Nyiɛkpↄↄ Bitumblↄ Hlɛ 20

1Ŋga kanyaa kre nyu na to kre, a Pↄↄl na twanfɛɛnlɛ pre yeeri mna fni, mna paara mna pe le gbun, mna pe kla mna sɛ Makedonia tra na. 2Ŋga wra le wa kre, wra sɛ twanfɛɛnlɛ pre praa wa chiɛ yire yiraa wa wa kre na kro shaari mna pe gbeŋmba mna sɛ le Griiki na. 3Wra li wa nyiɛpↄ taarɛ mna yo we krↄ bali mbe sɛ Siria na. A ŋga wra nya na Judae pre u kolo chaa mbe u gbo kre, wraa chaa mbe ndruu sɛ tro Makedonia tra kre nu. 4Ŋga wra ndru mna sɛ tro Makedonia tra nu kre, leele plɛ na taa u na, pre lɛ Beria ndro Sopata, Piro pↄ, na Timotio na Dɛbi ndro Gaiu, na Tesalonika leele na Aristako na Sekundo, na Asia leele Tihiko na Trofimo. 5Ŋga o na le wa kre, na pre leele mblɛ krɛrɛ yiɛklu mu sɛ tni Troas na na o sri. 6Ŋga o na klɛntro ble kpↄɛ yire li mu kↄ kre, a o na yili Filipi chia kre na mna krↄ bali mna tro lↄↄ yiɛ na, ble nununu kunↄ mna pan mu pe da Troas na, mna tni wa ble kↄↄnashin. 7Ŋga Aliɛri ble na to, kranu kre ble yɛklo kre, o na sɛ fni mbe o Tafun sro kre li, a Pↄↄl na yiri mu paara mu leele pre nyina. Ŋga wraa chaa mbe yili wa ki nyisee na kre, ki tia wra paara chiin a ndram na sɛ yↄ. 8Kaniɛ tataara naa wa nyjeeri nyuŋgo ŋga nu o na fni kre nu. 9Na nyanyjɛble wa, u mɛɛ naa Eutiko na uu wa mu tni tokro yire ka na na ndru, jaa ŋunumu shio, a Pↄↄl na kro na paara suwi. A ŋunumu kre na kↄ mu wɛ u na, a wra kun mu yire nyjeeri wa, nyuŋgo taarɛ wo kre nu mna pan mu to tra. Ŋga pra pan mbe u yire kre, na u ku. 10A Pↄↄl na tii mna sɛ juule u na, mna u fa mu yii mna kna mu yo leele pre pan mbo, "Yaa ti ki e tↄↄra, ma, u n ta mu ku tun." 11A Pↄↄl na ndru mu nduu mu sɛ nyjeeri wa, mna sɛ o Tafun paanu kre pile a pra ka, a wra ndru mna paara mna u kee kre taa, a ndram na pan mu saan, a wra chin mu yili wa. 12A pra sɛ nyanyjɛble wre wru mna sɛ katoo, na yaka n u ta. A pe gbun na nyjii kama. 13A o na yiɛ klu mna krↄ wru mna tro lↄↄ yiɛ na mna sɛ to chia ka pe ki yeeri Aso, mbe Pↄↄl fni wa, mbe u wru krↄ ni. Na u yo we nyaari tra mbe sɛ wa. 14Ŋga wre na wre na fni Aso na kre, a o na u bali a o kro na sɛ Mitilene na. 15Ŋga o na kↄ bawa kre, ki nyisee na, a o na Kio tra tro. Ŋga nyiŋge na ndru mu se kre, a o na le Samo na a nyiŋge na se a o na le Mileto na. 16Kre nyjila kre na Pↄↄl chaa mbe o Efiso kuun wa. Na kre ma, we kↄↄ mu Asia tra kre nu wa. Na u fiɛlɛ mbe le Jerusalɛm na nyaanyaa mbe yila na Pentikↄs ble kre ni. 17A Pↄↄl na yire Mileto na mna ndro tun na u sɛ yo Efiso sumifɛɛnlɛ pre loplombo pre pan na pe u fni mbe pe paara. 18Ŋga pra pan mu u fni kre, a wra yo pe pan mbo, "Yire titi e chin na, mu yire ble ŋga ble ndaa le Asia na kre, imi na mi na yire na tni nyjila tataara nu. 19Imi na ndaa niyɛ nyjii mna yotunyi na penlee, na kee nyjɛ Judae na taa ni na krɛrɛ tɛɛ mna na ni Nyiɛkpↄↄ sumi. 20Yire titi e chin na ketaan kre ŋga ki nyu mu e ŋga kro kre, ni n tↄ ki na, ndaa ki yuu na e nyina lete na, na e kalonyi nu. 21Imi na ndaa Griikie na Judae kro jaari na pe laa pe sisam kro mbe taa Nyiɛkpↄↄ kro, mbe o Tafun Yesu Kristo wre shↄↄli. 22Hali fuŋgaami ŋga kuraa Jerusalɛm na ni shie kre, Kpra Ŋumu wre jaŋga ni, a ni n chin ŋga kie ni nya wa. 23Chia ŋga na mbe le kro, kee ŋga Kpra Ŋumu wre yuu ni pan yi na, nyuŋgo lee na kanyana wa ni yiɛ na ni sri. 24La, ni kee ka ma na ki ni. Ni n ni ŋmaa wru mu pe yira kpↄↄ ka mu niyɛ ŋga. La, ŋga ni chaa yi na mbe nyaari mbe tnumu ŋga o Tafun Yesu Kristo ni ŋga, na ni Nyiɛkpↄↄ koroo na u ketaan kre dansiɛrɛ li kre tun. 25E le, fuŋgaami ŋga ni chin na yire mblɛ na ni nyaari mu Nyiɛkpↄↄ ŋunumu kee kre yo mu tro kre, wa wa ni yiɛ ŋga nya na. 26Ki tia a ŋga ni niyɛ dansiɛrɛ lii na, na e wa waa ku mu fun kre, u hankɛ n wa ni na. 27Ŋgi na, Nyiɛkpↄↄ kee ka n wa a ni ki ndra e na. 28Kena e eyɛ le chichie, e Nyiɛkpↄↄ leele mblɛ Kpra Ŋumu wre le e kɛɛ kre, Nyiɛkpↄↄ asↄri ŋga u wre titi pↄ nyimi tɛɛ mu lↄ kre le chiriri. 29Yaka ma, mi titi chin na ŋga ni shie ŋga, komboolo sisaala we paan le mbaala pre nu, a pia ti mbe pe peyɛ ta. 30A yire nu chↄↄ plɛ we yiri mbe denyjuu tɛɛ mbe twanfɛɛnlɛ mblɛ tataara laa mbe taa peyɛ na. 31Kena e eyɛ shie, e sↄↄnri na yɛlɛ nununu taarɛ yi ŋga, ni n wuu, lafo na blee, nyɛnɛɛ ni ni paara na e kro nyina. 32Kena fuŋgaami ŋga Nyiɛkpↄↄ kee na u koroo kee kre nu ni e wru mu le, kee kre kie jaa e pↄↄri mbe e ŋga krↄ yira ŋga u tɛɛ u leele chechee pre pan kre. 33Ni yiɛ nsra nyina wa swa fiŋge ndee, wa swa nyiɛ, ndee wa yoŋgo na. 34Yire titi e chin na ni kɛnyu tnumu ni ni yirɛ nyjɛ yi mi na ni kotↄmblↄ shian kro cha. 35Yire kee nyjɛ krɛrɛ ni ni e nyina, e na tnumu tuni ma, e na yaa mblɛ pe n peyɛ ja kre na, mbe e o Tafun Yesu Kristo kee kre wra yo kre sↄↄnri, na dwamu wa wↄŋgaa nu mu wɛ ŋga mu kɛ tini mbe shↄ na." 36Ŋga Pↄↄl na yire kee nyjɛ yo mu kↄ kre, a wra kosie kan a wre na pre na nyiɛtali. 37Bawa pe kro na nyɛni mna u pe atuu mna u nyu shiun shiun. 38Kee ŋga kra pe yii fooro ni kpↄↄ na yi na Pↄↄl na yo pe pan na pia u yiɛ nya na. A pra sɛ Pↄↄl tro mna sɛ su epo nyu na, mna u le krↄ nu.

will be added

X\