Nyiɛkpↄↄ Bitumblↄ Hlɛ 12

1Kre nyjila kre nu Ŋunu Hɛrodi na yiri mna shↄnlifɛɛnlɛ pre plɛ fiŋge imi na kra fna, 2mna Jↄn chunu Jemisi gbo na brↄfiɛn ni. 3Ŋga Hɛrodi na nya na kee kre wra pe kre tna Judae pre pan kre, wra tia pra sɛ Pita yii na, na kre nyjila kre pe pe Klɛntro ble yire lii. 4Kre ndra na wra tia pra sɛ u le nyuŋgo, mna u wru mu le sojae feko jijirɛ kɛɛ, pra u sri. Feko biaa nu praa leele jijirɛ. Hɛrodi na u jawala pe na, na pe Klɛntro ble yire li mu kↄ kre, mbe u u wru mbe Judae pre ŋga mbe pe u kala li. 5Kra tia Pita naa wa nyuŋgo wa, a la, shↄnlifɛɛnlɛ pre na sɛ nyiɛtalaa kpↄↄ nu mna u ŋga. 6Ŋga kra kro ble nunu ŋga Hɛrodi na tɛɛ mbe paan Pita wↄ mbe u kala li kre, ki blee na Pita wa mu sni sojae shiin lalaa, a pe jlↄnyi tɛɛ mu u pↄ, a lawee kre shiefɛɛnlɛ wa mu yire yire krↄ kre nyu na na u sri. 7Titɛɛ kre nu na Nyiɛkpↄↄ bituŋu ŋmba u yire u jaara, a nyuŋgo kre lam fniŋge poŋgo na kaniɛ ni pe le wa. A wra Pita gbun mu nyi mbo, "Yiri nyaanyaa!" Titɛɛ kre nu to, a jlↄnyi nyjɛ ni pra u pↄ kɛnyi na kre na pile mu wo. 8A Nyiɛkpↄↄ bituŋu wre na kna mu yo u pan mbo, "Muyɛ grere, mu mu kpawrɛ le." A wra uyɛ kna. A wra ndru mu yo u pan mbo, "Mu yoŋgo wru ɛ, mu taa ni na." 9A Pita na yiri mna taa u kro. Kre nyjila kre krɛrɛ na u n chin na keyɛŋgɛ ki piin wra jawa na yirɛ u nyaa nyiɛlɛ na. 10A pra shiefun ŋmba wra yiɛklu kre tro mu shiin wo wre tro mna pan mu da tↄↄnrↄ krↄ kre na, mna mu tro mbe to lete na kre na. Titɛɛ kre nu, na kre titi nyaa kiyɛ. A pra yili fimi na mna to lete kre na na shie to, a Nyiɛkpↄↄ bituŋu wre na fun u yiɛ na. 11Bawa Pita yiɛ na chin mu chieri u na, a wra kna mbo, "Fuŋga ni chin na Nyiɛkpↄↄ u u bituŋu tun na u pan mbe ni wↄ mbe yili Hɛrodi kɛɛ, na kee nyjɛ Judae wra ni pe nu." 12Ŋga Pita yiɛ na chieri u na wa kre, a wra sɛ Maria katoo, ŋmba pↄ na wi Jↄn ŋmba praa yeeri Marko wre. Na kre katoo kre nu shↄnlifɛɛnlɛ pre tataara sɛ fni na nyiɛtali. 13A Pita na sɛ pe jlonwee nyu krↄ kre koori, a bichable tnu wa (U mɛɛ naa Roda) na pan mbe krↄ kre nyaa. 14Ŋga wra da krↄ kre na mna Pita mana loo kre, ki yɛshↄↄrↄ ndra na u nsra krↄ kre nyaa, a wra fɛ mna sɛ yo shↄnlifɛɛnlɛ pre pan mbo, "E le! Pita wa mu yire krↄ kre kro." 15A pra kna mu yo bichable wre pan mbo, "Tↄↄlↄ mu tↄↄlↄ kre." A wra je, mbo, "Yɛŋgɛ na ni nyi." A pra kna, mbo, "Kena u ndile yi hin." 16Na Pita wa mu yire na krↄ kre koori, a pra sɛ krↄ kre nyaa, na Pita wi yɛŋgɛ, a kra pe pe kawako ni mu tro. 17A Pita na kɛ wa pe pan, na pe pieri. A wra yire wa mna pe nyina, imi na o Tafun wre na sɛ u wↄ nyuŋgo wa kre krɛrɛ yo pe pan. A wra kna mu yo pe pan na pe sɛ kee yire krɛrɛ yo Jemisi na shↄnlifɛɛnlɛ hamblɛ pre pan. A Pita na yili wa mna sɛ ndoo ka nu. 18Ŋga nyiŋge na se, a sojae mblɛ praa lawee kre sri kre na yiri mu Pita cha mu la kre, pra nyjira peyɛ nu, na jawa na yira ŋgi ki Pita wru hin? 19Ŋga Hɛrodi na kↄ mu Pita cha mu la kre, a wra shiefɛɛnlɛ pre wie imi na ki le, mna tia pra pe gbo. A Hɛrodi na kↄ mu yiri Judea na mna sɛ tni Kaisaria na. 20Kra kↄ mu pan na Hɛrodi krↄ na kun na Tiro leele na Sidon leele ni. A yire chiɛ shiin nyjɛ leele na nyu nunu wru mna sɛ to ŋunu katoo wa lopom paa wa na, u mɛɛ naa Blastom mbe u sɛ Hɛrodi tali pe pan. Yaka ma kra tia, na pre leele pre rɛ, na ŋunu wre tra na pe sro taa na lii. 21Ŋga ble ŋga pra tɛɛ mbe kala kre yo kre na da kre, Hɛrodi na u ŋunumu dodoŋgi le, mna sɛ tni u jↄↄn na, mna paara leele pre pan. 22A leele pre pra fni wa kre kro naa gble, mbo, "Aa! Nyiɛkpↄↄ u paara kre, ki n pe lewo mana yi." 23Titɛɛ kre nu wa to, a Nyiɛkpↄↄ bituŋu na pan mna tia a yira na Hɛrodi gbun, a wra yaa. Ŋgi na, wra Nyiɛkpↄↄ yɛnyiŋge kre wru. A kra tia a dↄmblↄ na yili u nu mna u ka mu gbo. 24A la, Nyiɛkpↄↄ kee kre na nyina mna chirɛ. 25Ŋga Banabas na Sↄↄl na pe tnumu kↄ Jerusalɛm na wa kre, a pra ndru mu yili wa, mna Jↄn, ŋmba praa yeeri Marko kre wru mu ya peyɛ na, mna sɛ Antokia na.

will be added

X\