Nyiɛkpↄↄ Bitumblↄ Hlɛ 10

1Blↄ wa naa wa Kaisaria, u mɛɛ naa Kↄnelio, a wra pe Italia sojae lopom. 2Wra pe lewo ŋmba wra Nyiɛkpↄↄ chin, mnaa Nyiɛkpↄↄ fiɛ, wre na u katoo leele ni kro. Wra pe ndro ŋmba wraa chichie piin na leele kaan, mna na Nyiɛkpↄↄ tali nyjila kro nu. 3Ki ble ka na kie pe nyjila taarɛ lafo na, a wra nya nyiɛlɛ na na Nyiɛkpↄↄ bituŋu wa pan mu na yuu u pan mbo, "Kↄnelio!" 4A Kↄnelio na kna mu ufun le komm a fiɛrɛ na u yii, a wra bituŋu wre wie, mbo, "Yira ŋgi yi hin ni Tafun?" A bituŋu wre na kna mu yo u pan mbo, "Nyiɛkpↄↄ mu nyiɛtalaa kre na mu chichie ŋga mu piin kre kro loo. 5Kena yiri mu ndro tun Jopa na fuŋgaami mbe u sɛ Siimↄn ŋmba pe yeeri Pita wre yeeri mbe u pan mu jaara. 6Uu wa Siimↄn jeribaa ŋmba katoo kii wa lↄↄ nyu na wa kre nu." 7Ŋga bituŋu wre na paara u pan mu kↄ mna sɛ kre, a wra u sumifɛɛnlɛ pre shiin yeeri, mna u sojae mblɛ praa u sri kre nunu wↄ ŋmba wraa Nyiɛkpↄↄ fiɛ, mna kee yire krɛrɛ yo pe pan, 8mna pe tun Jopa na Siimↄn Pita wre pan. 9Ŋga nyiŋge na se a Kↄnelio bitumblↄ pre naa shie mna chaa da Jopa na kre, na Pita nduu nyuŋgo ndra na lafo na mbe sɛ nyiɛtali. 10Kre nyjila kre na klo Pita ta, a wraa yaka chaa mbe ka, ŋga praa yaka piin u pan kre, yiɛ na wↄ u na. 11Bawa wra nya na nyjeeri nyaa, a yira ka na pe na mbↄfiŋge yi badaaŋga, a pe ki pↄ kokoe jijirɛ na, na ki trei tra. 12Kre yira kre nu nu kre, na tra ŋga yurɛ mblɛ mu chin ŋga kroo wa ki nu, mblɛ pe fulo tra, na hanyiɛlɛ mblɛ pe tro nyjeeri kro. 13A mana ka na yo u pan mbo, "Pita, yiri mu mblɛ mu chaa gbo mu ka." 14A Pita na kna mbo "Ↄↄnhↄn, ni Tafun! Ni n da mu yira ŋga ki n pe cheche, ŋga o fun ka tun." 15A mana kre na ndru mu yo u pan shiin wo na mbo, "Yira ŋga Nyiɛkpↄↄ yo na ki pe cheche kre, maa shia yo na ki n fna liwo." 16Mana kre na yo u pan ma gbee taarɛ, a pra chin mna yira kre bali mna sɛ nyjeeri. 17Ŋga kra pan ma kre, ki nsra u ndra yi. A ŋga wraa jawa na yirɛ nyjɛ wra nya nyiɛlɛ na kre nↄↄ yi ŋgi kre, na Kↄnelio bitumblↄ pre pan mu wie wie a pe pe nyina a pe pan mu yire u katoo nyu na, 18na wie mbo, "Katoo ŋga nu blↄ ŋmba pe yeeri Siimↄn Pita wre nyi kree?" 19Na Pita wa mu tni na u yirɛ yire u nya nyiɛlɛ na kre jawai. A Kpra Ŋumu wre na yo u pan mbo, "Le, Pita! Leele taarɛɛ wa mu yire fimi na na mu chaa. 20Kena yiri mu tii tra mbe ŋu na pre sɛ, maa shia pe li kakra, mi ni pe tun mu pan." 21A Pita na yiri mu tii tra mna sɛ Kↄnelio leele mblɛ wra tun u pan kre da, mna pe wie mbo, "E mandiɛ hin? Mi e chaa ree?" 22A pra kna mbo, "Sojae lopom Kↄnelio, blↄ ŋmba u fraka, mu na Nyiɛkpↄↄ fiɛ, mu pe ndro ŋmba uu mɛɛ chichie ni Jopa leele tra nu kre, wre Nyiɛkpↄↄ bituŋu cheche wa na uyɛ wↄ mu nyina mna yo u pan na u ti pe paan mu yeeri mbe mu sɛ u katoo mbe u sɛ mu nyu kee loo." 23A Pita na le na pe ni katoo, mna pe le mu pe ŋga lawee a pra sni. A nyiŋge na se, a pre na Pita na yiri mu to kolo. A sumifɛɛnlɛ mblɛ praa wa Jopa na wa kre plɛ na sɛ u tɛɛ. 24Ki nyisee na, a Pita na leele pre kro na le Kaisaria na. Na Kↄnelio chin na pie pan a wra u sele leele na u nↄↄlↄ mblɛ pra mbra u na kro yeeri a pe kro na pan mu tni na Pita sri. 25Ŋga Pita na yili a Kↄnelio na u yiɛ nya to, a wra yiri mu sɛ kosie kan u yiɛ. 26A Pita na kɛ le u nu mna u yire mna yo u pan, mbo, "Yiri! Ndro wi mi chↄↄ na ŋu wi." 27Ŋga wre na Pita na yire wa mna paara chiɛri kre, a wra le katoo lam, mna lenɛɛrɛ nya na pe fni wa tataara. 28A Pita na kna mu yo pe pan mbo, "Yire titi e chin na ki n kolo ni na Juda ndro we uyɛ wru mbe mbra waŋgra ndro na, ndee na we sɛ waŋgra ndro lawee. La, mi rɛ, Nyiɛkpↄↄ u ni nyina na mbaa shia yo ndro wa pan na u pe lewaa ndee u n pe cheche. 29Kre ki tia ŋga e leele tun ni pan, a ni n je, a ni pan kre. Kena kee ŋga na e leele tun ni pan kre, e ki yo ni pan." 30A Kↄnelio na kna mbo, "Kie pe ble jijirɛ yi ŋga, imi nyu, na nii wa mu na nyiɛtali ni katoo mna, kie pe nyjila taarɛ lafo na. Ŋga mbe nya na blↄ wa dodoŋgi fiŋge prupru le mu pan mu yire ni yiɛ. 31A blↄ wre kna mu yo ni pan mbo, 'Kↄnelio, mu nyiɛtalaa na mu chichie nyjɛ mu pini yire kro le Nyiɛkpↄↄ ndie. 32Kena ndro tun mbe u sɛ Jopa na, mbe sɛ blↄ ŋmba pe yeeri Siimↄn Pita wre wru mbe pan mu jaara. Uu wa mu tni lↄↄ nyu na Siimↄn jeribaa wre katoo.' 33Titɛɛ kre nu, a ndaa yiri mu leele wↄ mu tun mu pan, a mu n je, a mu ki loo mu pan kre. Kena fuŋgaami ŋga o kro fni Nyiɛkpↄↄ wre yiɛ, na kee ŋga u yo na mu paan yo o pan kre sri." 34A Pita na kna mna paara pe pan, mbo, "Kpra na ni chin na Nyiɛkpↄↄ na ndro yiɛ le mbe chiin u kala pe, 35la, mu sɛ su waŋgra ŋga nu kro, ŋu ŋmba mu u fiɛ, mu na ŋga ki fraka piin kre, we mu shↄ. 36E chin kee ŋga ni Nyiɛkpↄↄ na sɛ Israel leele pan kre, na wejinyiŋge kee wa Yesu Kristo wre nu. Wre wi ndro kro kro Tafun. 37Kre kee ŋga pra yo mu tro Judea tra nu kre, Galilii na pra ki nↄↄ hle. A nyjila ŋga nu Jↄn na ndrɛ je kee kre yo kre kↄkro kre, 38imi na Nyiɛkpↄↄ na Yesu ŋmba wra yiri Nazrɛt na wre wↄ mna u ŋga jaŋga na Kpra Ŋumu wre, a wraa kila na chichie pini na mblɛ Sutna tↄↄra kre trai. Ŋgi ndra na hin? Na Nyiɛkpↄↄ wa u kro. 39A wre lɛ kee nyjɛ wra pe Jerusalɛm na, na Judea tra nu wa kre kro dansiɛfɛɛnlɛ. A wre Yesu chↄↄ pra kↄ mu hlu kaan kre na mna u gbo kre. 40Wre Nyiɛkpↄↄ na nyi u ble taarɛ ble na, mna tia a wra uyɛ wↄ kama mna nyina. 41A waŋgra ŋga kro ma kra u nya, la, u dansiɛlifɛɛnlɛ mblɛ Nyiɛkpↄↄ wↄ mu tɛɛ kre, pre lɛ wre mblɛ u kunnyiɛ kↄkro kre wre na wre na chaa mna li, mu gbↄ kre. 42Wre u o tun na o sɛ ketaan kre yo mbe leele nyina, mbe u dansiɛrɛ li na wre wi ŋmba Nyiɛkpↄↄ wↄ na u pe ŋmaafɛɛnlɛ na gboolo kro kpra kunfun. 43Wre dansiɛrɛ Nyiɛkpↄↄ kee nyanyofɛɛnlɛ kro lii na, ndro ŋmba we u shↄ mbe li kre, ufun we yire u mɛɛ kre na mbe sisam tinkɛɛ ta." 44Ŋga Pita naa yire kee nyjɛ yuu pe pan kre, titɛɛ kre nu a Kpra Ŋumu wre na pan pe mblɛ praa kee kre ndru kre nu. 45A kra Juda leele shↄnlifɛɛnlɛ mblɛ pra sɛ Pita tɛɛ kre pe kawako ni, na Nyiɛkpↄↄ waŋgra leele pre kuraa ŋga Kpra Ŋumu wre na. 46Ŋgi ndra na, na pe loo a waŋgra leele pre na yolo fↄnyi yuu, na Nyiɛkpↄↄ kaan mɛɛ. Bawa Pita na kna, 47mbo, "Kena ndro we jaa kolo tↄ na mbaa leele mblɛ pe Kpra Ŋumu ŋmba ta na wre lɛ ŋga ndrɛ jee?" 48A wra tia pra pe ndrɛ je mna le o Tafun wre mɛɛ nu. Ŋga kra pan ma kre, leele pre na u tali na u tni pe jaara ble shiin yɛ.

will be added

X\