Nyiɛkpↄↄ Bitumblↄ Hlɛ 17

1Ŋga Pↄↄl na Silas na yire wa kre, pra sɛ tro Amfipoli na Apolonia chiɛ yire na, mna sɛ Tesalonika chia kre na, na Judae fninyuŋgo kaa wa wa. 2A imi Pↄↄl naa piin nyjila tataara nu kre, wraa shie pe pan fninyuŋgo wa, wuuble nununu taarɛ nu, a wre na pre naa kee kre pe nyunↄ mu tɛɛ kre kna kna na peyɛ ni. 3A wraa pe nyina yi nↄↄ na dansiɛrɛ lii na kra fna na Kristo wre we kala nya, mbe pe u gbo mbe u ndruu nyi mbo, "Wre Yesu ŋmba kee ni yuu ŋga, wre wi Kristo, ŋmba Nyiɛkpↄↄ wↄ, wre." 4Ŋga Pↄↄl naa pe nyina kre, Judae pre plɛ na ki shↄnli, hali Griikie mblɛ praa Nyiɛkpↄↄ fiɛ kre tataara, na chiɛlɛ loplombo tataara, na kna mu taa Pↄↄl na Silas kro. 5Ŋga kra pan ma kre, Judae mblɛ pe nsra shↄnli kre yiɛ na nyina pe na, a pra sɛ lewaala plɛ wru mblɛ ndra kra sheli mna ya peyɛ na, mna kanyaa le chia kre nu, mna sɛ blↄ ŋmba praa yeeri Jesↄn kre tↄ u katoo, na pie Pↄↄl na Silas yii mbe kanyaa lefɛɛnlɛ pre ŋga. 6Ŋga pra Pↄↄl na Silas cha mu la kre, a pra Jesↄn na shↄnlifɛɛnlɛ pre plɛ tini mna sɛ na pe ni chia kre loplombo yiɛ mbo, "Leele mblɛ pe waŋgra yire mu paari kre, pe pan mna na. 7A Jesↄn pe shↄ mu tɛɛ u katoo, a pe kro na kee nyjɛ waŋgra lopom Kaisari yo na waa pe kre piin, na yuu na ŋunu waa wa na, a pra u yeeri Yesu." 8Ŋga lenɛɛrɛ pre na chia loplombo pre na loo ma kre, kra pe tↄↄra kpↄↄ, 9a pra swa shↄ Jesↄn na shↄnlifɛɛnlɛ pre pan mna pe wa, a pra sɛ. 10Ŋga kra pan ma kre, to a sumifɛɛnlɛ pre na Pↄↄl na Silas wa kolo blee kre, a pra yire wa mna sɛ Beria na. Ŋga pra le wa kre, a pra sɛ Judae pre fninyuŋgo. 11Judae mblɛ praa wa kre chia ŋga na kre na pe leele chichiele mu wɛ Tesalonika wolo pre na. Ŋgi na, pre na pe lɛɛ wↄ kama, mna pe kee kro loo. Nyjila kro nu, pan praa kee kre pe nyunↄ mu tɛɛ kre tↄↄnri na le na nyjɛ Pↄↄl na Silas naa yuu kre pe kpra ree mni hin? 12Kra tia a pe nɛɛrɛ na shↄnli, pre na Griiki chiɛlɛ loplombo tataara mblɛ praa wa wa kre na pe bilɛ tataara ni. 13Ŋga Judae mblɛ praa wa Tesalonika na kre na loo na Pↄↄl sɛ Nyiɛkpↄↄ kee kre yo Beria na kre, a pra u kↄŋgↄ ni wa na, mna pan mu kanyaa le bawa leele pre nu na. 14Titɛɛ kre nu, a shↄnlifɛɛnlɛ pre praa wa wa kre na Pↄↄl wa kolo na u sɛ epo nyu na, a wra sɛ mna Silas na Timotio ti wa. 15Leele mblɛ pra sɛ Pↄↄl wa kolo kre na sɛ le na u ni Atene na. A wra yire wa mna pe kla Silas na Timotio pan na pe u kↄŋgↄ ni nyaanyaa, a pra ndru mna sɛ. 16Ŋga Pↄↄl naa wa Atene na wa na pe sri kre, wra nya na chia kre sɛɛnlɛ bribri yi, a kra u tↄↄra kpↄↄ mu tro. 17Kra tia wra na Judae pre na leele pe n pe Judae mblɛ praa Nyiɛkpↄↄ fiɛ kre fni blenyini, a praa nyu kna na peyɛ ni pe fninyuŋgo wa. A ble nyini ŋga pan wre na mblɛ wraa fni jafa lawee kre naa nyu kna. 18Wre na Epikuro leele na Stoa leele kachimblɛ plɛ na sɛ fni. A pe plɛ naa wie mbo, "A yira ŋgi kee lewaa ŋmba ta na yuu ŋga hin?" A plɛ na kna mbo, "Ki pe na haka wolo sumiɛ ka nyini kee u yuu." Ŋgi na, Yesu kee na kunnyiɛ kee wraa yuu pe pan. 19A pra Pↄↄl yeeri mna sɛ na u ni pe fnihaa ŋga praa yeeri Areopago kre nu, mna sɛ u wie mbo, "O nyina mu kee fↄŋgↄ ŋga nↄↄ. 20Ŋgi na, kee nyjɛ mu yo a o loo nyjɛ krɛrɛ pe o pan kee fↄnyi. Ki tia o chaa mbe yi nↄↄ chin." 21Kena pre Atene leele pre na fumblↄ mblɛ praa wa chia kre na wa kre, pe nsraa kee ka ni na pini, na ŋga pie na kee fↄnyi nyjɛ yi lee chia kre na kre ndru mbra yuu bↄkↄ. 22Bawa Pↄↄl na yiri mu yire Areopago kre lalaa mna kna mbo, "Atene bilɛ, ni ja mu chin na kolo kro na kre, e sɛɛn sumi kaiin. 23Ŋga ni tro na e yirɛ nyjɛ e sumi yire dↄↄ taa kre, ni nyunↄmu yɛ nya e sragbuɛnlɛɛ yɛ na, mbo, 'Nyiɛkpↄↄ ŋmba o n chin kre wo yi ŋga.' Kena ŋmba e n chin na u sumi kre, wre kee ni e nyina kre. 24Nyiɛkpↄↄ ŋmba wra waŋgra ŋga gbeele na ki yira kro ni kre, wre wi nyjeeri na tra Tafun. A u n wa mu tni nyuŋgo ŋga pe kɛnyi tɛɛ mu sin nu. 25A u n lewo kɛ yira ka shia. Ŋgi na, wre u leele kro kro kaan ŋmaa na yira kro kro. 26A wre wra yire lewo nunu (Adam) na mu tia leele jiri mu tra nyi. A wre wra pe nyjila nyjɛ pie li tataara na pe tnihɛɛ krɛrɛ kun mu tɛɛ, 27na pe wre Nyiɛkpↄↄ haa cha, pie u gbra kun, mbe u chin. La, u haa n le na lewo ni. 28Wre nu o ŋmaa ta mu tni na shie na paan, na yira kro pini. Imi na e mɛkↄmblↄ pre plɛ nyina kre mbo, 'Wre lɛ Nyiɛkpↄↄ biile.' 29Kena na yɛŋgɛ yi na Nyiɛkpↄↄ biile lɛ wre waa, kena yaa ti mbe o jawa na Nyiɛkpↄↄ pe na swa nyiɛ, ndee swafiŋge, ndee dnɛ, ndee Nyiɛkpↄↄ ŋmba ndro kɛyira ndee lewo jawala yira we jaa tni u titɛɛ wi. 30Kre ndra na, nyjila ŋga ki tro a e n na u chin kre, Nyiɛkpↄↄ wre yiɛ wↄ yi na, la, fuŋgaami ŋga u yo na lawee nu, lewo kro u u jawala chinɛ. 31Ŋgi na, u ble ka wↄ mu tɛɛ, mbe ti mbe blↄ nunu ŋmba u wↄ mu tɛɛ kre paan waŋgra leele kro ŋga pe pimi na pe tam kpra na. Wre blↄ wre wra nyi mu yili kumu nu kre, mbe ki yire kre na mbe lewo kee ŋga shↄↄli." 32Ŋga leele pre na kunnyiɛ kee kre loo Pↄↄl nyu na kre, a pe plɛ naa u tɛɛ, a pe plɛ naa yuu mbo, "O mu kee kre chaa mbe loo na." 33Bawa Pↄↄl na chin mna yili wa. 34A leele pre plɛ na shↄnli mna taa u kro. Mblɛ pra shↄnli kre wa mɛɛ naa Dionisio, Areopago leele pre wa, na chlↄ wa wre mɛɛ naa Damari, na plɛ na mu ya.

will be added

X\