Nyiɛkpↄↄ Bitumblↄ Hlɛ 27

1Ŋga pra bↄↄnri mu ta na ki fna o sɛ Italia tra nu kre, a pra Pↄↄl na leele mblɛ pra le nyuŋgo kre plɛ wↄ mna le sojae lopom ŋmba praa yeeri Julio wre kɛɛ. Julio na chaa sojae mblɛ pra wↄ pra waŋgra kro tafun sri kre nu. 2A o na tni Adramatio chia krↄ ka nu na ki shie Asia lawee yire nu. Ŋga o naa shie kre na Makedonia ndro Aristako ŋmba wra yiri Tesalonika na kree wa mu chaa o nu. 3Ŋga nyiŋge na se kre, a o na sɛ yire Sidon na. A sojae lopom Julio na Pↄↄl fooro chin mna u ŋga kolo na u sɛ le u nↄↄlↄ pan, mbe praa u le. 4Ŋga o na kↄ bawa kre, a o na le krↄ nu, na fuflɛ gbuun na o fnii, a o sɛhaa yiɛ na sheli. Kra tia o na tro Kipro tra kre kro epo yiɛ na. 5A o na tro Kilikia na Pamfilia tra mbɛɛ na mna pan mu tii Likia tra chia ŋga pe yeeri Mira kre na. 6Bawa sojae lopom wre na Alɛksandria chia krↄ ka nya na ki shie Italia tra nu, a wra o le ki nu. 7O na ble yɛ li epo yiɛ na, na waa jaa sɛ kpↄↄ, hali kra sheli mu o ŋga, a o na chin na mbra Knido chia na, a imi na fuflɛ kre naa gbuun na o fni ma kre, o na kna mna tro Kreta tra lawee ŋga pe yeeri Salomone kre mbɛɛ na. 8Pan o naa bublↄ na tro epo nyu kre na chɛchiɛri na tri mna chin mu pan mu su lawee ka praa ki yeeri, "Krↄ yirehaa", a kra mbra chia ŋga praa yeeri Lisea kre na. 9Ŋga pe nyjila tataara na tro, a pe yɛlɛ nyu ble kpↄↄ kre na tro kre, kra sheli mu pe ŋga, a Pↄↄl na paara mna pe nyina, 10mbo, "Bilɛ, ni ja mu chin na kanyana na yirɛ klaa wa o kolo nyaaraa ŋga nu yiɛ. Ki n pe o tuuro na krↄ ŋga chiin. La, wre titi ŋmaa na." 11La, sojae lopom wre nsra ndie tɛɛ Pↄↄl pan, fↄna ŋga krↄ kre lefun na ki tafun na yo kre bↄkↄ. 12Ŋga pra nya na krↄɛ yire yirehaa kre n nyu chiriri mbe pe jaa tni wa weere nyjila kre ndra na, pe nɛɛrɛ naa chaa na pie gbeŋmba na aada pie jaa sɛ Finike chia, Kreta tra ŋga nu krↄɛ naa yire kre nu, kena mbe pra sɛ weere ble yire li wa. Krↄɛ yirehaa kre nyu naa shiin, a yi kro naa wa yila finhaa. 13Ŋga tapanhaa fuflɛ kre naa gbuun fiɛnfiɛn kre, pra jawa na pe ŋga pe chaa ta. A pra krↄ kre saan mna tro Kreta tra mbɛɛ na. 14Titɛɛ kre nu to a fuflɛ kre na ndru mu saŋa mu yiri nyjeeri Kretahaa na gbuun badaaŋga. 15Imi na kra krↄ kre yii kre, ki nsra ja mbe sɛ yiɛ na, a o na oyɛ wa, a fuflɛ kre naa shie na o ni. 16A kra sɛ tro na o ni lↄↄ lalaa tra fiɛn ka kro praa ki yeeri Kauda, bawa o na gbeŋmba mna chin mu ja mu krↄ fiɛn ŋga kraa wa o kro kre pↄ chiriri. 17Ŋga o na ki yire nyjeeri kre, a o na kolo cha mna krↄ kpↄↄ kre pↄ tapan, a na o naa fiɛ na oo sɛ to tanyiɛ kre na, kre ndra na, a o na ki yoŋgo kre saan a fuflɛ kre na ndru na shie na o ni. 18Imi na fuflɛ kre na nyumu kre naa o mↄŋↄi kpↄↄ ma kre, ŋga nyiŋge na se praa pe yirɛ woni na waa lↄↄ lam. 19Ki ble taarɛ ble kre, na yira ŋga na pe kɛ we to krↄ kre lam kpan na waa pe ki wa. 20Ŋga o na li ble tataara na waa yila na wↄɛlɛɛ nya kre, a fuflɛ ŋga kraa gbuun kre n na pe yira fiɛn kre, o jawala kro na kla, a o n na chin na ŋmaafɛɛnlɛ lɛ wre na. 21Ŋga kra da ble tataara na pe n yaka le nyuu kre, a Pↄↄl na yiri mna yire pe lalaa mna paara pe pan mbo, "Bilɛ, ki fna mbe e na klu mbra ni nyu kee kre ndaa yo kre loo, mbe waa na yili Kreta na mbra paan kala ŋga nyini nya mbra o yirɛ waafun imi. 22Fuŋgaami, ni e tali, e e gbun yii, wa ŋmaa wa fun, fↄna krↄ ŋga. 23Aŋge blee, Nyiɛkpↄↄ ŋmba wo wi mi a ndaa u sumi kre bituŋu na pan mna yire ni mbɛɛ na mna yo ni pan, 24mbo, 'Pↄↄl, maa shia fiɛ, fna ki fna mbe mu yire waŋgra kro tafun yiɛ. Le, Nyiɛkpↄↄ mu ŋga leele mblɛ ŋu na pree wa krↄ ŋga nu ŋga kro.' 25Kena bilɛ e eyɛ gbun yii, ni Nyiɛkpↄↄ shↄnli na ŋga ni loo kre we pe ma. 26La, ni chin na oo sɛ to lↄↄ lalaa tra ka na." 27Kra da kranu shiin, na oo wa Adria epo kre yiɛ na, na shie na paan. Kie pe ndroo ka, a krↄ kre brifɛɛnlɛ naa jawa na o dani tra lawee ka nu. 28A pra maŋa wa lↄↄ kre nu, mna ki jiom chin, na kie pe yaadi fuloee shiin, a pra sɛ yiɛ chiɛri na, mna ndru mu maŋa fↄŋgↄ wa na, na kii yaadi fulo na kɛ. 29Ŋga kra pan ma kre, pra jawa na aada pie sɛ krↄ kre sin dnɛ na kre ndra na, a pra srugue kpↄɛ jijirɛ wa lↄↄ mna tɛɛ mu krↄ kre yii ki nↄↄhaa wa, mna na nyiɛtali mbe nyiŋge se. 30Ŋga krↄ kre brifɛɛnlɛ pre naa chaa mbe fɛ kre ndra na, a pra krↄ fiɛn kre saan mna wa lↄↄ, mbo, pe shie mbe sɛ srugue wa ki yiɛ mbe ki yii. 31A Pↄↄl na yo sojae lopom wre na sojae mblɛ praa wa wa kre pan mbo, "Na leele mblɛ n tni krↄ ŋga nu kre yaa shia jawa na ee ŋmaa ta." 32To, a sojae pre na krↄ fiɛn kre mɛnyi yire knumu, a krↄ fiɛn kre naa shie ki yɛ. 33Ŋga nyisee nyu naa dani kre, a Pↄↄl na yo pe pan na pe yɛyɛ chaa le nyuu mbo, "Ble nununu kɛmbↄjijirɛ yi kre na e na yaka le nyuu, na pan e jiin. 34Kena ni e tali na e yɛyɛ cha e ka, kie ti mbe e faŋga ta. Ni yuu e pan na hali e wa nyjuro nunu chom kuraa wa kↄ mbe to." 35Ŋga Pↄↄl na yo ma kre, a wra paanu bali mna Nyiɛkpↄↄ ŋga mboo leele pre yiɛ na mna ki peeri na kaa. 36A pe lam na chin mu nyjii pe na, a pra yɛyɛ cha mu ka. 37Na wre leele mblɛ oo wa krↄ kre nu kree leele lafɛɛ shiin na fuloe taarɛ na kɛmbↄkↄↄnanu. 38Ŋga pra li mna kↄ kre, a pra sro yire kuɛn yire wↄ mna wa lↄↄ kre nu, a krↄ kre na pe foofoo. 39Ŋga ndram na saan kre, na tra ŋga na pe da kre, na pe n ki chin. A pra tanyiɛ lawee ka nya epo kre nyu na, mna jawa na ki fna mbe pe lawee cha mbe sɛ yire tanyiɛ kre na. 40A pra srugue yire saanla mna wa epo kre nu, mna ki yira ŋga ni praa ki yiɛ kna kre mɛnyi yire saanla, mna krↄ kre yoŋgo kre yire mu fuflɛ kre ŋga a kraa pe ŋunↄ na shie tanyiɛ kre na. 41A krↄ kre na hɛ sin tanyiɛ yɛ na lↄↄ lam wa, a ki yiɛ na tii mna nyjira hali ki nsra ja mbe jↄŋgↄ. A imi na epo kre naa kani na woni ki nↄↄ kre na kre, kra tia kra knumu kro. 42Kra tia sojae pre na jawa na ki fna mbe pe leele pre pe yii na shie kre gbo gbo, na kre ma, plɛ waa to lↄↄ mbe blu mbe sɛ. 43A na sojae lopom wre naa chaa mbe Pↄↄl shↄ kre ndra na, wra tia pra pe ti. A wra yo pe pan na mblɛ pie jaa blu kre pe blu mbe yili fimi na. 44A hamblɛ plɛ na sni taaboe na, a plɛ na tni tni krↄ kre knumɛɛ yɛ na mna kun. Kena imi kra nyi a o na ŋmaa ta mna kun fimi na yi kre.

will be added

X\