Nyiɛkpↄↄ Bitumblↄ Hlɛ 21

1Ŋga o na oyɛ kla kre, a o na krↄ bali mna sɛ le Kos na, a nyiŋge na se a o na sɛ Rodo na, mna yiri wa mna sɛ Patara na. 2Patara na wa, o na krↄ ka nya na ki shie Foinika tra na, a o na le ki nu, a o kro na sɛ. 3Pan o naa Kipro tra le imi, mna ki wa kamɛŋɛ, mna tro mu sɛ Siria tra na, mna sɛ tii Tiro na. Na bawa krↄ kre shie mbe sɛ ki tuuro wↄ mbe tɛɛ. 4Ŋga o na le wa mna bawa sumifɛɛnlɛ pre nya kre, a o na tni wa ble kↄↄnashin. Bawa pra yire Kpra Ŋumu wre na mna yo Pↄↄl pan na waa shia sɛ Jerusalɛm na. 5Ŋga o ble yire nyu na to kre, a o na pe tali kolo, a pre na pe chiɛlɛ na pe biile kro na o tro mna pan mu da epo nyu na, bawa o kro na kosie kan mna nyiɛtali. 6A wre na pre na oyɛ kla, a wre na le krↄ nu, a pre na ndru mna sɛ katoo. 7Ŋga o na yiri Tiro na kre, epo yiɛ na o na tro mna pan mu yili Potolemia chia kre na. A o na tii mna o wolo mblɛ praa wa wa kre shaari mna tni pe jaara ble nunu. 8Ki nyisee na, a o na yili wa mna pan Kaisaria na. Bawa o na sɛ tni Nyiɛkpↄↄ keeyofun ŋmba praa yeeri Filipo wre katoo, Filipo na chaa leele kↄↄnashin pre pra wↄ Jerusalɛm na kre nu. 9Na uu wa na bichiɛlɛ jijirɛ mblɛ pe nsra bilɛ chin ni, a praa Nyiɛkpↄↄ kee nyaa na yuu. 10Ŋga o na ble chiɛri yɛ li wa kre, ba Nyiɛkpↄↄ kee nyanyofun wa na yiri Judea na mna le, u mɛɛ naa Agabↄs. 11Ŋga wra pan o lawee kre, a wra sɛ Pↄↄl greree bali mna wre titi jeelee na u kɛnyi pↄ na ki ni, mna kna mbo, "Imi na Kpra Ŋumu wre yo yi kre, mbo, 'Blↄ ŋmba wo yi greree ŋga kre, Judae mblɛ pee wa Jerusalɛm na kre we u pↄ imi, mbe u yii mbe sɛ le leele mblɛ pe n pe Judae kɛɛ.' " 12Ŋga o na kee ŋga loo kre, a wre na leele mblɛ praa wa wa kre na Pↄↄl tali na waa sɛ Jerusalɛm na wa. 13A Pↄↄl na kna mbo, "Nyji e piin na nyɛni na ni gbun sroi ŋga hin? Ni n na fiɛ ni nyuŋgo lee na, hali na kumu yi Jerusalɛm na wa o Tafun Yesu wre mɛɛ na kuraa kre, ni n na fiɛ." 14Ŋga u nsra o kee kre loo kre, a o na pieri mna yo na, "Ŋga o Tafun wre chaa, ki pe." 15Yire ble yire kↄkro kre, o na oyɛ kna mna sɛ Jerusalɛm na. 16Ŋga o naa shie kre twanfɛɛnlɛ plɛ na yiri Kaisaria na wa mna ya o na, a o na sɛ. A pra sɛ na o ni twanfun lↄↄ wa, u mɛɛ naa Mnason, Kipro ndro wa katoo, a o na tni wa. 17Ŋga o na le Jerusalɛm na wa kre o wolo mblɛ praa wa wa kre na o yii kama. 18Ŋga nyiŋge na se kre, a wre na Pↄↄl na sɛ Jemisi katoo, na pre loplombo pre kroo wa wa. 19Ŋga o na oyɛ shaari mu kↄ kre, a Pↄↄl na pe nyina nununu, tnumu ŋga Nyiɛkpↄↄ na yire u na mu tun leele mblɛ pe n pe Judae pre nu. 20Ŋga pra o mandiɛ kre loo ma kre, pe kro na Nyiɛkpↄↄ ŋga mɛɛ, bawa pra yo Pↄↄl pan mbo, "Awe le! Ŋu titi nya imi Judae kagbeŋ kagbeŋ na shↄnli mu ndru mu taa fa mbra yire kro. 21A pe mu kee yo pe pan na ŋu mu Judafɛɛnlɛ mblɛ pee wa leele mblɛ pe n pe Judae nu kre nyina na pia taa Mbose mbra yire na. Na pia na pe biile blɛm knumu, ndee mbe taa paala ka na. 22Kena fuŋgaami ŋga kolo ŋgi na oo tro hin? Yaka ma. Ŋga mu le ŋga pie mu kee loo. 23Kena li kolo ŋga oo mu nyina ŋga na. Bilɛ jijirɛ plɛɛ wa o pan mna mblɛ pra pe nyu yo yo. 24Kena pre leele mblɛ yii mu ya muyɛ na mbe e sɛ paala kre pe, mbe mu pe fↄlↄ tↄ kro, mbe pe pe ndrɛ klu. Kena chiafɛɛnlɛ chin na mu kee nyjɛ pe loo kre kafinɛ yi. Yaka ma. Pie chin na ŋu titi kuraa li mbra kre na. 25La, waŋgra leele mblɛ pe shↄnli kre, o na nyu nunu ta mna nyunↄ mu sɛ pe ŋga na, pe peyɛ laa sɛɛnlɛ yire kro, na nyimi, na yurↄ ŋmba nyimi ki n wo tra, na tɛtiɛrɛɛ nu." 26Ŋga nyiŋge na se kre, a Pↄↄl na bilɛ pre na paala kre pe mna peyɛ weli mna sɛ Judae suminyuŋgo wa mbe sɛ pe nyina ŋga ble pe paala nyu we to, mbe pe paan pe sra yirɛ wↄ. 27Ŋga ble kↄↄnashin yire naa dani kre, Juda leele plɛ na yiri Asia waŋgra kre nu mna pan mu Pↄↄl nya pe suminyuŋgo kre nu, a pra kanyaa le mna Pↄↄl yii. 28Mna na kulo na leele yeeri mbo, "Israel bilɛ e ya o na." Mbo, "Blↄ ŋmba u paara na ndro kro nyina lawee kro nu, mu na o tra ŋga, na o mbra yire, na o suminyuŋgo ŋga taanla kre, u ndru mu pan na waŋgra leele ni o suminyuŋgo kre nu, mu nɛɛrɛ tɛɛ mu ki tↄ." 29Ŋgi na, na pe klu mu Pↄↄl na Efiso ndro ŋmba praa yeeri Trofimo wre nya a praa kila, kra tia praa jawa na Pↄↄl le na u ni suminyuŋgo wa. 30Ŋga kra pan ma kre, a chia kre na yiri mu paari a leele na kan mu pan mu fni wa, mna Pↄↄl tini mu yili suminyuŋgo wa, mna krↄɛ yire tini mu tↄ tↄ. 31Ŋga praa kolo chaa mbe u gbo kre, sojae tafun wre na ki loo na Jerusalɛm kro yiri mu paari. 32Titɛɛ kre nu, a sojae tafun wre na sojae wru, na pe loplombo plɛ ni mna sɛ leele pre nu. Ŋga pra sojae pre na pe tafun wre nya kre a pra Pↄↄl gbↄↄn ti. 33A sojae tafun wre na sɛ Pↄↄl yii, mna tia pra jlↄnyi tɛɛ mna u pↄ. Mna pe wie ndro ŋmba nyini wi na ŋga u pe. 34Ŋga wra pe wie maPaul beaten kre, lenɛɛrɛ pre nu, na ŋmba ŋga yo mbe ŋmba ŋga yo. Imi nyini praa gblee kre, u nsra ja mbe kee kre kpra chin. A wra tia pra u wru mna sɛ sojae pre tnihaa wa, hali imi na leele pre naa piin mu taa u na kre, 35ŋga pra da jlonwee mbe le pe tnihaa wa kre, tio pra Pↄↄl tio ndra na. 36Na lenɛɛrɛ pre kro yuu mbo, "E ti u kɛ yili wa." 37Ŋga praa shie na Pↄↄl ni pe tnihaa wa kre, a wra kna mna yo sojae tafun wre pan mbo, "Jande, ni tafun, nii wa na kolo ni na mbe paara mu pan ra?" 38A sojae tafun wre na kna mu u wie mbo, "A! Mu Griiki yolo ndru ra? Ŋu wi Egypt ndro ŋmba wra kanyaa ka le aŋge kro mna tia a pra bilɛ linkufɛɛnlɛ kagbeŋ jijirɛ plɛ yii mna sɛ fimi lawee yire nu kree?" 39A Pↄↄl na kna mbo, "Juda ndro wi mi, a ni yiri Tarso na. Ki pe Kilikia waŋgra kre chia ŋga mɛɛ ki yili kpↄↄ. La, ni mu tali mbe mu ni ŋga kolo chiɛri mbe ni paara mbe leele mblɛ nyina." 40A sojae tafun wre na u ŋga kolo, a Pↄↄl na yire pe nduu haa kre na, mna kɛ wa leele pre pan na pe loo. Ba wra paara Judae yolo yire nu.

will be added

X\