Nyiɛkpↄↄ Bitumblↄ Hlɛ 25

1Ŋga waŋgra lopom Festo na le u tra nu kre u ble taarɛ ble na kre a wra yiri Kaisaria na mna sɛ Jerusalɛm na. 2A sↄfue loplombo pre na Judae loplombo pre na Pↄↄl kee krɛrɛ yo u pan. 3A pra u tali na u ya pe na, mbe ti pe pan na Pↄↄl ni Jerusalɛm na, kena praa chaa mbra ndra kolo mbe Pↄↄl gbo. 4A Festo na kna mbo, "Pↄↄl wa Kaisaria na, a kia mu mbe ni ndruu sɛ wa. 5Kena e ti mbe mi na e loplombo pre plɛ sɛ kena na yire na wree wa klaa ka ni rɛ, pie ki yo." 6Kie pe ble kↄↄnataarɛ ndee ble kɛ yɛ kↄkro kre, waŋgra lopom Festo na ndru mna sɛ Kaisaria na. Ŋga wra le a nyiŋge na se, a wra tni u kala li jↄↄn na mna tia pra sɛ pan na Pↄↄl ni. 7Ŋga Pↄↄl na pan kre, a Juda leele mblɛ pra yiri Jerusalɛm na mna pan wa kre na pan mu u fɛ mu kun, na kekpↄɛ nyjɛ nↄↄ pia jaa nyina kuraa yuu na u taanla. 8A Pↄↄl na u nyu wↄ mbo, "Ki n pe punu ni punu Judae mbra na, ndee Judae suminyuŋgo kre ndee Romae abani na ni kee fↄↄn ka taa." 9Ŋga Festo naa chaa mbe yɛnyiŋge ta Juda leele pre pan kre ndra na, a wra kna mna yo Pↄↄl pan mbo, "Mu chaa mbe ni sɛ mu kee kre taa mbe li Jerusalɛm naa?" 10A Pↄↄl na kna mbo, "Waŋgra kro tafun, kalalifɛɛnlɛ yiɛ ni yire kre, a mna ki fna mbe mu ni tam na ni pimi kun, nde Juda leele pre, ni n pe pe sisaa ka, imi na ŋu titi kuraa ki chin kre. 11Kena na lewo sisaa wi mi, a ni kee ka pe a ki fna kumu ni kre, pe ni gbo. A na kee nyjɛ pe taa ni na nyjɛ krɛrɛ n pe kpra kee kre, ndro wa jaa ni wruu le pe kɛɛ. Kena sɛ na ni kee kre ni waŋgra kro tafun wre pan." 12A waŋgra lopom Festo na u loplombo pre na ki jawa na, na u yo na waŋgra kro tafun pan u chaa mbe u kee kre li waa, kena ki fna u sɛ wa. 13Ble yɛ na tro, ki ble ka, a ŋunu wa praa u yeeri Agripa na le, na u jaa Benike ni, mna pan mbe Festo ŋga mmaŋge. 14Pra mu wa, a kra tia wra Pↄↄl kee kro yo pe pan mbo, "Blↄ waa wa ni pan mna, a Felike na u ti nyuŋgo mna sɛ, mu u kee ti ni pan. 15Ki ble ŋga ndaa sɛ Jerusalɛm na kre, sↄfue loplombo pre na loplombo pre na u kee yo ni pan mna ni tali na ni u kee li mbe u taan. 16A ndaa yo pe pan na Romae paala n nyina ma na mu ndro gbun pimi ni nyjila ŋga nu wre na mblɛ pe kala ta kre n fni mu paara. 17Ki tia ŋga pra pan mna le mna kre, ni nsra tia kee kre na mu. Ki nyisee na ndaa sɛ kala lihaa wa mna tni kala li jↄↄn kre na mna tia pra sɛ pan na Pↄↄl wre ni. 18A ŋga wre na mblɛ pra kala ta kre na pan mu fni kre, pe nsra kee chiriri ka ta mna u taan imi na ndaa ki jawa kre, 19la, pre na Pↄↄl na pre titi sumiɛ kre kakra li, a shiin wo na mbo blↄ wa, u mɛɛ naa Yesu a wra ku, a Pↄↄl naa u kee yuu na u ndru mu nyi. 20Hali ni n chin imi na mbe kre kee ŋga yo, kra tia ndaa u wie na we ti pe sɛ u kee kre taa mbe li Jerusalɛm na wa ree mni hin? 21A wra je mbo pe u ti nyuŋgo wa mbe sɛ su nyjila ŋga nu we sɛ waŋgra kro tafun yiɛ na. Ki tia ni tia pe u ti wa mbe sɛ su ŋga mbe leele cha mbe pe sɛ na u ni Kaisari pan." 22A Agripa na kna mu yo Festo pan mbo, "Mi titi chaa mbe u nyu kee loo." A wra kna mbo, "Na nyiŋge se mu u nyu kee loo." 23Ŋga nyiŋge na se kre, Agripa na Benike na peyɛ kna, imi ki fna, mna pan kala li lawee wa, pre na sojae tafɛɛnlɛ pre na chia loplombo titie pre ni. A waŋgra lopom Festo na tia pra sɛ pan na Pↄↄl ni. 24Bawa waŋgra lopom Festo na kna mbo, "Ŋunu Agripa, na yire mblɛ e fni mna kro, blↄ ŋmba kee ni Juda leele kro na pan ni pan Jerusalɛm na, mu ndru mu pan Kaisaria na, ni ti mbe pe u gbo kre, wre wi kre. 25A mi titi ki nya na u n kee ka pe a ki fna mbe u kumu ta. A na wre titi kee kre wↄ na shie waŋgra kro tafun yiɛ na, ki tia ni yo na mbe ti pe sɛ na u ni wa. 26La, ni n u kee kpiki ka ta, ŋga mbe nyunↄ mbe sɛ ni tafun ŋga. Kre ndra na ni pan na u ni e yiɛ, na ŋu titi tolɛɛ Agripa yiɛ na, imi kie pe na o u wie wie na, aada mbe kee ka ta mbe nyunↄ. 27Mi pan kre, ki n kolo ni na mu yo pe sɛ na nyuŋgo lefun ni haka, a ma u kee chiriri ka ta mbe nyina."

will be added

X\