Nyiɛkpↄↄ Bitumblↄ Hlɛ 16

1Pↄↄl na yiri wa mna sɛ Derbi na Listra na. Listra na wa, na twanfun waa wa wa, a praa u yeeri Timotio, a wra pe Juda chlↄ shↄnlifun wa pↄ, a u lɛ na pe Griikie wo 2Wre Timotio ŋmba, shↄnlifɛɛnlɛ mblɛ praa wa Listra na Ikoniↄm na wa kre, na pe kro u mɛɛ chichie yeeri. 3A Pↄↄl naa chaa mbe sɛ na u ni mna tia a pra u fɛŋgɛ kun. Ŋgi na, na Judae plɛɛ wa wa, a pra chin na Griikie wo wi u lɛ. 4Ŋga praa tro chiɛ chiɛ yire na kre, a praa kee nyjɛ bitumblↄ pre na loplombo mblɛ praa wa Jerusalɛm na kre na pe ŋga kre yuu na sumifɛɛnlɛ pre nyina. 5Ŋga kra pan ma kre, sumifɛɛnlɛ pre na faŋga ta pe shↄnlie nu, mnaa nɛɛi na yaa. 6Ŋga praa shie kre, pra tro Frigia na Galatia tra nu. La, Kpra Ŋumu wre na pe tↄ na pia shia kee kre yo Asia waŋgra kre nu. 7Ŋga pra tro wa mna sɛ su Misia tra nyu na kre, a pra pe jawala pe na pie yↄ mbe sɛ to Bɛtani tra nu, a Yesu Ŋumu wre na je pe pan. 8A pra tro Mizaia tra kre nu mna sɛ chia ka na pe ki yeeri Troas. 9Ŋga pra le wa kre, ki blee a Pↄↄl na nya nyiɛlɛ na na blↄ wa yiri Makedonia na mu pan mu yire u yiɛ na u tali na, kun mu pan Makedonia na mu pan mu ya o na. 10Ŋga Pↄↄl na yirɛ yire nya nyiɛlɛ na ma kre, titɛɛ kre nu a o naa kolo chaa mbe sɛ Makedonia na wa. Ŋgi na, o na chin na Nyiɛkpↄↄ wra o yeeri wa na o sɛ ketaan kre yo mbe pe nyina. 11A o na krↄ bali mna yili Troas na, mna tro Samotrake tra mbɛɛ na. Ŋga ki nyiŋge na se kre, a o na le Neopoli na mna krↄ kre ti wa, 12mna yiri wa mna nyaari tra mna sɛ Filipi na, Makedonia tra kre kakpↄↄ na yi, a kra pe Romae chia. O na mu kre chia kre na chiɛri. 13Ŋga pe wuuble na to kre, a o na yili chia kre mbookrↄ mna sɛ lↄↄ ka mbɛɛ na mna o na shↄnli na Judae pre fnii na nyiɛtali. Bawa o na tni mna paara mna chiɛlɛ mblɛ pra pan mu fni wa kre kro nyina. 14Bawa chlↄ wa praa u yeeri Lidia, a wra yiri Tiatira na, mna na yonyi chichiele prɛ, mnaa Nyiɛkpↄↄ sumi, a o Tafun wre na u jawala nyaa na u kala ŋga Pↄↄl yuu kre loo. 15A kra tia a pra wre na u katoo leele kro ndrɛ je. A wra ndru na o tali, mbo, "Na e ni shↄnli na ni o Tafun wre shↄnli kpra ni waa, kena e pan e sɛ tni ni katoo." A wra o yii a o na sɛ tni u katoo. 16Ki ble ka ŋga o naa shie lawee ŋga nu praa fni na nyiɛtali kre, o na tnu bichable wa fni, na kↄmfↄↄrↄ ŋumu wa u nu. Imi wraa chlɛ na nyaa kre na tia a u tafɛɛnlɛ naa tnu taa tataara. 17Ŋga wra wre na Pↄↄl nya kre, a wra kna mu taa o kro na gblee leni mbo, "Leele mblɛ lɛ nyjeeri Nyiɛkpↄↄ sumifɛɛnlɛ mblɛ pe leele nyina ŋmaashↄmu kolo kre." 18Ble nyini ŋga pan wraa kre kee ŋga yuu na taari o kro. A kra kↄ mu Pↄↄl krↄ kun, a wra kna mna fuu u ŋumufↄↄn kre na mbo, "Ni yo mu pan Yesu Kristo wre mɛɛ kre nu na yili u nu mu sɛ." Titɛɛ kre nu wa to, a ŋumu kre na yili u nu. 19Ŋga chlↄ wre tafɛɛnlɛ pre na nya na pe kaanhaa kↄ kre, a pra Pↄↄl na Silas yii mna pe ŋunↄ mu sɛ chia kre lam loplombo pre yiɛ na. 20Ŋga pra sɛ pe le loplombo kalalifɛɛnlɛ pre kɛɛ kre mbo, "Leele mblɛ Juda leele lɛ, a pe pan na o chia kre klai. 21Pe pan na kolo ka sembremu nyina, ŋga na ki n fna mbe o taa ndee mbe pe, na o pe Romae kre ndra na." 22Ŋga pra loo ma kre, lenɛɛrɛ mblɛ praa wa wa kre krↄ na kun na Pↄↄl na Silas ni, a loplombo kalalifɛɛnlɛ pre na Pↄↄl na Silas dodonyi tini mu knumu pe na, mna yo na pe pe frↄ na fuɛ ni. 23Ŋga pra pe gbun kama mu kↄ kre, a pra sɛ pe le nyuŋgo mna yo ki lefun wre pan na u pe le chiriri. 24Ŋga pra yo ma wre pan kre, a wra sɛ pe le nyuŋgo lam wo kre nu, mna pe jeelee yii mu pↄ tuŋmble na. 25Kie pe ndroo kre, Pↄↄl na Silas na yiri na nyiɛtali, na mɛɛ koni na Nyiɛkpↄↄ kaan, a leele mblɛ praa wa nyuŋgo wa na kre na ndie tɛɛ na mɛɛ yire ndru. 26Titɛɛ kre nu, na tra seeri badaaŋga mu sɛ su nyuŋgo kre nↄↄ na, a krↄɛ yire na nyaala a pe asɛɛrɛ yire kro na saanla. 27Ŋga ndro ŋmba wraa pe sri kre na nyi mu da na krↄɛ yire nyaala mu tni kre, a wra u brↄfiɛn tini mbe uyɛ gbo. Ŋgi na, wra jawa na mblɛ pee wa nyuŋgo wa kre fɛ. 28A Pↄↄl na kna mu fuu u na mbo, "Maa shia muyɛ pe sisaa ka, o kroo wa!" 29A wra tia pra pan na kaniɛ ni a wra tin mu le pe kro, fiɛrɛ na titom ni, mna hɛ to Pↄↄl na Silas yiɛ. 30Ŋga wra yili na pe ni fimi na kre, a wra kna mu pe wie mbo, "Ni tafɛɛnlɛ, kee ŋgi nunu mbe pe mbe ŋmaa ta hin?" 31A pra kna mbo, "O Tafun Yesu Kristo wre shↄ mu li. We ŋu na mu katoo leele kro ŋmaa shↄ." 32Bawa Pↄↄl na Silas na yire mna o Tafun wre kee yo blↄ wre na u katoo leele kro pan. 33A wra Pↄↄl na Silas wru blee kre, mna pe fuɛ klɛ yire je pe pan mna tia a pra wre na u katoo kre kro leele ndrɛ je. 34A wra ndru mna pe wru mna sɛ u katoo mna sɛ pe ŋga sro. A wre na u katoo leele yiɛ na shↄ kpↄↄ na pe Nyiɛkpↄↄ shↄnli. 35Ŋga nyiŋge na se kre, loplombo kalalifɛɛnlɛ pre na prosie tun na pe paan yo blↄ wre pan na u leele shiin pre wa mbe pe sɛ. 36A blↄ wre na ki yo Pↄↄl pan na pe yo ni e wa mbe e sɛ, kena e yili e sɛ wejinyiŋge ni. 37A Pↄↄl na kna mu yo pe pan mbo, "Ŋga pe o yii pe n o kee li mu yo o pimi li, mna tia pra o frↄ lete na, mna tia pe pan mu o le nyuŋgo wre Romae waŋgra biile, fuŋga pe chaa mbe o wↄↄ wa mbe ndro wa chin rↄ? Ↄↄnhↄn! E ti mbe pre titi paan o wↄ." 38Ŋga prosie pre na sɛ kee ŋga yo ma kalalifɛɛnlɛ pre pan kre, fiɛrɛ na ndru mu pe yii. Ŋgi na, Pↄↄl na Silas rɛ, Roman waŋgra biile titi na lɛ. 39A pra pan mna pe ŋga dipim mna pe wↄ nyuŋgo kre nu, mna pe tali na pe yili chia kre na. 40Ŋga pra yili nyuŋgo wa kre, a pra sɛ Lidia katoo, mna sɛ pe wolo shↄnlifɛɛnlɛ pre fni wa mna paara pe pan, mna pe gbeŋmba, mna yire wa mna to kolo mna sɛ.

will be added

X\