Nyiɛkpↄↄ Bitumblↄ Hlɛ 22

1Mbo, "Ni wolo, na ni lɛɛlɛ, e jande, e loo ni pan mbe ni ni nyu wↄ mbe e loo." 2Ŋga leele pre na loo na u Judae yolo yuu kre, a pra taa mu pieri komm na ndru. 3A wra kna mbo, "Mi, Juda ndro wi mi, a pe ni se Tarso na, Kilikia tra nu. A Jerusalɛm na mna Gamaliel u ni pↄↄri, mu ja mu ni nyina, a ni o tolɛɛlɛ paala yire kro twan imi na ki fna. A ni yiɛ na nyina Nyiɛkpↄↄ tnumu na, imi e pini ŋga chↄ. 4Ndaa Yesu sumiɛ ŋga nu ni nyi ŋga fun kuraa. Na ki leele kuu, mna na bilɛ na chiɛlɛ kro yiri a praa shie na pe leni nyuŋgo, 5hali Judae sↄfu lopom na chia loplombo kro we ni dansiɛrɛ li. Pre loplombo pre pan ndaa sɛ hlɛ shↄ mbe sɛ o wolo ŋga. Mnaa shie Damasko na mbra sɛ sumifɛɛnlɛ mblɛ praa wa wa kre yii mbra pan na pe ni Jerusalɛm na mbe pra pe ndie tini. 6Ŋga ndaa shie mna chaa le Damasko na, titɛɛ kre nu na lawee nyi mu yiri nyjeeri mu ni kun mu le, 7a ndaa foli mu to tra, mna loo na mana ka ni yeeri mbo, 'Sↄↄl, Sↄↄl, mni a mu ni pra ma hin?' 8A ndaa kna mu wie na, 'Ŋu wi ŋmbi hin, ni Tafun?' A mana kre na kna mbo, 'Mi wi Yesu Nazrɛt wo ŋmba mu pra kre.' 9Leele mblɛ mi na pre naa nyaari kre na yira ŋga kra ni kun mu le kre nya, a nde pe nsra paaraa kre loo. 10A ndaa kna mu wie na, 'Yira ŋgi mu chaa mbe ni pe hin, ni Tafun?' A o Tafun wre na yo ni pan, mbo, 'Yiri mu le Damasko lam. Bawa pie kee ŋga Nyiɛkpↄↄ chaa mbe mu pe krɛrɛ yo mu pan mbe mu loo.' Kanhun kre kra ni kun mu le kre ndra na, ni nsraa nyaa mbe sɛ, 11kra ni fun nyiɛlɛ na, leele mblɛ mi na pre naa nyaari kre na ni yii kɛ na, mna le na ni ni Damasko na. 12Bawa blↄ wa na nyi, a praa u yeeri Anania, a wra pe Nyiɛkpↄↄ ndro mbra kolo na, a Judae mblɛ praa wa wa kro naa u mɛɛ chichie yeeri. 13Wre wra pan mna yire ni yiɛ mna yo ni pan mbo, 'Ni chunu Sↄↄl mu nyiɛlɛ yire nyaa.' Titɛɛ kre nu ŋga ndaa ndra yire to, mna u nya na uu wa mu yire ni yiɛ. 14A wra kna mna yo ni pan, mbo, 'O tolɛɛlɛ Nyiɛkpↄↄ wre mu wↄ na mu ŋga u chaa chin mbe Yesu kprafun wre chin, mbe u nyu kee loo. 15Mbe mu pe u dansiɛlifun, mbe kee ŋga mu nya na ŋga mu loo kro dansiɛrɛ li, mbe leele nyina. 16Kena ŋgi mu sri na hin? Yiri mbe pe mu ndra je, mna o Tafun tali. We mu sisam tii mu kɛ.' 17Ŋga ndaa ndru mna pan Jerusalɛm na mna sɛ le Judae suminyuŋgo kre nu na nyiɛtali kre, ndaa yira nya nyiɛlɛ na. 18A ndaa o Tafun wre nya a wra yo mbo, 'Pe nyaanyaa mu yili Jerusalɛm ŋga na. Ni dansiɛrɛ kre mu li kre, pia ki loo mna.' 19A ndaa kna mna yo na, 'Ni Tafun, pre titi chin na mi ndaa mu sumifɛɛnlɛ pre yii fninyinyi yire nu na shie na leni nyuŋgo mnaa pe gbuun. 20A ŋga praa mu dansiɛlifun Stefano kuu kre, na nii wa mu yire wa, mna li ki na na pe u gbo, hali mblɛ praa u kuu kre, mi ndaa pe dodonyi shↄ mu tɛɛ.' 21A o Tafun wre na kna mbo, 'Yili Jerusalɛm na mna, mbe ni mu tun mbe mu sɛ leele mblɛ pe n pe Judae pre nu.' " 22Leele pre na ndie tɛɛ u pan chiin mna pan mu da kre kee ŋga na, mna ndru mu gble mu ki tↄ mbo, "E ndro ŋmba sembremu gbo mbe u yili tra ŋga na kuraa." 23Ŋga praa gblee kre leni ma kre, a praa pe dodonyi viŋge na kna, na bloŋgo yire nyjeeri, 24a sojae tafun wre na tia a pra pan na u ni sojae katoo wa, mna yo na pe u gbun mbe u u nyu kee yo, kena pe chin ŋga na pe u gble. 25Ŋga pra Pↄↄl pↄ na tↄↄma ka ni mna tɛɛ kre, a Pↄↄl na kna mna yo soja lopom wre pan, mbo, "Kena kii kolo ni na ee Romae lepↄↄ gbuun, nyjila ŋga ni pe n u kala li mu u gbun na pimi ni kre?" 26Ŋga soja lopom wre na u kee kre loo kre, a wra sɛ yo sojae tafun wre pan mbo, "Yira ŋgi kee mu chaa mbe o pe ŋga hin? Mu chin na blↄ wre, na Romae wo wii?" 27A sojae tafun wre titi na yiri mu pan mu Pↄↄl wie mbo, "Mu yo Romae ndro wi ŋuu? Kpra yo ni pan." A Pↄↄl na kna mbo, "Romae wo wi mi titi" 28A sojae tafun wre na kna mbo, "Mi Romae lepↄↄ lie ŋga, swa nɛɛrɛ ni mi na ki lↄ." A Pↄↄl na kna mbo, "Mi rɛ, pe ni se Romae ndro." 29Ŋga pra loo na Romae ndro wi Pↄↄl kre, titɛɛ kre nu, a sojae mblɛ pra wↄ mbe pe u frↄ kre na nyina. A fiɛrɛ na sojae tafun wre yii, ŋga wra tia pra Romae ndro Pↄↄl pↄ mɛnyi ni kre ndra na. 30Ŋga nyiŋge na se kre, sojae tafun wre naa chaa mbe kee kre Juda leele pre na pe kre kpra chin, a pra Pↄↄl saan mna yo Judae sↄfue loplombo pre na kalalifɛɛnlɛ pre pan na pe paan fni, a pra sɛ pan na Pↄↄl ni mu yire pe lalaa mbe u u mandiɛ bↄ mbe pe kee kre kpra chin.

will be added

X\