Nyiɛkpↄↄ Bitumblↄ Hlɛ 19

1Nyjila ŋga nu Apolo naa wa Korinto na kre, na Pↄↄl kila chiin nyjeeri haa tra yire nu mna sɛ yili Efiso na. Bawa wra sɛ twanfɛɛnlɛ plɛ da, 2mna pe wie, mbo, "Ŋga e shↄnli kre, e Kpra Ŋumu wre taa?" A pra kna mu yo u pan mbo, "Ↄↄnhↄn, o n da mu loo tun kple na pe yira ka yeeri Kpra Ŋumu." 3A wra ndru mu pe wie mbo, "Shↄnlie ŋgi nu pra e ndrɛ je mu le hin?" A pra kna mbo, "Jↄn ndrɛ jee kee kre nu pra o ndrɛ je mu le." 4A Pↄↄl na kna mbo, "Jↄn ndrɛ jee kre rɛ, wraa nyina na leele pe pe jawala chinɛ mbe laa pe sisam kro, mbe ŋmba uu wa u kro na paan kre shↄↄli, Yesu wre." 5Ŋga twanfɛɛnlɛ pre na loo ma kre, a pra tia pra pe ndrɛ je mu le o Tafun Yesu wre mɛɛ nu. 6Ŋga Pↄↄl na kɛnyi taa taa pe na kre, titɛɛ kre nu, a Kpra Ŋumu wre na pan mu le pe nu nununu. A praa kayolo fↄnyi yuu, mna na Nyiɛkpↄↄ kee nyaa na yuu. 7Na leele pre kro we pe kɛmbↄshiin. 8Pↄↄl na li nyiɛpↄ taarɛ Efiso na wa, na shie Judae fninyuŋgo wa, mna gbun ta na pe nyina Nyiɛkpↄↄ ŋunumu kre kee. 9La, pe plɛ ndie na kan, a pe nsra kee kre shↄnli, mna ndru na kefuɛn yuu na kre Yesu sumiɛ kre taanla, lenɛɛrɛ pre yiɛ na. A Pↄↄl na yili pe nu mna twanfɛɛnlɛ pre yoori mna sɛ na pe ni blↄ wa praa u yeeri Tirano nyuŋgo, mna na pe nyina kee kre wa blenyini. 10Yɛlɛ shiin na Pↄↄl wa na nyina wa, mna sɛ su na leele mblɛ pee wa Asia tra nu wa kro, Judae na Griikie kro na o Tafun wre kee kre loo. 11A Nyiɛkpↄↄ na yire Pↄↄl na mna tia keekpↄɛ na pe wa. 12Hali leele naa Pↄↄl wejiyirɛ laala u na mbe sɛ taa yambla na mbe pe saanla, a mblɛ nu ŋumufuɛn na nyi na yili yili pe nu mu sɛ. 13Bawa Judae kↄmfuↄe plɛ naa kila na tro mu peyɛ faŋga wru mbo pie Yesu mɛɛ tɛɛ mbe ŋumufuɛnfɛɛnlɛ plɛ tra. Imi praa yuu yi kre mbo, "O yo e pan, Yesu ŋmba kee Pↄↄl yuu kre mɛɛ nu, na e yili." 14Pra pe Judae sↄfu lopom ŋmba praa yeeri Sekewa wre biile, praa kↄↄnashin, mnaa kre deŋge kre lii. 15A ŋumufↄↄn kre na yo pe pan mbo, "Ni Yesu chin mu Pↄↄl chin, a yire, sena e yiri hin?" 16A blↄ ŋmba nu ŋumufↄↄn wre na nyi kre na yiri mna le pe nu mna pe gbun kuraa mna laala mna pe ni. A pra fɛ mu yili katoo wa na wejiwɛɛ ni mu sɛ. 17A kre kee ŋga na kpali kro Efiso chia kre na, hali pe Judae na pe Griikie pre kro na ki loo. A kra tia fiɛrɛ na wo pe na, a praa o Tafun wre mɛɛ chichie yeeri. 18Ŋga kra pan ma kre, leele mblɛ pra shↄnli kre na pan na pe sisam na pe wↄmu kee yuu. 19Pe mblɛ praa dobodobo tnumu tuni kre tataara na sɛ pe hlɛ koli mu pan, a pra yi sro lenɛɛrɛ pre yiɛ na. Ŋga pra yire hlɛ nyjɛ fↄlↄ nyu gbun kre, na yi da swa finyi kagbeŋ fuloe shiin na kɛ, (Ki wɛ aŋga swa sidi kagbeŋ lafɛɛ taarɛ na.) 20Kra tia Nyiɛkpↄↄ kee kre na kpↄↄ bawa tra kre nu. 21Ŋga pra yire kee nyjɛ pe pe mu kↄ kre, Pↄↄl na jawa na ki fna u sɛ tro Makedonia tra na Akaia tra na, mbe sɛ tro mbe sɛ Jerusalɛm na mbo, "A na ni da wa kre, ki fna mbe ni sɛ Rom na." 22Bawa wra tia u kotↄmblↄ pre shiin, Timotio na Erasto, na sɛ Makedonia tra na wa. A wre na tni Asia tra na mna mu wa chiɛri. 23Kre nyjila kre nu kre, kanyaa ŋga nyini kra le sumiɛ kre nu kre nsra prↄ. 24Kra yire swa fiŋge tutuŋu wa na, praa u yeeri Demɛtriu, ŋmba wra ja na swa fiŋge teeri na pe sɛɛn Atemis nyuŋgo kre kumu gbeele, mna tia tutumblↄ naa ki tnu lii kro. 25Wre, ki ble ka wra mblɛ praa ki tnumu kre ka tuni kre kro fni mna yo pe pan mbo, "Wolo e chin na tnumu ŋga kre nu o lii, na o yirɛ taa. 26A yire titi e nya mu loo na Efiso na mna chiin ma, Asia waŋgra ŋga kro kro nu, imi na blↄ ŋmba pe yeeri Pↄↄl wre ja mu leele tataara nyina na sɛɛnlɛ nyjɛ pe faanri kɛ ni ŋga pe yirɛ wɛɛ, mu tia pe pe jawala chinɛ. 27Ki n pe na o tnumu ŋga chiin kie kla, la, kie ti mbe o sɛɛn kpↄↄ Atemis wre, mbe ndro wa u shↄↄli na kuraa, mbe ki ti mbe yɛnyiŋge na kpↄↄmu ŋga Asia na waŋgra ŋga kro u kaan kre, mbe wa ka ta na." 28Ŋga pra kee kre loo ma kre, a pe krↄ na kun kuraa, a pra na gblee na yuu, mbo, "Efiso Atemis wre wi jaŋgafun titi." 29Ŋga kra pan ma kre, na chia kre kro yiri mu paari. A pra tin na shie pe kapoŋgo fnihaa wa, mna Makedonia leele mblɛ pre na Pↄↄl naa nyaari kre yii mna le na pe ni fnihaa wa, pe mɛɛ naa Gaiu na Aristako. 30Ŋga kra pan ma kre, Pↄↄl naa chaa mbe jiji lenɛɛrɛ pre nu mbe sɛ wa ka na, a u twanfɛɛnlɛ pre nsra u ŋga kolo. 31A Pↄↄl nↄↄlↄ plɛ pra pe Asia loplombo, na ndro tun a wra sɛ yo u pan na, waa yili mbe pan lenɛɛrɛ pre lawee kuraa. 32A leele pre naa gblee chaachaa, na kanyaa kre wɛ kuraa, hali pe nɛɛrɛ kuraa nsra kala ŋga na pra pan wa kre nↄↄ loo. 33A Judae pre na Alɛksandro tini mu sɛ yire yiɛ na u paara. Ŋga lenɛɛrɛ pre na u nya kre, a pra yo u pan, mbo, "Paara mbe o loo." Alɛksandro na kɛ yire leele pre pan na u chaa mbe paara. 34Ŋga leele pre na u nya mna u chin na Juda ndro wi kre, a pra ndru mu gblee mu lawee kre tↄ. Kie pe nyjila nununu shiin, na pee wa na gblee na yuu mbo, "Efiso Atemis wre wi jaŋgafun titi." 35A chia kre nyunↄfun wre na pan mna pe bre mna yo pe pan mbo, "Efiso bilɛ, kena ŋmbi uu wa tra ŋga nu a u n chin na wre Efiso leele o Atemis nyuŋgo kre le hin? A ŋmbi u n chin na ki dnɛ kpↄↄ kre, na nyjeeri kra yiri mu pan mu to tra hin? 36Kena ŋga ndro kro ki chin, a kakra n wa ki na ŋga, ki fna mbe e pieri komm mbe yaa krↄ kpↄↄ tɛɛ mbaa sisaa ka pe. 37Yaka ma, leele mblɛ e yii mu pan mna ŋga pe n nɛɛrɛ wo sumi ndoo kre na, a pe n jiɛnlɛ kee ka yo mu Atemis taan. 38Kena na Demɛtriu na u tutumblↄ wa na leele mblɛ kala ni rɛ, kala li ndoo kree wa, a ki kalalifɛɛnlɛ pree wa, kena ee jaa pan na e kala ni wa. 39A na kee fↄnyi yɛɛ wa na rɛ, oo jaa fni mbe yire gbeele. 40Kena na o n dↄↄ ta aŋga kee ŋga na kre, oo kala ta ki kro. Na kre ma, na ki pan na pe ni wie, mba kee ka chin mbe yo." 41Ŋga wra paara ma kre a wra leele pre nyina.

will be added

X\