Nyiɛkpↄↄ Bitumblↄ Hlɛ 13

1Sumifɛɛnlɛ pre praa wa Antokia na kre, Nyiɛkpↄↄ kee nyanyofɛɛnlɛ na ketaan kre nyinafɛɛnlɛ naa wa pe nu. Banabas Siimiↄn, ŋmba praa yeeri lewↄↄ kre na Lusio ŋmba wra yiri Kirene na kre, na Manean ŋmba pra wre na Ŋunu Hɛrodi chaa mu pↄↄri katoo nunu nu kre, na Sↄↄl, pe kro naa wa wa. 2Ŋga praa wa wa na Nyiɛkpↄↄ sumi na ble funi kre, a Kpra Ŋumu wre na yo pe pan mbo, "E Banabas na Sↄↄl wↄ e ni ŋga mbe pe sɛ tnumu ŋga na ni pe yeeri kre tun mbe ni ŋga." 3Ŋga kra pan ma kre, pra blefuↄn na nyiɛtalaa wru mna kɛnyi taa taa pe na, mna pe wa kolo a pra sɛ imi na Kpra Ŋumu wre na yo pe pan kre. 4Ŋga Kpra Ŋumu wre na pe tun kre, a pra sɛ Seleukia na, mna yiri wa mna sɛ krↄ bali mu sɛ Kipro, epo lalaa waŋgra kre na. 5Ŋga praa shie mna da Salami na kre, a pra tii wa mna Nyiɛkpↄↄ kee kre yo Judae pre fninyinyi yire nu wa. Na Jↄn ŋmba praa yeeri Marko wre wa mu ya pe na. 6Ŋga pra epo lalaa tra kre kila mna sɛ da Pafo na kre, bawa pra Judae wo kafinɛ Nyiɛkpↄↄ kee nyanyofun, dobodobofun wa da, u mɛɛ naa Baryesu. 7Wre wraa wa mna mbra waŋgra lopom Sergio Pↄlos kachiŋu wre na. Wre waŋgra lopom ŋmba wra Banabas na Sↄↄl yeeri, mnaa chaa mbe pe Nyiɛkpↄↄ kee yo mbe u loo. 8Kre Baryesu ŋmba pra ndru na yeeri Elima Griikie yolo nu, a wraa dobodobo woni na pe nyu kaanri, mbe lopom wre wa pe ketaan kre shↄↄli. 9Bawa Sↄↄl ŋmba praa yeeri Pↄↄl wre, ŋmba nu Kpra Ŋumu wre na nyi kre na blↄ wre le dumm, 10mna kna mbo, "Ŋu Sutna pↄ. Ŋu ŋmba mu kee chichiefun na kala fnɛ na leele fana, ma Nyiɛkpↄↄ kofrakaa kre fɛɛlɛɛ tii? 11Le, o Tafun wre we kɛ laa mu na mbe mu fun nyiɛlɛ na, mbe ma yila nya mbe sɛ su nyjila ŋga wre titi chaa nu." Titɛɛ kre nu to, na lawee pe u yiɛ na suu, a lawee na wↄ u yiɛ na a wra kaari fuun, mnaa ndro chaa mbe u u yii kɛ na. 12Ŋga abani lopom wre na kee nyjɛ nya ma kre, o Tafun kee kre na pe u pan kawako ni mu tro, a kra tia a wra shↄnli. 13A Pↄↄl na u wolo pre na yili Pafo na mna tni krↄ nu mna sɛ Perge ŋga kii wa Pamfilia tra na kre na. Bawa Jↄn Marko na pe ti wa mna ndru mu sɛ Jerusalɛm na. 14A pra yili Perge na wa mna tro mu sɛ Antokia ŋga kii wa Pisidia tra nu kre na. Ŋga pe wuuble na to kre, a pra sɛ Judae fninyuŋgo wa mna sɛ tni. 15Ŋga pra pe Mbose mbra yire tↄↄnri mna Nyiɛkpↄↄ kee nyanyofɛɛnlɛ hlɛ yire tↄↄnri mu kↄ kre, a fninyuŋgo wa loplombo pre na tia pra hɛ pe wie mbo, "O wolo, na ee wa na kee ka ni mbe paaraa leele pre nyina kre, ee jaa paara." 16Bawa Pↄↄl na yiri mu yire, mna kɛ wa pe pan mbo, "Israel bilɛ na yire mblɛ e n pe Judae mblɛ e Nyiɛkpↄↄ fiɛ, e ni kee ŋga loo. 17Nyiɛkpↄↄ ŋmba Israel leele sumi kre, wre wra o tolɛɛlɛ wↄ mna pe pe lekpↄɛ nyjila ŋga ni praa wa Egypt na kre, mna u jaŋga tɛɛ mna pe wↄ pe tnimu kre nu. 18A pra ndikana pe u na, ande wra pe dumbrɛ yɛlɛ fuloe shiin fimi tra kre nu. 19Ŋga pra sɛ da Kenaan tra nu kre, Nyiɛkpↄↄ na tia a pra waŋgra nununu kↄↄnashin kla wa. A wra tra yire wru mu pe ŋga. 20Kre kↄkro, a Nyiɛkpↄↄ na pe ŋga yɛkulo mna sɛ su Nyiɛkpↄↄ kee nyanyofun Samuel na, yɛlɛ lafɛɛ jijirɛ na fuloe shiin na kɛ nyu na. 21Kre nyjila ŋga kↄkro kre, a pra Nyiɛkpↄↄ tali na u pe ŋga ŋunu. A Nyiɛkpↄↄ na pe ŋga Sↄↄl, Kish pↄ, ŋmba wra yiri Benjamin sele nu kre, a Sↄↄl na pe ŋunumu li yɛlɛ fuloe shiin. 22Ŋga Nyiɛkpↄↄ na Sↄↄl yire jↄↄn kre na kre, a wra tia pra Devid tɛɛ ki na, ŋmba dansiɛrɛ Nyiɛkpↄↄ na li mna yo mbo, 'Ni nya na Devid, Jɛsi pↄ wre, pe ni loloŋgo ndro, ŋmba we kee nyjɛ ni chaa pe mbe ni ŋga.' 23Wre Devid ŋmba kɛ leele na Nyiɛkpↄↄ yire mu Israel leele ŋga Yesu, ŋmaashↄfun ŋmba nyu wra le kre. 24Ŋga Yesu nsra ta mu u tnumu nↄↄ hle kre, na Jↄn klu mu na jawala chinɛɛ na ndrɛ jee kee kre yuu Israel leele kro pan. 25Ŋga Jↄn naa shie mbe sɛ tnumu kre nyu le kre, wra pe wie mbo, 'E jawa na mi wi ŋmaashↄfun wre ree? Mi ma, la, uu wa ni kro na paan, a mi n fna na u kpawrɛ kuraa na mbe kɛ taa yi na.' 26Kena ni wolo Israel leele, yire Abraham kɛ leele, na yire mblɛ e n pe Judae mblɛ e Nyiɛkpↄↄ fiɛ kre, wre na yire kro pe nyina kolo ŋga na oo tro mbe ŋmaashↄmu kre ta. 27A na Jerusalɛm leele na pe loplombo pre nsra chin na pe ŋmaashↄfun wi, ndee mna kee nyjɛ Nyiɛkpↄↄ kee nyanyofɛɛnlɛ pre na yo mu tɛɛ, a praa yi tↄↄnri nyjila kro nu wuuble kre nↄↄ loo. Kre ndra na, pra u gbun kumu pimi ni, imi na pra ki nyunↄ mu tɛɛ fa na kie pe kre chↄ. 28A nde pe nsra pimi kee chiriri ka ta mna u taan, na ki fna mbe u ku, nde pra je mna yo Pilato pan na u u gbo. 29Ŋga pra u pe krɛrɛ mu kↄ imi na pra ki nyunↄ fa mu yo kre, a pra u laa kaan kre na mna sɛ u le dnɛwee ka nu. 30A Nyiɛkpↄↄ na u nyi mna yili kumu nu. 31A wra uyɛ wↄ ble tataara nu mna wre na mblɛ pra yiri Galilii na mna sɛ Jerusalɛm na kre nyina. Pre lɛ u dansiɛfɛɛnlɛ mu waŋgra kro ŋga. 32Kena e chin na fa kre Nyiɛkpↄↄ na u nyu yo o tolɛɛlɛ pre pan. A u Yesu nyi mu yili kumu nu mu li u nyu kee kre na. Kre kee o pan mbe yo e pan kre, imi na pra ki nyunↄ mɛɛ hlɛ kre nu, ndra shiin wo kre nu kre, mbo, 'Ni pↄ wi ŋu, a aŋga ni mu se.' 34A ŋga kra nyina na ŋga Nyiɛkpↄↄ u nyi kre, na wa fↄↄn na kre, a pra ki nyunↄ mu tɛɛ na, 'Mbe mu ŋga faŋga na dwamu cheche ŋga ndaa Devid ŋga kre.' 35Kre ndra na wra yo Mɛɛ Hlɛ kre nu lawee fↄŋgↄ nu na wa ti mbe u Ndro Cheche wre fↄↄn wee. 36La, Devid ŋmba pan Nyiɛkpↄↄ na kee nyjɛ yo kre, wra sumi imi na kra fna Nyiɛkpↄↄ pan. A wra kↄ mu ku, a pra sɛ u le lawee ŋga nu pra u lɛɛlɛ le kre, a wra fↄↄn. 37La, ŋmba Nyiɛkpↄↄ nyi mu yili kumu nu kre, u n ja mu fↄↄn. 38Kena ni wolo, e ja e chin na wre Yesu ŋmba na ki nyaari a o na sisam tinkɛɛ kre kee yuu na e nyina kre. 39A u jaŋga nu ŋu ŋmba mu u shↄↄli kre, mu mu sisam tinkɛɛ ta yira kro haa, ŋga Mbose mbra wa jaa pee mu ŋga. 40Kena e eyɛ le chichie mbe kee yire Nyiɛkpↄↄ kee nyanyofɛɛnlɛ pre yo mu tɛɛ kre waa shia pan e na. 41Mbo, 'Kena e le, yire mblɛ e pna Nyiɛkpↄↄ kee ni, kie e pe kawako ni mbe e ku. Ŋgi na? Ni kee pe e nyjila ŋga nu, ŋga yaa shↄↄli hali na pe ki yo e pan.' " 42Ŋga Pↄↄl na Banabas na yili pe sumindoo wa mbe sɛ kre, a leele pre na pe tali na pe paan paara mbe pe nyina wuuble ŋga kie pan kre nu. 43Ŋga pra paara mna kↄ mbe nyina kre, a Judae pre na leele mblɛ pe n pe Judae mblɛ praa wa Judea sumiɛ kre nu kre tataara na taa Pↄↄl na Banabas kro, a pra sɛ paara mu pe jaari na pe tni Nyiɛkpↄↄ dumiɛ kre nu. 44Ŋga pe wuuble na ndru mu to na kre, chia kre leele pre nɛɛrɛ na sɛ fni mbe Nyiɛkpↄↄ kee kre loo. 45Ŋga Judae pre na lenɛɛrɛ pre nya ma kre, kra pe pe yɛnyiɛ, a pra sɛ na paara na Pↄↄl kee yire wraa yuu na leele pre nyina kre lii kakra, na paara na u tɛɛlɛ. 46Bawa Pↄↄl na Banabas na paara pe pan gbuntitirem ni, mbo, "Kaa ki fna mbe ketaan kre, mbe o na klu mbra ki yo yire Judae pan tun. La, mu yire ŋga e kee kre je, mu nyina na e n fna blenyini ŋmaa kre nu kre ndra na, ki tia oo kna mbe sɛ kee kre ni leele mblɛ pe n pe Judae pre pan. 47Pan o Tafun wre na paara mu yo o pan mbo, 'Ni e wↄ mbe e pe leele mblɛ pe n pe Judae pre kaniɛ, na e sɛ waŋgra ŋga nyukↄↄnrↄ na, mbe pan na pe ni ŋmaashↄmu kre nu.' " 48Ŋga leele mblɛ pe n pe Judae pre na ki loo ma kre, pe yiɛ na shↄ a pra tia Nyiɛkpↄↄ kee kre yiɛ na yili. A pe mblɛ o Tafun na wↄ mu le ŋmaashↄmu kre nu kre na shↄnli. 49Ŋga kra pan ma kre, Nyiɛkpↄↄ kee kre na kpali mu tro tra kre nu kro. 50A Judae pre na wɛɛri waŋgra chiɛlɛ loplombo Nyiɛkpↄↄ fiɛfɛɛnlɛ na chia loplombo pre na, a pra prara kanyaa le Pↄↄl na Banabas nu mu pe ni mu yili tra kre na. 51A pra yili tra kre na mna pe jeelee lam tra pↄ mu wo wa mbe ki pe sisam dansiɛrɛ li. A pra sɛ Ikoniↄm na. 52La, twanfɛɛnlɛ pre pra kro Antokia na kre na yɛshↄↄrↄ ta, a Kpra Ŋumu wre na pe nyi.

will be added

X\