Nyiɛkpↄↄ Bitumblↄ Hlɛ 1

1Tiofilos, hlɛ jle kre ndaa mu nyunↄ kre, kra pe kee nyjɛ Yesu na klu mu pe, na kee nyjɛ wra nyina, 2mu sɛ su nyjila ŋga nu wra yire Kpra Ŋumu wre na mna u bitumblↄ mblɛ wra wↄ kre ŋga mbra yire, a Nyiɛkpↄↄ na chin mu u bali mu sɛ nyjeeri. 3U kanyana yire kↄkro, kie pe ble fuloe shiin kre, wra yire kawako kee tataara na mna uyɛ wↄ mu pe nyina, na uu wa na le, a pra u nya, a wraa Nyiɛkpↄↄ ŋunumu kre kee yuu pe pan. 4Ŋga wra tni na pe ni kre, wra yo pe pan na pia shia yili Jerusalɛm na mbe sɛ haka, la, pe nyjila ŋga nyu Nyiɛkpↄↄ na le na we pe kre shie tun. Mbo, "Imi e na ki loo mu yili ni nyuu kre, 5Jↄn rɛ, nyumu ni wraa leele ndrɛ jee, a yire rɛ, ble nyjɛ nu e nyi ŋga kia mu kuraa mbe pe e ndrɛ je Kpra Ŋumu wre nu." 6Ŋga pra fni kre, a pra u wie mbo, "O Tafun, nyjila ŋgi nu mu ndru mbe Israel leele ŋga pe ŋunumu kre hin?" 7A wra kna mbo, "E kee ma na ee nyjila, ndee ble ŋga Ndoo wre le wre titi jaŋga ni kre chin. 8La, na Kpra Ŋumu wre waa pan e nu kre, kre ee faŋga ta, mbe ni dansiɛrɛ li Jerusalɛm na, na Judea, na Samaria na kro, mbe sɛ su tra nyukↄↄnrↄ na." 9Ŋga wra yire kee nyjɛ yo pe pan mu kↄ, a pra yire mu na le dumm kre, a pra u bali mu sɛ nyjeeri, a tloe na u tↄ, a pe nsraa u nyaa na. 10Ŋga wra fun pe yiɛ na a pra yire mna na u le le kre to, a pra nya na bilɛ shiin plɛ dodonyi finyi le le mu yire pe jaara. 11A bilɛ pre na kna mna yo pe pan mbo, "Galilii bilɛ, mni a e yire na le le nyjeeri ma hin? Yesu ŋmba pe wru e jaara mu sɛ nyjeeri ŋga, pan chↄↄ we ndru mbe pan na, imi e u nya a wra shie nyjeeri ŋga." 12A pra ndru mna yiri kre nyua ŋga pe yeeri Olive ŋga ki mbra Jerusalɛm na wa kre jaara, mna pan Jerusalɛm lam, kie pe kↄnsni yↄↄ. 13Ŋga pra le Jerusalɛm na kre, a pra sɛ pe abansru katoo nyuŋgo ŋga nu pra nyi kre nu. Bawa Pita, na Jↄn, na Jemisi, na Andriu, na Filipo, na Tↄmasi, na Batolomio, na Matio, na Alfio pↄ, Jemisi, na Siimↄn, Kaanan wo wre, na Jemisi pↄ, Juda wre kro na nyi. 14Leele mblɛ pra sɛ fni wa kre kro na nyu nunu wru mna nyiɛtalaa yii kɛshiin, pre na chiɛlɛ pre ni, na Maria, Yesu lo wre, na Yesu chinlɛ ni kro. 15Yire ble yire nu kre, lenɛɛrɛ pre pra fni kre naa leele lafaa na fulo, a Pita na yiri mu yire pe lalaa mna yo pe pan, 16mbo, "Wolo, fna ki fna mbe Nyiɛkpↄↄ kee kre Kpra Ŋumu wre na nyaari Devid na mna klu mu yo kre, na imi na Judas, ŋmba wra yiɛ klu a pra pan mu Yesu wre yii kre, mbe ki kee kre pe ma. 17A pra u tↄↄnri mu chaa o nu, a wra u sumihaa ta na sumi. 18Wre wra nɛɛrɛ swa tɛɛ mna tra lↄ, a u lɛɛ na nyi mna ja, a u lɛɛ bie na yili, 19a leele mblɛ praa wa Jerusalɛm na kre kro na ki loo, a kra tia pra tra kre ŋga mɛɛ pre titi yolo nu mbo, 'Hakeldaima!' ki nyina na nyimi tra. 20Imi na pra klu mu ki nyunↄ Mɛɛ Hlɛ kre nu kre mbo, 'E ti mbe u tnihaa kre tni waara, mbe ndro waa shia tni ki nu,' 'mbe lefuŋu u tnumu kre wru.' 21Kena ki fna mbe bilɛ mblɛ wre na pre naa nyaari na shie na paan, nyjila ŋga nu Yesu naa wa kre, 22mu yire Jↄn ndrɛ jee nyjila kre nu mu pan mu su ble ŋga na pra Yesu bali o jaara kre, mbe o wa ta mbe ya oyɛ na, mbe o pe u kunnyiɛ kre dansiɛlifɛɛnlɛ." 23A pra leele shiin wↄ mu yire, Josɛf ŋmba praa yeeri Basabas, a pra u ŋga mɛɛ Justo wre, na Matias. 24A pra nyiɛtali, mbo, "Ŋu, o Tafun, ŋu mu lewo loloŋgo kee chin, kena o nyina leele shiin mblɛ ŋmba mu wↄ 25mbe u chaa tnumu kre nu, mbe bitumblↄ pre tnumu ŋga Judas laa mu ti mu wre titi wo wru kre, mbe u ki tun." 26A pra kɛɛn tɛɛ, a kɛɛn yire na Matias wↄ a pra u ya bitumblↄ kɛmbↄnunu pre na.

will be added

X\