Nyiɛkpↄↄ Bitumblↄ Hlɛ 15

1Nyjila ŋga nu Pↄↄl na Banabas naa wa Antokia na kre, bilɛ plɛ na yiri Judea tra nu mna pan wa, mna na shↄnlifɛɛnlɛ pre nyina na fↄŋga pe taa Mbose paala yire na mbe pe pe fɛnyi knumu, kre pie chiin pe ŋmaa shↄ. 2A Pↄↄl na Banabas na pre na ki kakra li paa mna peyɛ wie kee bɛɛlɛ tataara mna sɛ yiɛ. Ŋga kra pan ma kre, a pra leele plɛ wↄ mna ya Pↄↄl na Banabas na, na pe sɛ Jerusalɛm na mbe sɛ kee kre yiɛ cha chiriri bitumblↄ pre na loplombo pre pan. 3Ŋga pra pe tun a praa shie kre, pra tro Foinika na Samaria na, mna yo shↄnlifɛɛnlɛ pre pan imi na leele mblɛ pe n pe Judae pre kee kre shↄnli mu pe jawala chinɛ. Kre kee ŋga na pan na yɛshↄↄrↄ ni shↄnlifɛɛnlɛ pre nu paa. 4Ŋga pra le Jerusalɛm na kre, shↄnlifɛɛnlɛ pre na bitumblↄ pre na sumifɛɛnlɛ loplombo mblɛ praa wa wa kre na pe ŋga mmaŋge chiriri. A pra pe nyina nyjɛ Nyiɛkpↄↄ na pe tɛɛ mu pe. 5Bawa Farisiie shↄnlifɛɛnlɛ mblɛ praa wa pe nu kre na yiri mna yo na ki fna mbe pe mblɛ pe shↄnli kre fɛnyi knumu, mbe pe taa mbra nyjɛ Mbose na pe ŋga yire na. 6A bitumblↄ pre na loplombo pre na sɛ fni mbe kee kre jawa. 7Ŋga pra kee kre nyu kna chiin kre, bawa Pita na yiri mna yo pe pan mbo, "Ni wolo, yire titi chin na jle kre Nyiɛkpↄↄ na ni wↄ e nu na ni nyu kayolo na kie yire mbe leele mblɛ pe n pe Judae pre Nyiɛkpↄↄ ketaan kre loo mbe shↄↄli. 8A Nyiɛkpↄↄ ŋmba u ndro loloŋgo kee chin kre, na pe dansiɛrɛ li na Kpra Ŋumu wre u pe ŋga kre ni, imi na wra o ŋga u wi kre. 9Nyiɛkpↄↄ nsra yaka nyina na o yili oyɛ na pe ni, la, wra pe shↄnlie le mna pe lam je mu yili nɛɛrɛ nu. 10Kena yira ŋgi ki tia e na Nyiɛkpↄↄ pini na le na kee nyjɛ wre na o tolɛɛlɛ pre kuraa n da mu ja mu pe tun kre, wru na twanfɛɛnlɛ pre piin ŋga hin? 11La, o shↄnli na Yesu Kristo dumiɛ kre ni we o shↄ imi na u pe shↄ kre chↄↄ." 12Ŋga kra pan ma kre lenɛɛrɛ pre na pieri na Pↄↄl na Banabas kawako kee nyjɛ Nyiɛkpↄↄ yire pe na mu pe leele mblɛ pe n pe Judae pre nu yire ndru. 13Ŋga Pↄↄl na Banabas na paara a pe nyu na to kre, a Jemisi na yiri mna paara mbo, "Ni wolo, e le, e ndie tɛɛ ni pan. 14Siimↄn Pita paaraa kre nu kre, u nyina imi na Nyiɛkpↄↄ na klu mna uyɛ wↄ mna leele mblɛ pe n pe Judae pre nyina, mna plɛ wↄ pe nu mu le u mɛɛ nu. 15Yire kee nyjɛ Nyiɛkpↄↄ kee nyanyofɛɛnlɛ na yo mu tɛɛ kre mbo, 16'Nyjɛ krɛrɛ kↄkro kre, mbe ndru mbe Devid ŋunumulie ŋga kra to kre yire mbe u sele ndro ŋga ki yi na. 17Imi kie pe mbe leele hamblɛ pre Nyiɛkpↄↄ haa cha, hali leele mblɛ pe n pe Judae mblɛ ni yeeri mu pan ni mɛɛ nu kre kro. 18O Tafun Nyiɛkpↄↄ wra tia pe kee nyjɛ krɛrɛ chin mu yire jle kre, wre wra kee ŋga yo.' 19Kena kee ŋga ni ta mbe yo yi na, yaa shia leele mblɛ pe n pe Judae mblɛ pe chinɛ mu Nyiɛkpↄↄ chin kre tↄↄra. 20La, ki fna mbe o nyunↄ mbe hɛ pe ŋga na pe pe kɛ wↄ sɛɛn kee nu, na tɛtiɛrɛɛ, na yurↄ ŋmba nyimi ki n wo tra, a u ku. 21Ŋgi ndra na, mu yire fafa kre, na Mbose wa na leele ni chia na, a praa u mbra yire tↄↄnri na yuu leele pan wuu ble kro nu." 22Ŋga kra pan ma kre, a bitumblↄ pre na loplombo na sumifɛɛnlɛ pre kro na ki jawa na ki fna pe leele plɛ wↄ mbe ya Pↄↄl na Banabas na, mbe pe sɛ Antokia na. A pra Judas ŋmba praa yeeri Banabas wre na Silas wↄ mna ya pe na, pre leele mblɛ na pe leele mblɛ pra shↄnli kama. 23A pra hlɛ nyunↄ mna le pe kɛɛ. Mbo, "Wre bitumblↄ na loplombo na o wolo mblɛ pee wa mna kre kro, o o wolo mblɛ pe n pe Judae mblɛ pee wa Antokia na Siria na Kilikia na kre shaari. 24O loo na leele plɛ na yili o nu mna pan mu e tↄↄra chiin na kayolo ni, mu tia e jawala n to e nu, a nde o nsra ndro tun. 25Ki tia ŋga o ki loo kre, a o nyu nunu ta na ki fna mbe o leele wↄ mbe ya o wolo Pↄↄl na Banabas na, 26mblɛ pe peyɛ wru mu tɛɛ hali na kumu yi kuraa, mbo, pie ku o Tafun Yesu Kristo wre ndra na kre, na pe pan wa. 27Kena Judas na Silas rɛ, pre pie paan o kala ŋga o nyunↄ e pan kre yo e pan na nyu ni. 28Ki nyu wre na Kpra Ŋumu wre pan na waa kee kpↄↄ ka taa e na, fↄna mbra nyjɛ yi shian nyjɛ, 29na ki fna mbe e eyɛ wↄ mbe yili sra nyjɛ e woni na sɛɛnlɛ kaan kre nu, na nyimi, na yurↄ ŋmba nyimi ki n wo tra, na tɛtiɛrɛɛ nu. Kena na e ja mu eyɛ wↄ mu yili yire kee nyjɛ nu kre, kena e ka pe titi, Nyiɛkpↄↄ we ya e na." 30Ŋga pra sɛ pe wa kolo kre, a pra sɛ Antokia na. Ŋga pra le kre a pra tia sumifɛɛnlɛ pre kro na fni, a pra hlɛ kre wↄ mna pe ŋga. 31Ŋga pra hlɛ kre tↄↄnri mu loo kre, pe yiɛ na shↄ, imi na pra paara mu pe nyina hlɛ kre nu kre na. 32Bawa Judas na Silas, mblɛ pra pe Nyiɛkpↄↄ kee nyanyofɛɛnlɛ kre na yiri mna paara mna pe nyina tataara, mna pe le faŋga. 33Ŋga pra tni wa mna ble chiɛri yɛ li kre, a shↄnlifɛɛnlɛ pre praa wa wa kre na pe wa kolo na wejinyiŋge ni a pra ndru mna sɛ mblɛ pra pe tun kre jaara. 34Silas rɛ, wre na yo na ki fna mbe u tni Antokia na wa chiɛri. 35A na kre nyjila kre, na Pↄↄl na Banabas na leele tataara wa Antokia na wa na o Tafun wre ketaan kre yuu na leele nyina. 36Ŋga pra tni wa ble chiɛri yɛ kre, a Pↄↄl na yo Banabas pan mbo, "Ti mbe o ndru mbe tro tro chiɛ nyjɛ na o na o Tafun wre kee kre yo mu tro kre na, mbe pe le imi na pe nyi." 37A Banabas naa chaa mbra Jↄn Marko wru mbra taa pe na. 38A Pↄↄl na kna mbo, "Ki n fna mbe o ndro ŋmba wra o ti Pamfilia na mna ndru o kro kre wru mbe taa oyɛ na na." 39Kre kee ŋga na, pe nyu nsra soo kuraa, a kra tia pra yↄↄlɛ. A Banabas na Marko bali mna ya uyɛ na a pra sɛ krↄ bali mna sɛ Kipro na. 40A Pↄↄl na Silas bali mna ya uyɛ na, a shↄnlifɛɛnlɛ pre na pe wru mu le Nyiɛkpↄↄ kɛɛ, a pra sɛ, 41mna tro Siria na Kilikia tra yire nu, mna sumifɛɛnlɛ pre le faŋga.

will be added

X\