Nyiɛkpↄↄ Bitumblↄ Hlɛ 24

1Ki ble kunↄ na, a sↄfu lopom Anania na loplombo pre na chuami wa praa u yeeri Tutulo, na le, mna pan mu kala ŋga ki pre na Pↄↄl ta krɛrɛ wa waŋgra lopom wre yiɛ. 2Ŋga pra Pↄↄl yeeri mu pan kre a Tutulo na yiri mna paara mu Pↄↄl taan, mbo, "Ni Tafun, ŋu saara na o wejinyiŋge ta tataara, a kee kro na shie kama o waŋgra ŋga nu. 3Felike chichie, lawee kro nu kolo kro na kre, o ki shↄ na mboo ni tataara. 4La, ni n na chaa mbe ni kee tnu, ni kee fiɛn ŋga na ni chaa mbe mu ndie tɛɛ. 5O blↄ ŋmba nya na u pe ndro ŋmba u pe kala chafun, na paan na kala ni Judae mblɛ pee wa waŋgra ŋga nu kro lalaa, a wre wi Nazrɛt kuo kre lopom. 6Mnaa chaa mbe o suminyuŋgo kre tↄ na nɛɛrɛ ni, a o na sɛ u yii mnaa chaa mbra u kala li o mbra kolo na. 7A sojae tafun Lisia na pan mna u shↄ o kɛɛ jaŋga na. 8Mna yo o pan na o pan mu yiɛ na na, mbe paan kee kro yo. Na ŋu titi u wie kuraa mu chin ŋga ki o ta." 9A Juda leele mblɛ pra fni wa kre krɛrɛ na yo na kee nyjɛ Tutulo yo kre yi pe kpra. 10Ŋga waŋgra lopom wre na kɛ wa Pↄↄl pan na u paara kre, a wra kna mbo, "Ŋga ni chin na ŋga mu yiri mu pe waŋgra ŋga lopom na ki kpra kunfun, a ki mu ŋga ndra na, ki tna ni pan na mbe paara. 11Mu jaa chin na ŋga ni sɛ Jerusalɛm na sumihaa kie pe ble kɛmbↄshiin yi kre. 12A ni nsra pan na kanyaa kee ndee kakrↄ kee ka ni Judae suminyuŋgo wa ndee pe fninyuŋgo ndee chia lam. 13A pia jaa mu nyina kpiki kala ŋga ki o ta. 14La, kee nunu ŋga ni nya yi na, kolo ŋga pe ŋga mɛɛ mbo, kuo kre, kre na ni taa na o tolɛɛlɛ Nyiɛkpↄↄ wre sumi, mu na lii mbra kee nyjɛ Nyiɛkpↄↄ kee nyanyofɛɛnlɛ na nyunↄ mu tɛɛ kre na. 15A ni Nyiɛkpↄↄ shↄnli, imi na pe shↄnli na kunnyiɛ wa na mblɛ pe fraka na mblɛ pe n fraka kro sri kre. 16Kre na, ni niyɛ dↄↄtaa na mba kee ka na ki nyini pe Nyiɛkpↄↄ ndee lewo na, mbe ki waa pe sisaa ni pan. 17Kena yɛlɛ yɛ kↄkro ŋga ndaa yili Jerusalɛm na kre, ndaa ndru mna pan Jerusalɛm na wa na, mbe paan pe ŋga swa nyjɛ pe pe kɛ. Mbe ni sra wↄ mbe Nyiɛkpↄↄ ŋga. 18Kena kre nu pra ni nya Judae suminyuŋgo wa na ni cheche paala kre pini. Ni n na le na lenɛɛrɛ plɛ ni wa, a ni nsra pan na kakrↄ ni wa, fↄna Judae plɛ pra yiri Asia tra na mnaa wa wa. 19Na mi na pree wa na kala ni kre, pe fna mbra pan mu yiɛ na mna, mbra paan ki yo. 20Kena ti mbe leele mblɛ pee wa mu yire fuŋgaami ŋga paara, na ŋga kalalifɛɛnlɛ pre na ni kee li kre, kefↄↄn ŋgi pra nya na ni pe hin? 21Fↄŋga nyjila ŋga ni ndaa wa mu yire pe lalaa mna fuu mu yo na 'kunnyiɛ shↄnlie ŋga ni ta kre kala ni ta e lalaa ŋga kre bↄkↄ.' " 22Imi na waŋgra lopom Felike na kolo fↄŋgↄ ŋga kee Pↄↄl naa yuu kre chin kama kre ndra na, a wra tia pra zaanri mbo, "Na sojae tafun Lisia wre waa pan kre mbe kee kre kpra kun." 23A wra Pↄↄl wru mna u le sojae lopom wre kɛɛ na u sɛ u tɛɛ chichie, mbo, "Na u nↄↄlↄ chaa mbe paan u le kre, pia shia pe tↄ kolo." 24Kie pe ble yɛ kↄkro kre, Felike na u chↄ Drusila ŋmba wra pe Juda ndro wre na pan mna tia pra sɛ Pↄↄl wↄ nyuŋgo mu pan, a wraa shↄnlie ŋga kii wa Yesu Kristo nu kre, kee yuu na pe nyina. 25Ŋga Pↄↄl naa cheche kee, na yɛyie na waŋgra nyukↄↄrↄ kala lie kee yire yuu kre, fiɛrɛ na Felike yii, a wra yo Pↄↄl pan mbo, "Sɛ tun, na ndaa kↄ mu kolo ta mbe mu yeeri." 26Felike naa jawa na Pↄↄl we u dↄli na swa ka ni, kra tia wra ja na u yeeri mbe wre na wre paara. 27Ki yɛlɛ shiin kↄkro na kre, a pra tia Pokio Festo na pan mbe tni waŋgra lopom Felike titɛɛ, a ŋga Felike naa chaa mbe Judae leele na u kee chaa kre ndra na, a wra tia Pↄↄl na kro nyuŋgo wa.

will be added

X\