Pita Hlɛ Shiinwo 1

1Mi Siimↄn Pita, Yesu Kristo sumifun, na u bituŋu wi mi. Mi pan hlɛ ŋga yiri na shie leele mblɛ pe yire o Nyiɛkpↄↄ, na o ŋmaashↄfun Yesu Kristo wre fraakaa na, a pe shↄnlie kpↄↄ na o shↄnlie yi kre pan. 2Ŋga e Nyiɛkpↄↄ, na o Tafun Yesu Kristo wre chini na yaa ŋga, Nyiɛkpↄↄ u e ŋga dumiɛ na wejinyiŋge tataara. 3Nyiɛkpↄↄ faŋga ŋga ki kpↄↄ kre, ki o ŋga yirɛ nyjɛ o shian kro, mbe ki ti o jaa yire u chiɛn ŋga o u chin kre na mbe tni mbe sumi imi na ki fna. Wre u o yeeri mbe o paan wre titi yɛnyiŋge, na u chichie kre ka ta. 4U yire kre kee ŋga na mu o ŋga dwamu kpↄↄ ŋga nyu wra le kre nyu wra yo kre, mbe o yire ki na mbe shↄ niŋge sisaa, ŋga ki lewo klai waŋgra ŋga nu kre kɛɛ, mbe paan wre Nyiɛkpↄↄ kepele wru. 5Kre kee ŋga ndra na, e gbeŋmba kolo kro na, e ti mbe kepele chichie ya e shↄnlie na, e ti mbe Nyiɛkpↄↄ chiɛn ya e chichie kre na, 6e Nyiɛkpↄↄ chiɛn nu kre, e eyɛ nyjiri e niŋge na, a eyɛ yie nu kre, e frↄ ta, e frↄ nu kre, e na ŋga Nyiɛkpↄↄ chaa pini, 7na e ŋga Nyiɛkpↄↄ chaa pini kre, mbe e e wolo sumifɛɛnlɛ pre kori mbe ya, na e pre kori kre, mbe e ndro kro kori mbe ya. 8Yire kepele nyjɛ, e yi shian, na e yire kepele nyjɛ ta nɛɛrɛ kre, yie ti mbe e jaa ŋga ki fna pe, mbe sɛŋgɛ sɛ O Tafun Yesu Kristo chiɛn kre saara na. 9La, ŋmba u n yire kepele nyjɛ ta kre, u n na nyaa lee, u fun nyiɛlɛ na, mu fɛɛ na u sisam nyjɛ wra pe fa kre, na pe yi je mu laa u na. 10Kena ni wolo, e gbeŋmba e ti mbe pe e nya yeeree ŋga Nyiɛkpↄↄ e yeeri mu e wↄ kre nu, na e pe ma e shↄnlie wa to. 11Kre kolo kre na ee yire mbe kolo ta mbe le o Tafun, na o ŋmaashↄfun Yesu Kristo blenyini ŋunumu kre nu. 12Kre ndra na, nyjila kro nu pan mbe na e sↄↄnri yire kee nyjɛ, yire kee yire e yi chin fa, a ee wa mu yire Kpra ŋga e ta kre nu. 13Ni jawa na ŋga nii wa ŋmaa ni tɛ ŋga, ki fna ndaa kanhun leni e nu, mbra e sↄↄnri yire kee nyjɛ. 14Ŋgi na, o Tafun Yesu Kristo ni nyina na ni ble kro chiɛri, mba mu mbe ku. 15Kena mbe gbeŋmba, baŋga na ni ku kuraa mbe e jaa yire kee nyjɛ sↄↄnri. 16Mbuura kee yire na ma o yire mu e nyina Yesu Kristo faŋga, na u paan kee kre. O na u jaŋga ŋga kii wa u nu nya na nyini ni. 17Nyjila ŋga ni O Lɛ Nyiɛkpↄↄ wre naa u kaan kpↄↄmu, na yɛnyiŋge kre, na oo wa wa, ŋga mana kre na yili yɛnyiŋge kpↄↄfun wre pan mbo, "Ŋmba wi ni Pↄ ŋmba ni kori, a ni yiɛshↄ u na kre," na oo wa mu yire wa. 18Wre na wre kro o naa wa mu yire nyua cheche kre na, a o na mana kre loo, mna chin na nyjeeri ki yiri. 19A ki tia o Nyiɛkpↄↄ kee nyanyofɛɛnlɛ pre kee yire pra yo kre le na yi pe kpra. Na e ndie tɛɛ kee yire na, ee kee chiriri pe, ŋgi na, pan kee yire nyi na kania ki nyini wↄmu lawee, mbe sɛ su na ndram we ndru mbe saan, mbe bnimi nyu wↄlↄ ŋga ki nyaa kre nya e lolonyi nu. 20Ŋga ki yiɛklu yi na, e sↄↄnri na ndro wa jaa u jawala tɛɛ mbe Nyiɛkpↄↄ kee nyanyofɛɛnlɛ pre kee yire pe nyunↄ mu tɛɛ yire ka nↄↄ nyina. 21Ŋgi na, Nyiɛkpↄↄ kee nyanyofɛɛnlɛ pre kee yire ka n wa mu yiri lewo jawala nu, la, Kpra Ŋumu wre u yire leele na mu tia pe kee nyjɛ yi yiri Nyiɛkpↄↄ pan nya mu yo.

will be added

X\