Timotio Hlɛ Shiinwo 3

1Ja mu chin na, nyjila shelee kaa wa na paan ble hɛnyi yire nu. 2Kre nyjila kre leele we pe jajaarafɛɛnlɛ, mbe pe swa nyibinyiɛfɛɛnlɛ, mbra peyɛ kpↄↄri, mbra lopom chaa, mbra nyu kpↄↄmu kee yuu, pia na pe sefɛɛnlɛ kee ndru, pia ayɛ chin, pia pe cheche Nyiɛkpↄↄ yiɛ. 3Pia peyɛ kori, pia peyɛ fooro chin, pie pe kabaarafɛɛnlɛ, pia jaa frↄ pe niŋge sisaa na, pe ndra we sheli, pia na ŋga ki nyu chaa, 4pie na peyɛ woni mbra kaan, mbra fiɛlɛ kala na, pie na pini na pe kee kro chin, pie yiɛshↄↄrↄ yirɛ kori mbe wɛ Nyiɛkpↄↄ na. 5Pie peyɛ pe na Nyiɛkpↄↄ pe sumi kpra kolo na, nde jaŋga ŋga kii wa kpra sumiɛ nu kre, pe ki je. Muyɛ wↄ mu yili pre leele mblɛ nu. 6Pre leele pre plɛ pe tro na lee kalonyi nu, na chiɛlɛ mblɛ sisam yi wɛ pe na, a pra tro pe niŋge nyininyini kooloe na kre yiri, na pe jawala klai. 7Pre chiɛlɛ mblɛ nyini, nyjila kro nu pe chaa mbe twan, la, pe n ja mbe kpra kre chin. 8Imi na Jani na Jambrɛ na Mbose nyu kaanri kre, pan pre leele mblɛ kpra kre nyu kaanri, pe jawala n wa, ki tia pe shↄnlie kolo wa. 9La, pia da haka, ndro kro we pe jijiere nya, imi na leele na Jani na Jambrɛ nya kre. 10La, ŋu Timotio, mu ja mu taa ni kee nyjɛ ni mu nyina na, na ni kepele, na ni jawala, na ni shↄnlie, na ni frↄ, na ni koroo, na imi na ni niyɛ nyjii, 11na ni fiŋgee, na ni kanyana, yi krɛrɛ mu li yi na kro. Kee nyjɛ yira ni da Antokia, na Ikoniↄm, na Listra na yire kro mu yi chin, imi na pra ni fiŋge, a ndaa frↄ, la, o Tafun wre na ni shↄ mu yili yi krɛrɛ nu. 12Leele mblɛ pe chaa mbe tro Nyiɛkpↄↄ kolo na, mbe pre na Yesu Kristo pe nunu kre, pie pe fiŋge. 13La, sisampefɛɛnlɛ na fanafɛɛnlɛ we kro mbra sisam pini, suwi mbra leele fana, ŋgi na, Sutna pre titi fana. 14La, ŋu rɛ, tni shↄnlie ŋga ndaa mu nyina a mna ki shↄ mu li kre nu. Leele mblɛ na lɛ mu nyinafɛɛnlɛ pre mu pe chin, 15a mu chin na mu bimi mu yire, mu Nyiɛkpↄↄ kee nyjɛ pe nyunↄ mu tɛɛ yire chin, yire yie jaa mu ŋga jawala mbe yire Yesu Kristo shↄnlie na, mbe sɛ na mu ni ŋmaashↄmu nu. 16Nyiɛkpↄↄ kee nyjɛ pe nyunↄ mu tɛɛ yire kro, wre Nyiɛkpↄↄ pan yi yiri, a yi nyu mbe pe yire yi na mbe o nyina kpra kre, mbe yi tɛɛ mbe o yiɛ kee yo o pan, mbe o yi tɛɛ mbe oyɛ fraka, mbe yi tɛɛ mbe o nyina kolo chiriri ŋga na ki fna o tro, 17Imi kie pe mbe Nyiɛkpↄↄ sumifun kro nyu, mbe jaa kee chichie pe.

will be added

X\