Nyiɛkpↄↄ Bitumblↄ Hlɛ 2

1Ŋga Pentikↄs ble kre na to kre, na bitumblↄ pre na shↄnlifɛɛnlɛ pre kro fni titɛɛ. 2Titɛɛ kre nu, na gblee kpↄↄ ka tin mu yiri nyjeeri imi na fuflɛ kpↄↄ gbuun ŋga, mna pan mu katoo ŋga nu pra nyi kre nyi. 3A yirɛ yɛ naa ndile woni na kanhun yi na pe nyina. A yira yↄↄlɛ mna to to pe ndrɛ na na. 4A Kpra Ŋumu wre na pe kro nyi a pra yire wa mna na yolo fↄnyi yuu imi na Kpra Ŋumu wre na pe ŋga kro. 5Kre nyjila kre, na Judae mblɛ praa Nyiɛkpↄↄ fiɛ mu yiri waŋgra kro nu kree wa Jerusalɛm na. 6Ŋga kee ŋga na pan ma kre, lenɛɛrɛ na pan mu fni wa, a pe jawala nsra to pe nu, imi pra loo na pe pe kro chiɛ yolo yuu kre na. 7A kra pe kro pe kepee na kawako ni, a pra kna mbo, "E le, leele mblɛ pe paara ŋga kro, Galilii na ma pe yiri kree? 8A mni ki pe a pe kro ja mu na o chiɛ yolo nyjɛ nu pe o se yuu ŋga hin? 9Na Paati leele na Media leele na Elam leele mblɛ pee wa Mesopotemia na, na Judea na Kapadokia, na Ponto, na Asia, 10Frigia, na Pamfilia, na Egypt, na Libia ŋga kii wa Kirene na kre, na fumblↄ mblɛ pe yiri Rom na, na Judae na mblɛ pe kaari Judae kro. 11Kretae na Arebia ni kro, na pee wa wa mbo, 'O loo a pe o yolo tɛɛ mu na kekpↄɛ nyjɛ Nyiɛkpↄↄ pe kre yuu.' " 12A kra pe kro pe kawako na lam kla kee, a pra kna na yuu peyɛ pan mbo, "A kee nyjɛ pe piin ŋga nↄↄ yi ŋgi hin?" 13A pe plɛ naa pe piin na tɛɛ mbo, "Simi pe gbↄnto!" 14Na Pita na kɛmbↄnunu pre wa mu yire, a Pita na paara gedeeŋge lenɛɛrɛ pre pan mbo, "O wolo Judae na e mblɛ ee wa Jerusalɛm na kro, e kee ŋga loo. E ti mbe ni kee ŋga mbe yo ŋga mbe ki le e ndie. 15Leele mblɛ e nya ŋga, simi ma pe gbↄ mu to, imi na e jawa kre, bnimi nyu ŋga na kie pe nyjila kↄↄnajirɛ yi ŋga, simi gbↄ nyjila ma. 16Kre kee ŋga Nyiɛkpↄↄ kee nyanyofun Joel na nya mu yo kre, 17mbo, 'Nyiɛkpↄↄ na yo na, ble nyjɛ yie kro tↄ yire nu kre, mbe ni Ŋumu kna mbe wo ndro kro na, mbe e bibilɛ na e bichiɛlɛ na Nyiɛkpↄↄ kee nyaa mbra yuu, mbe nyanyjɛbɛɛlɛ na ni kee nyaa nyiɛlɛ na, mbe e loplombo na ŋunɛ ŋunu. 18Yire ble yire nu kre, ni tinlɛ na ni tnichiɛlɛ na mbe ni Ŋumu kna mbe wo, mbe pra ni kee nyaa mbra yuu. 19Mbe kawako kee pe nyiɛ yiɛ na nyjeeri, mbe kawako kee pe waŋgra nu tra mna. Nyimi na kanhun na wre we lawee tↄ. 20Mbe ndram wↄ lafo na, mbe nyiɛpↄ kaari nyimi, mbe o Tafun ble kpↄↄ kre, yɛnyiŋge ble kre, mbe ki chiin da. 21Kie pan na ŋmba we o Tafun wre mɛɛ yeeri kre, pie ufun ŋmaa shↄ.' " 22A Pita na yo mbo, "Israel leele, e ni kee ŋga loo. Yesu Nazrɛt wo wre, blↄ ŋmba Nyiɛkpↄↄ na wↄ mu e nyina, mna yire u na mu kekpↄɛ na kawako kee pe e lalaa a yire titi na nya kre, 23wre Yesu ŋmba, e yire kolo ŋga Nyiɛkpↄↄ yo mu tɛɛ, na kee ŋga Nyiɛkpↄↄ chin mu tɛɛ fa kre na, mna u wↄ mu le leele mblɛ pe nsra Nyiɛkpↄↄ mbra li kɛɛ, a pra u gbo kanyana kumu kaan kre na kre, 24wre Nyiɛkpↄↄ nyi, mu kumu kanyana maŋa kre saan. Ŋgi na, kumu nsra ja mu jaŋga li u na. 25Wre kee Devid na yo mbo, 'Ni Tafun wa ni yiɛ nyjila kro nu. Uu wa ni kalie, ki tia mba seeri. 26Kre ndra na, ni gbun nyjii ni na, a ni ndile saan ni nyuu kama, a nii wa na kaanhaan ni 27A wa ni ŋumu ti kuulo ndoo, a wa ti mbe u sumifun cheche wre, mbe u fↄↄn wee. 28A wre u ni nyina ŋmaa kolo mbe ni yiɛ shↄ u jaara.' 29Kena ni wolo, e ti ni o lɛ lopom Devid kee yo e pan mbe e loo. Wra ku, a pra u le, a u lehaa wa tra o pan mna, mu pan mu su aŋga. 30Nyiɛkpↄↄ kee nyanyofun na wi, a ŋga wra chin na Nyiɛkpↄↄ da mu yo u pan na, u sele ndro we yiri mbe pan mbe tni u ŋunumu jↄↄn kre na kre ndra na, 31wra klu mu nya na kie kↄↄ pan ma, mnaa Kristo wre kunnyiɛ kre kee yuu mbo, 'Pia u ti kuulo ndoo, a u kaara wa fↄↄn.' 32Wre Yesu wre Nyiɛkpↄↄ nyi kre, a ki dansiɛfɛɛnlɛ lɛ wre. 33Kena ŋga o Lɛ Nyiɛkpↄↄ na u kↄ mu tɛɛ u kalie, mu u ŋga Kpra Ŋumu wre, imi na wra nyu le na u ni kre, kre u wo o na a e loo mu nya kre. 34Devid n na sɛ nyjeeri, ande wra yo mbo, 'O Tafun na yo ni Tafun pan na, tni ni kalie, 35mu sɛ su nyjila ŋga nu mbe ti mu mu jenyaarɛɛ taa mu loŋgoolo na.' 36Kena ki fna mbe Israel leele kro chin chichie na Yesu ŋmba e na gbo kre, Nyiɛkpↄↄ u pe Tafun na Kristo wre." 37Ŋga pra kee kre loo kre, a kra pe yaa lolonyi nu, a pra kna mna yo Pita na bitumblↄ hamblɛ pre pan mbo, "O wolo, ŋgi e yo o pe hin?" 38A Pita na kna mbo, "E kro e e jawala chinɛ, mbe o e ndrɛ je Yesu Kristo wre mɛɛ nu, mbe e sisam tinkɛɛ ta, kre ee Kpra Ŋumu wre kɛ yira kre ta. 39Kpra Ŋumu wre nyu Nyiɛkpↄↄ na le mu tɛɛ kre, yire na e biile, na mblɛ pee wa haaleelee kro, na mblɛ o Tafun Nyiɛkpↄↄ we yeeri mbe pan u jaara kre kro wo yi." 40A wra kee tataara tɛɛ mu dansiɛrɛ li, mna paara mu pe nyina mbo, "E eyɛ wↄ e yili aŋga leele mblɛ pe n fraka ŋga nu." 41A mblɛ pra kee kre shↄnli kre, a pra pe ndrɛ je. Ki ble kre lam pra leele ta pie pe leele kagbeŋ taarɛ mna ya peyɛ na. 42A shↄnlifɛɛnlɛ pre na peyɛ wru mu bitumblↄ pre ŋga a pra pe nyina Nyiɛkpↄↄ kee kre, mna nyu nunu na chaanlie na nyiɛtalaa yii kɛshiin. 43A kra fiɛrɛ wo lenɛɛrɛ na, a Nyiɛkpↄↄ na bitumblↄ pre tɛɛ mu kawako kee pe tataara. 44A mblɛ pra shↄnli kre kro na fni lawee nunu nu, mnaa chaa na yira kro piin. 45A pra pe krↄyirɛ prɛ, mu yi yↄↄlɛ mu peyɛ ŋga imi na kra pe shian mu da. 46A blenyini ŋga, pan praa fni pe suminyuŋgo na chaa na lii pe katoe nu. Nyiɛkpↄↄ sro na pre titi sro. Pan praa yɛshↄↄrↄ na loloŋgo chaara teeri na chaa na lii. 47A pe kro naa Nyiɛkpↄↄ kaan mɛɛ, mna yɛnyiŋge ta ndro kro pan. Blenyini ŋga, pan o Tafun Nyiɛkpↄↄ wre naa mblɛ ŋmaa praa shio kre yaa pe na.

will be added

X\