o fni Apia jafa lawee. Kre nu a plɛ na o fni lawee ŋga praa yeeri "Wuuhaa Taarɛ" kre nu. Ŋga Pↄↄl na pe nya ma kre, a wra Nyiɛkpↄↄ ŋga mboo, a lɛɛ na nyjii u na. 16Ŋga o na le Rom na kre, sojae pre na Pↄↄl ŋga kolo, a wre na soja ŋmba u u le kre na sɛ lawee cha mu tni peyɛ. 17Ble taarɛ kↄkro kre, Pↄↄl na Judae loplombo pre yeeri. Ŋga pra pan mu fni kre, a wra yo pe pan mbo, "Ni wolo, la, ni n yaka pe mu o leele pre wa ndee mu o tolɛɛlɛ paala yire ka taan, nde pra je mna ni yii Jerusalɛm na mna le Rom leele kɛɛ. 18Ŋga Rom kalalifɛɛnlɛ pre na kee kre lele kre, kaa praa chaa mbe ni wa. Ŋgi na, na yaka n nyina na ki fna ni kumu pimi ta. 19A imi Judae leele pre naa paara na ni taanla kre ndra na, a ndaa ni jawala pe na mbe da waŋgra kro tafun yiɛ na mbe ni nyu wↄ. La, mi jawala nu kre, mi n kee ka ni mbe ni leele taan. 20Kena kre kee ŋga na ni e yeeri, na ni chaa mbe e nya mbe paara na e ni. Ŋgi na, ŋmba na Israel leele kaan kre ndra na pe yila mu jlↄnyi nyjɛ le ni kɛnyi na kre." 21A pra kna mbo, "Judae mblɛ pee wa Judea na kre pe n o nyunↄ mu kee ka tun, a o wolo Judae mblɛ pe yiri wa na paan mna kre, wa n da mu mu kefↄↄn ka yo o pan tun. 22Kena o chaa mbe mu jawala chin. Ŋgi na, Kristofɛɛnlɛ kuo ŋga rɛ, o chin na pe paara na ki taanla lawee kro nu." 23Ŋga pra ble le u pan a kra da kre, Judae pre na pan tataara mna fni u katoo wa. A wra pe nyina kee kre nↄↄ, mna na pe nyina Nyiɛkpↄↄ ŋunumu kre kee, mnaa paara mu yili Mbose mbra yire na Nyiɛkpↄↄ kee nyanyofɛɛnlɛ kee yire nu, na Yesu kee nyina mbe pe u shↄↄli. Wra yire bnimi mna sɛ su yilakↄŋgↄ. 24Kee kre wraa paara kre, plɛ na ki shↄnli, a plɛ na ki je. 25Ŋga pe kro nyu nsra fni kre ndra na, pra nyina. Kre nyjila kre, na Pↄↄl kee nunu ka yo pe pan mbo, "Kpra kee Kpra Ŋumu wre na yire Yisaia na mna yo e tolɛɛlɛ pan kre, 26mbo, 'Ni yo mu pan na sɛ yo leele pre pan na kee kre, ee ki loo, la yaa ki nↄↄ loo fio, ee kee kre nya, a yaa ki chin. 27Ŋgi na? Kre leele mblɛ ndie kan, a pe kala nↄↄ loohaa sheli. Pe peyɛ nyiɛlɛ tↄtↄ mu tni, mbe pia kee kre nya mbe ki loo na pe ndiile ni, mbe pe lolonyi tɛɛ mbe kee kre nↄↄ loo, mbaa chinɛ mbe ni waa pe tra.' 28Kena ni chaa mbe e chin na Nyiɛkpↄↄ ŋmaashↄmu kee kre, pe sɛ leele mblɛ pe n pe Judae pre ŋga ki yi, pre we ki loo." 29Ŋga Pↄↄl na kre kee ŋga yo kre, Juda leele pre na zaanri mna sɛ na peyɛ lii kakra tataara. 30A Pↄↄl na tni Rom na wa, wre titi lawee ŋga wra shↄ na ki fↄlↄ toni kre nu yɛlɛ shiin. A leele naa paan u lawee a wraa pe shio, 31mnaa Nyiɛkpↄↄ ŋunumu kre kee yuu, na o Tafun Yesu Kristo wre kee nyina, na jaŋga kro kro ni, a ndro nsra u tↄ kolo.

will be added

X\