Nyiɛkpↄↄ Bitumblↄ Hlɛ 23

1A Pↄↄl na yiɛ kan kalalifɛɛnlɛ pre na mna kna mbo, "Ni wolo, lam nunu ni, ni tni ni Nyiɛkpↄↄ katoo mu pan mu su aŋga na." 2Ŋga wra yo ma kre, a Anania, pe sↄfu lopom wre na kna mna yo leele mblɛ praa wa mu yire Pↄↄl mbɛɛ na kre pan na pe u nyu gbun, mbe u kee kre yoo ti. 3A Pↄↄl na kna mu yo Anania wre pan mbo, "Ŋu Nyiɛkpↄↄ we gbun, ŋu yiɛnyumufun. Ŋu mu tni mu yo mu ni kee li mbra kolo na. A mbra n kolo ŋga na mu ti pe ni gbun." 4A mblɛ praa wa wa kre na kna mu u wie mbo, "Pan ki fna mbe mu paara Nyiɛkpↄↄ sↄfu paan?" 5A Pↄↄl na kna mbo, "Wolo, ni n chin na sↄfu wi. Ŋgi na, pe ki nyunↄ mu yo na ki n fna mbe mu kefↄↄn yo mu lopom na." 6Ŋga Pↄↄl na chin na leele pre plɛ pe Sadukie leele, a pe plɛ na pe Farisiie leele kre, a wra kna mna yo kpↄↄ leele pre nu mbo, "Ni wolo, Farisiie ndro wi mi, pre pe ni se, a ni kunnyiɛ kee kre shↄnli, kre kala ni ta kre." 7Ŋga Pↄↄl na yo ma kre, kra pan na kala ni Farisiie leele pre na Saduki leele pre lalaa, a lenɛɛrɛ pre pra fni wa kre na peyɛ yↄ shiin. 8Ŋga kra tia rɛ, Sadukie leele pre naa yuu na kunnyiɛ ndee Nyiɛkpↄↄ bituŋu ndee Ŋumu ka n wa haka, a Farisiie leele pre, pre na yire krɛrɛ shↄnli. 9Paaraa kre na wɛ kuraa, a Farisiie leele pre nyinafɛɛnlɛ pre na yiri mna paara mbo, "O n sisaa ŋga blↄ ŋmba pe nya, ŋmbi u chin na Ŋumu ndee Nyiɛkpↄↄ bituŋu u paara ma u pan hin?" 10Ŋga paaraa kre na kↄ mu le kakrↄ nu kre, fiɛrɛ na sojae tafun wre yii na pie kↄↄ Pↄↄl tinii knumu, a wra tia sojae na tii mna sɛ u shↄ pe pan jaŋga na mna pan sojae pre lawee wa. 11Ŋga ble na wↄ kre, o Tafun wre na pan mu yire Pↄↄl jaara mna yo u pan mbo, "Pↄↄl, muyɛ gbun yii, imi na mu ni dansiɛrɛ lii Jerusalɛm na mna a ni nya ŋga, pan ni chaa mbe mu sɛ ki li Rom na." 12Ŋga nyiŋge na se na kre, Juda leele pre plɛ na sɛ peyɛ nya mna da mu peyɛ ŋga na pia yaka le nyuu mbe sɛ su na pie Pↄↄl gbo. 13Leele mblɛ pra kre nyu nunu kre pe kre na wɛ leele fuloe shiin na. 14A pra sɛ pe loplombo na sↄfue loplombo pre pan, mna sɛ yo pe pan mbo, "O da mu oyɛ tↄ na waa yaka le nyuu, fↄŋga o Pↄↄl gbo. 15Kena yire na kalalifɛɛnlɛ pre, e sɛ yo sojae tafun wre pan mbe pe u tree paan e ŋga, mbe e pe na paan e paan mbe u kee kre wie chiriri. Wre naa daa mna kre, na o u gbo fuŋga ma." 16Kee kre nyu pra le kre, Pↄↄl jaa pↄ wa na ki loo mna sɛ ki yo u pan sojae lawee wa. 17A Pↄↄl na sojae loplombo pre wa yeeri mna yo u pan mbo, "Sɛ na nyanyjɛble ŋmba ni e lopom wre pan, uu wa kala ka ni mbe yo u pan." 18A blↄ wre na u bali mna sɛ na u ni sojae tafun wre pan, mna yo u pan mbo, "Pↄↄl, ŋmba uu wa nyuŋgo kre, u ni yeeri, mu ni tali na ni pan na nyanyjɛble ŋmba ni mu pan mbo, 'Kee kaa wa u pan mbe u yo mu pan.' " 19A sojae tafun wre na sɛ na pↄ wre ni mbɛɛ ka na, mna u wie mbo, "Yira ŋgi kee mu chaa mbe yo ni pan hin?" 20A wra kna mbo, "Juda leele pre yo pie paan mu tali baŋga mbe mu ndru mbe sɛ na Pↄↄl ni kalalihaa wa, mbe pe peyɛ pe na u wie haa pe shie chiriri. 21Maa shia pe kee kre loo, pe plɛ peyɛ nya, na Pↄↄl sri, pe wɛ bilɛ fuloe shiin na. A pe sɛ da mu sↄfue loplombo pre ŋga na pia yaka le nyuu kuraa mbe sɛ su ŋga pie Pↄↄl gbo. Ki tia pee wa na mu sri, na mu pe ŋga ki kolo." 22A sojae tafun wre na nyanyjɛble wre wa kolo mbo, "Maa shia ti mbe ndro loo na mu kee ŋga yo ni pan." 23A wra sojae loplombo pre shiin yeeri mna yo pe pan mbo, "E sɛ sojae lafɛɛ shiin wↄ, na soolo nduufɛɛnlɛ fuloe taarɛ na kɛ, na snimi wafɛɛnlɛ lafɛɛ shiin ni mbe pe peyɛ kna mbe sɛ Kaisaria na ble ŋga, na ki gbun nyjila kↄↄnajirɛ. 24Mbe e soolo plɛ san, mbe Pↄↄl nduu mbe e sɛ na u ni chichie mbe sɛ waŋgra lopom Felike ŋga." 25A wra hlɛ nyunↄ mna pe ŋga na pe sɛ waŋgra lopom wre ŋga, mbo, 26"Mi Klaudio Lisia pan hlɛ ŋga yiri, na shie waŋgra lopom chichie Felike pan, shaaraa yi. 27Blↄ ŋmba Juda leele sɛ yii mnaa chaa mbe u gbo a ndaa loo na Romae ndro wi mna sojae wru mna sɛ u shↄ. 28A ndaa chaa mbra kee ŋga nunu ndra na pra yila na u chaa mbe gbo kre chin, kra tia ndaa sɛ na u ni pe kalalihaa. 29Bawa ndaa nya na pe mbra yire kee ka na pra u yii. Pe nsra kee ka ta mu taa u na a ki fna u ku ndee mbe sni nyuŋgo. 30Fuŋgaami ŋga ni loo na leele plɛ nyu le na u chaa mbe gbo, ki tia ni yo pe da na u ni mu pan wa, a ni yo mblɛ wre na pre kala ta kre pan na pe pan mu yiɛ na, mbe ŋga ki pe ta kre nyina." 31A sojae pre na Pↄↄl bali mna sɛ, imi na pra yo pe pan na pe pe kre. A pra sɛ su na u ni Antipatri na ble kre. 32Ŋga nyiŋge na se kre, a mblɛ praa nyaari tra kre na ndru pe kro, mna soolo tnifɛɛnlɛ pre chiin ti na pe sɛ na u ni. 33Ŋga pra le na Pↄↄl ni Kaisaria na kre, a pra sɛ hlɛ kre wↄ mna le waŋgra lopom wre kɛɛ mna Pↄↄl wru mu u nyina. 34Ŋga waŋgra lopom wre na hlɛ kre tↄↄnri mu kↄ kre, a wra Pↄↄl wie kokoo ŋga na u yiri, a wra yo na Kilikia na u yiri. 35Ŋga wra loo ma kre, a wra kna mbo, "Na ŋu na mblɛ e kala ta kre waa pan, kre mbe mu kee kre wie." A wra tia pra sɛ Pↄↄl tɛɛ Ŋunu Hɛrodi katoo ŋga wra sin kre nu, na u sri.

will be added

X\