Nyiɛkpↄↄ Bitumblↄ Hlɛ 26

1A Ŋunu Agripa na yo Pↄↄl pan mbo, "Mu jaa yiri paara." A Pↄↄl na u kɛ yire, mna u nyu wↄ. 2Mbo, "Ni chin na ni nyiɛnyↄↄrↄ yi na kee nyjɛ Judae taa ni na krɛɛrɛ, mbe yi nyu wↄ ŋu tolɛɛ Agripa yiɛ. 3Yaka ma. Ŋu titi kuraa mu Judae paala kolo kro, na nyjɛ yi mbra taanri kro chin. Kena ni mu tali mbe mu frↄ tɛɛ mbe ki loo. 4Imi na ni nyi mu yire ni bimi mu yire nyjila ŋga nu ndaa wa ni waŋgra nu, na imi ndaa nyi Jerusalɛm na kro, Judae kro ki chin. 5Ŋga pe ni chin ki mu paa, na pre titi we kpra yo rɛ, ni tnimu nu kre, ndaa chaa leele mblɛ praa lii o mbra kolo paa na kre nu, a ni kepele kro na nyina na Farisii ndro wi mi. 6Kena fuŋgaami ŋga kala ŋga ni ta yi na, nii wa na nyu kee ŋga Nyiɛkpↄↄ na yo mu tɛɛ o tolɛɛlɛ pan kre sri. 7Kre dankna ŋga na Israel sele kɛmbↄshiin pre sumi chiin lafo na blee na pie ki ta. Kena kre dankna ŋga ndra na Judae kala ŋga taa ni na kre. 8Kena ŋgi ki tia a e wa na wa n ki shↄnli na Nyiɛkpↄↄ gboolo nyini ŋga hin? 9Kraa wa na ki fna mbe ni kenɛɛrɛ pe mbe Yesu Nazrɛt ndro wre mɛɛ kla. 10A yɛŋgɛ na, ndaa ki pe ma Jerusalɛm na, ŋga ndaa jaŋga ta mna yili sↄfue loplombo pre pan kre, ndaa ja mu sumifɛɛnlɛ pre tataara yii mu le nyuŋgo. A na pe yo pie pe gbo, ni nyu naa wa ki nu. 11Ndaa shie na sumifɛɛnlɛ pre fiŋge Judae fninyinyi yire nu mna tia praa jiɛnlɛ kee kuraa yuu na Nyiɛkpↄↄ taanla. Imi na ni krↄ na kun na pe ni mu da kre, ndaa ja na pe fiŋge mbe sɛ su haka wolo tra nu. 12Kre kee ŋga nunu chↄↄ kraa shie na ni ni Damasko na. Na sↄfue loplombo pre ni ŋga jaŋga na kolo a ndaa shie wa. 13Na kie pe lafo chrichri ka na, tolɛɛ, a lawee na nyi mu yiri nyjeeri mu pan mu ni kun mu le, kraa nyaa mu wɛ yila na. 14A o kro na foli mu to to tra, bawa ndaa loo na mana ka paara ni pan Hebrie kayolo nu, mbo, 'Saul, Saul! Mni a mu ni pra ma hin?' Mbo, 'Mu n chin na, na mu ni pra kanyana mu chaa na muyɛ kaan ra?' 15A ndaa kna mu wie na, 'Ŋu wi ŋmbi hin, ni Tafun?' A mana kre na kna mbo, 'Mi wi Yesu ŋmba mu pra kre. 16Yiri mu yire sholo. Ni chaa mbe mu ni sumi mbe ni dansiɛrɛ li, imi na mu ni nya na imi na mbe niyɛ wↄↄ mu nyina ŋga. Kre na ni yila mu yili mu yiɛ na kre. 17A mbe mu shↄ mbe yili Judae, na leele mblɛ pe n pe Judae mblɛ nu mbe mu tun kre kɛɛ. 18Mbe mu sɛ pe nyiɛlɛ nyaa mbe pe yili wↄmu nu mbe pan ndram fiŋge nu, mbe pe yili Sutna wre jaŋga kre nu mbe tnihaa ta leele mblɛ Nyiɛkpↄↄ wↄ peyɛ na kre nu. Shↄnlie ŋga pie ni shↄↄli kre na.' 19Kena Ŋunu Agripa, ni nsra ndikana pe kee kre ndaa nya nyiɛlɛ na kre na. 20Ki tia ndaa klu mu u kee kre yo Damasko na, mna chin mu sɛ Jerusalɛm na, mna tro Judea na, mna chin mu sɛ ki yo leele mblɛ pe n Judae pre pan, na pe pe jawala chinɛ mbe taa Nyiɛkpↄↄ kro, mbe jawala chinɛɛ kee pe. 21Kre kee ŋga ndra na Judae pre na yila mna sɛ ni yii pe suminyuŋgo wa mnaa ni chaa mbe gbo kre. 22A ŋga Nyiɛkpↄↄ wa ni kro kre ndra na, kre ki tia ni ŋmaa ta mu yire mna kre, na u dansiɛrɛ lii biile na loplombo yiɛ, a ki n pe kewaara ka, fↄna kee nyjɛ Nyiɛkpↄↄ kee nyanyofɛɛnlɛ na Mbose na yo mu tɛɛ na yie paan tro kre bↄkↄ. 23Imi na Kristo ŋmba Nyiɛkpↄↄ wↄ, wre fna mbe kala nya tataara, na ŋga we kluu nyi mbe yili kuulo nu kre, mbe ŋmaashↄmu kee kre yo mbe Judae na mblɛ pe n pe Judae pre nyina." 24Ŋga Pↄↄl na paara a u nyu na to ma kre, a waŋgra lopom Festo na yiri mna fuu Pↄↄl na mbo, "Pↄↄl tↄↄlↄ mu tↄↄlↄ ra? Mu hlɛ twan tataara, kre tia mu yiɛ n to." 25A Pↄↄl na kna mbo, "Lopom Festo, ni n na tↄↄlↄ, la, ni kpra na ni yiɛtom kee titi ni yuu kre. 26Ŋunu Agripa ŋmba pan ni gbun ta na paara ŋga kuraa kee nyjɛ krɛrɛ chin. Ni shↄnli na kee nyjɛ krɛrɛ ka n fun u yiɛ na. Yaka na ma. Ki ka n wa mna pe wↄmu nu. 27Ŋunu Agripa, kena mu Nyiɛkpↄↄ kee nyanyofɛɛnlɛ pre kee yire shↄnli ŋgaa? Ni chin na mu pe shↄnli." 28A Ŋunu Agripa na kna mu yo Pↄↄl pan mbo, "Mu chaa mbe ti ni kaari Kristo ndro fuŋgaami?" 29A Pↄↄl na kna mbo, "Na fuŋgaami yi o, na mbakↄ yi o, ni Nyiɛkpↄↄ tali, ni n yo ŋu chiin na, la, kaa mbe mblɛ pe fni na kee ŋga ndru aŋga ŋga kro we na pe na mi wi, fↄna jlↄnyi nyjɛ yii wa ni kɛnyi na ŋga chiin." 30Bawa waŋgra lopom Festo wre na ŋunu Agripa wre, na Bernike na leele mblɛ praa wa mu ya pe na kre na yiri, 31mna yili fimi na mna sɛ bↄↄnri mbo, "Ndro ŋmba u n kee ka pe a ki pe kumu ndee nyuŋgo lee kee." 32A Agripa na kna mu yo lopom Festo pan mbo, "Na kra pe na u nsra kee kre kna mu waŋgra kro tafun ŋga kre, oo na jaa u wa."

will be added

X\