Tesalonika Hlɛ Shiinwo 1

1Mi Pↄↄl, na Silas, na Timotio pan hlɛ ŋga yiri na shie sumifɛɛnlɛ mblɛ pee wa Tesalonika na, mu pe o lɛ Nyiɛkpↄↄ wre, na o Tafun Yesu Kristo wre wolo kre pan. 2O lɛ Nyiɛkpↄↄ wre, na o Tafun Yesu Kristo wre pe e ŋga dumiɛ na wejinyiŋge. 3O wolo, o Nyiɛkpↄↄ kaan mboo e ndra na nyjila kro nu. Ki fna mbe o pe ma, ŋgi na? E shↄnlie shie yiɛ, a koroo ŋga ni e eyɛ kori kre kpↄↄri na yaa. 4Kre ki tia a o na e teeri na oyɛ kpↄↄri Nyiɛkpↄↄ sumifɛɛnlɛ pre nu kre. Na o le imi na pe e fiŋge, a e na kala nyaa, mu ja mu frↄ mu shↄ mu li kre, ki fna o e tɛɛ mbe oyɛ kpↄↄ. 5Yire kee nyjɛ krɛrɛ o nyina na Nyiɛkpↄↄ kpra kuↄn fraka, a ki tia o chin na e fna u ŋunumu ŋga na e fnai kre nu. 6Nyiɛkpↄↄ we kpra li, mblɛ pe tia e na kala nyaa kre, we ti mbe pe kala nya. 7A yire mblɛ e kala nyaa kre, we ti mbe e wuu, a pan chↄↄ we ti mbe o wuu na. Na o Tafun Yesu wre na u nyjeeri bitumblↄ faŋgafɛɛnlɛ pre waa yiri nyjeeri na paan, 8pie pan kanhun ŋga ki nyini ni, mbe paan mblɛ pe n Nyiɛkpↄↄ chin, a pe n li o Tafun Yesu Kristo ketaan kre na kre ndie tini. 9Pie kanyana ŋga ki n nyukↄↄnrↄ ni nya. Nyiɛkpↄↄ we pe flo o Tafun wre na u faŋga yɛnyiŋge kre yiɛ. 10Ŋga ble o Tafun wre we pan, mbe u leele pre kro u ŋga yɛnyiŋge na buuro kre, ee chaa pe nu, ŋgi na, kee ŋga o yo e pan kre, e ki shↄ mu li. 11Kre ki tia o na nyiɛtali na e kaan nyjila kro nu kre. O o Nyiɛkpↄↄ wre tali mbe u ti e jaa tni tnimu ŋga nu u e yeeri kre nu. Nyiɛkpↄↄ u yire u jaŋga kre na mbe ti e jaa kee chiriri ŋga e chaa mbe pe kre pe, mbe ti e jaa shↄnlie tnumu ŋga e tuni kre tun mbe sɛ kↄ. 12Na e pe ma kre, kie ti mbe e o Tafun Yesu wre yɛnyiŋge ta e pan, mbe yire ka ta u pan. O Nyiɛkpↄↄ wre na o Tafun Yesu Kristo wre dumiɛ ki ti mbe ki pe ma yɛŋgɛ.

will be added

X\