Nyiɛkpↄↄ Bitumblↄ Hlɛ 18

1Kee nyjɛ kↄkro kre, Pↄↄl na yili Atene na mna sɛ Korinto na. 2Bawa wra Juda ndro wa nya, praa u yeeri Akwila, Ponto na pra u se. Na fuŋga wre na u chↄ Prisila yiri Italia na mu pan wa. Ŋgi na, na waŋgra lopom Klaudio mbra le na Juda leele kro pe yili Rom na. A Pↄↄl na sɛ pe shaari. 3Ŋga pe kro naa tnumu nunu tuni kre na, kra tia Pↄↄl na sɛ chaa mu tni na pe ni wa, a praa tnumu tuni. Na yonyi gbigbiri (tent) nyinyi yire yɛ pe siin. 4Ŋga wraa wa wa kre, pe wuuble kro nu kre wraa shie Judae fninyuŋgo na paara pe pan, imi kie pe mbe Griikie na Judae pre pe pe jawala chinɛ. 5Nyjila ŋga nu Silas na Timotio na yiri Makedonia na mna pan mu le wa kre, na Pↄↄl yiɛ nyina a wraa paara na dansiɛrɛ lii na Judae pre nyina na Yesu wi Kirsto wre. 6A ŋga Juda leele pre na u kee kre je, mna na jiɛnlɛ kee yuu kre, a wra u dodonyi nyaara mna yo pe pan mbo, "Na e waa ku kena yire pan ki yire, e sisam n wa ni na. Mu yire aŋga na shie kre, leele mblɛ pe n pe Judae pre pan mbe na kee kre yuu." 7Ŋga wra yiri wa kre a wra sɛ blↄ wa katoo, praa u yeeri Tito Justo, a wra pe Nyiɛkpↄↄ sumifun a u katoo naa wa Judae fninyuŋgo kre mbɛɛ na. 8Pe fninyuŋgo kre lopom ŋmba praa yeeri Krispↄs wre na u katoo leele kro na o Tafun wre shↄnli. A Korinto leele mblɛ pra kee kre loo kre tataara na shↄnli a pra pe ndrɛ je. 9Ki ble ka blee, Pↄↄl na yirɛ nya nyiɛlɛ na, a o Tafun na yo u pan mbo, "Maa fiɛ, maa shia pieri! Ta kee kre yuu. 10Nii wa mu kro, ndro wa kɛ taa mu na mbe mu tↄↄra. Nii wa na leele ni tataara chia ŋga na." 11Ŋga kra pan ma kre, Pↄↄl na tni Korinto na wa yɛlɛ nyu na nyiɛpↄ kↄↄnanu, na pe nyina Nyiɛkpↄↄ kee kre. 12Nyjila ŋga nu Galio na pan mu ŋunumu li Akaia tra nu kre, Juda leele pre kro na nyu ta nunu mna sɛ Pↄↄl yii mna sɛ na u ni lopom yiɛ na, kala lihaa wa. 13Mbo, "Blↄ ŋmba u leele jawala knai mbe pra Nyiɛkpↄↄ sumi kolo ŋga kre na mbra yire n nunu na." 14Ŋga Pↄↄl na yiri mbe kee kre nyu wↄ to, a lopom Galio wre na yiri mbo, "Juda leele, na kra pe na kee sisaa ka yi, ndee jiɛnlɛ kee ka na yi kre, mbe na ndie taa ki loo. 15La, ŋga ki pe mɛɛ na kee nyjɛ yi pe yire titi mbra kee ŋga ndra na, yire titi e ki le e yo. Mi yire kee nyjɛ kpra kuↄn je." 16A wra pe ni mna yili kala lihaa wa. 17A leele pre kro kro na fninyuŋgo kre lopom ŋmba praa yeeri Sostene wre yii mna u frↄ kalalihaa kre yiɛ na kama, hali Galio nsra nyu kun na pe ni. 18Nyjɛ kↄkro kre, Pↄↄl na kro wa ble tataara mna chin mna shↄnlifɛɛnlɛ pre ti wa, a wre na Prisila na Akwila naa shie Siria tra nu. Ŋga wra le Kenkria na kre, a wra u ndra klu. Ŋgi na, na u ki nyu yo mu tɛɛ. 19A pra yiri wa mna tro epo yiɛ na mna sɛ Efiso na, bawa wra Prisila na Akwila ti. Wre titi wraa shie Judae pre fninyuŋgo, a wre na pre naa nyu kna. 20A pra u tali na u tni pe jaara ble chiɛri yɛ, a wra je. 21Ŋga wra yo we sɛ kre a wra yo pe pan mbo, "Na Nyiɛkpↄↄ waa li ki na mbe ndru mbe pan na." A wra yili Efiso na mna sɛ krↄ bali, 22mna sɛ Kaisaria na, mna yiri wa mna sɛ shↄnlifɛɛnlɛ pre shaari Jerusalɛm na, mna tro mu sɛ Antokia na. 23Ŋga Pↄↄl na ble yɛ li wa kre, a wra sɛ kila Galatia na, na Frigia tra yire nu, na gbeŋmbaa leni twanfɛɛnlɛ pre praa wa wa kre nu. 24Kre nyjila kre nu kre, Juda ndro wa na pan Efiso na wa, u mɛɛ naa Apolo, a wra yiri Alɛksandria na, mna pe lewo ŋmba nyu kra kun mu Nyiɛkpↄↄ kee kre chin chichie. 25Wre Apolo ŋmba na pe klu mu u nyina chiɛri imi na o Tafun wre kolo nyi, a kra tia u yiɛ na shↄ. A wra ja na paara na Yesu kee yuu kama imi na ki fna. A nde nyjɛ krɛrɛ kre, na Jↄn ndra jee kee kre chiin pe u nyina. 26Efiso na wa kre, titɛɛ kre nu na u jaŋga tɛɛ na Nyiɛkpↄↄ kee kre yuu pe pan Judae fninyinyi nu na tro imi na kra fna. Kena ŋga Prisila na Akwila na u nya na Yesu kee kre chiɛri u chin kre, a pra u wru mna sɛ pe katoo mna sɛ u nyina chiriri kpↄↄ imi Nyiɛkpↄↄ kolo kre nyi. 27Ŋga wra kↄ na chaa mbe sɛ Akaia na kre, a shↄnlifɛɛnlɛ pre na u gbeŋmba mna hlɛ nyunↄ mna Akaia twanfɛɛnlɛ pre tro na pe u le chichie. Ŋga wra le wa kre, wra ya mblɛ pra yire Nyiɛkpↄↄ dumiɛ kre na mu shↄnli kre na tataara. 28Ŋga wre na Judae pre na nyu kna na peyɛ ni lete na kre, a wra pe nyina Nyiɛkpↄↄ kee kre pe nyunↄ mu tɛɛ kre nu na Yesu wi ŋmba Nyiɛkpↄↄ tun kre. A kra tia wra pe ja kama.

will be added

X\