Nyiɛkpↄↄ Bitumblↄ Hlɛ 11

1Ŋga kra pan ma kre, bitumblↄ pre na shↄnlifɛɛnlɛ mblɛ praa wa Judea na kre na loo na waŋgra leele pre Nyiɛkpↄↄ ketaan kre shↄnli na. 2Kra tia ŋga Pita na ndru mu pan Jerusalɛm na kre, Judea leele shↄnlifɛɛnlɛ pre na sɛ u yiɛ gbun, 3na, "Mni a mu sɛ leele mblɛ pe n pe Judae a pe n pe fɛnyi knumu lawee mu chaa mu li na pe ni hin?" 4A Pita na chin mu yire wa, mna pe nyina ki nↄↄ nununu, 5mbo, "Ki ble ka ndaa wa Jopa na, na nyiɛtali, ba ndaa nya nyiɛlɛ na, na yira ka pe na mbↄfiŋge yi badaaŋga, a pe ki pↄ ki kokoe jijirɛ na mna yiri nyjeeri mna tii tra mu to ni yiɛ tata. 6Ŋga ndaa ki le chiriri kre, na yurɛ mblɛ pee wa tra ŋga na kro plɛɛ wa ki nu, puɛ yurɛ, na hanyiɛlɛ, na yurɛ mblɛ pe fulo gbun na kro ni. 7Bawa ndaa loo na mana ka yuu ni pan mbo, 'Pita, yiri! Ta kuu mna kaa!' 8A ndaa kna mu yo mana kre pan na, 'Ↄↄnhↄn, ni Tafun, yira ŋga pe fun na yira ŋga ki n pe cheche n da mu le ni nyuu tun.' 9A mana kre na ndru mu yo ni pan shiin wo na, mbo, 'Yira ŋga Nyiɛkpↄↄ yo na ki pe cheche kre, maa shia yo na ki n fna liwo.' 10A kra pe ma gbee taarɛ, a pra ndru mu yira kre tini mu sɛ nyjeeri. 11Kre nyjila kre nu, na pe bilɛ taarɛ plɛ tun ni pan, mu yiri Kaisaria na, a pe pan mu yire ni katoo nyu na. 12A Kpra Ŋumu wre na yo ni pan na ni yiri mbe sɛ, mbaa shia pe jawa na leele mblɛ pe n pe Judae lɛ. Ni wolo kↄↄnanu mblɛ, pre pra sɛ ni tɛɛ a o na sɛ le blↄ wre katoo. 13A blↄ wre na o nyina imi na Nyiɛkpↄↄ bituŋu wre na uyɛ wↄ mu u nyina u katoo, mna yo u pan na u ndro wↄ mbe u sɛ Jopa na mbe sɛ Siimↄn Pita yeeri mbe u pan. 14Mbo wre we ketaan ŋga kie ŋu na mu katoo leele ŋga ŋmaa kre yo mu pan. 15Ŋga ndaa yiri mu yire mbe paara to, a Kpra Ŋumu wre na pan pe nu, imi Kpra Ŋumu wre na pan mu le o nu jle kre. 16Bawa ndaa kee ŋga o Tafun Yesu na yo kre sↄↄnri na, nyumu ni Jↄn naa leele ndrɛ jee, a yire rɛ, Kpra Ŋumu wre ni mbe e ndrɛ je. 17Kena na Nyiɛkpↄↄ wre u leele mblɛ pe n pe Judae pre ŋga Kpra Ŋumu wre, imi wra o ŋga u wi, nyjila ŋga nu o na o Tafun Yesu Kristo wre shↄnli kre waa, kena mi wi ŋmbi na mbe jaa Nyiɛkpↄↄ tↄ kolo hin?" 18Ŋga pra loo ma kre, a pe nyu na ku. A pra kna na Nyiɛkpↄↄ kaan mɛɛ, mbo, "Kena Nyiɛkpↄↄ leele mblɛ pe n pe Judae pre ŋga jawala mbe pe chinɛ mbe ŋmaa ta na." 19Nyjila ŋga nu prara kpↄↄ ŋga nu pra Stefano gbo kre na pan kre, shↄnlifɛɛnlɛ pre na nyina mna sɛ tni tni Foinika na Kipro na Antokia na, mna na ketaan kre yuu Judae pre chiin pan. 20A la, pe plɛ na pe Kiproe na Kirenie ŋga praa paan Antokia na wa kre, a praa o Tafun Kristo wre ketaan kre yuu na Griikie pre nyina. 21A Nyiɛkpↄↄ na ya pe na, a leele tataara na shↄnli, mna kna mu taa o Tafun Yesu wre kee kre na. 22Kre kee ŋga na le shↄnlifɛɛnlɛ mblɛ praa wa Jerusalɛm na kre ndie. A pra Banabas wↄ mna tun Antokia na wa. 23Ŋga wra sɛ le mna nya imi Nyiɛkpↄↄ na nyu pe na kre, u yiɛ na shↄ. A wra pe gbeŋmba mna yo pe pan na, pe jawala nunu ŋga kia jaa jↄŋgↄ wru mbe tni na o Tafun wre ni kpra ni. 24Banabas na pe lewo chichie ŋmba nu Kpra Ŋumu wre na shↄnlie na nyi. A leele tataara na pan mu ya o Tafun wre shↄnlifɛɛnlɛ pre na. 25A Banabas na yire wa mna sɛ Tarso na mna sɛ Sↄↄl haa cha. 26Ŋga wra hɛ u nya kre, a wra pan na u ni Antokia na wa. A pra tni sumifɛɛnlɛ pre ni yɛlɛ nyu mna leele tataara nyina Nyiɛkpↄↄ kee kre. Kena Antokia na wa pra klu mu twanfɛɛnlɛ pre ŋga mɛɛ mbo, "Kristofɛɛnlɛ". 27Yire ble yire nu kre, Nyiɛkpↄↄ kee nyanyofɛɛnlɛ plɛ na yiri Jerusalɛm na mna pan Antokia na wa. 28Bawa pe nunu ŋmba praa yeeri Agabↄs na yiri mna yire Kpra Ŋumu wre na mna yo na, klo badaaŋga we to waŋgra kro nu. Kre klo ŋga ka kra to nyjila ŋga nu Klaudio na ŋunumu li kre. 29A shↄnlifɛɛnlɛ pre na pe jawala pe na pie yirɛ cha nununu mbe Kristofɛɛnlɛ mblɛ pee wa Judea na kre chese, imi na pie ja, mbra pe le. 30A pra yirɛ yire wↄ mna Banabas na Sↄↄl tun na yi ni, na pe sɛ loplombo pre pee wa Jerusalɛm na kre ŋga.

will be added

X\