1 Hlɛ ŋga yiri mi Jↄn, e lopom wre pan, na shie chlↄ ŋmba Nyiɛkpↄↄ kori, mu u wↄ kre na u biile mblɛ ni kori pre pan. Mi nunu ma ni e kori, mblɛ pe kpra kre chin pre kro e kori. 2 Ŋgi na, kpra kree wa o nu nyjila kro nu, a kia jaa yili o nu fio. 3 O Lɛ Nyiɛkpↄↄ wre, na u Pↄ Yesu Kristo wre pe o dumi, mbe o fooro chin, mbe o ŋga wejinyiŋge, kpra na koroo nu. Kpra na koroo 4 Ni yiɛ na shↄ kpↄↄ na ndaa nya na mu biile pre plɛ taa kpra kre kro, imi na o Lɛ Nyiɛkpↄↄ wre yo o pe kre. 5 Kena Maa, ni mu tali, e ti mbe o kro oyɛ kori. Mbra fↄŋgↄ ma ni e nyunↄi, la, mbra lɛɛ ŋga o na ta fa kre yi. 6 A kre koroo ŋga kee ni yuu ŋga, ki kro yi na oo li Nyiɛkpↄↄ mbra na. Mbra kre, imi na e kro ki loo mu yire jle kre, na ki fna mbe e kro tni koroo nu. 7 Fanafɛɛnlɛ pan waŋgra ŋga nu tataara. Leele mblɛ pe yuu na Yesu Kristo nsra pan na lewo wi kre, pre na ni nyi kre. Na ndro yo ma kre, mu chin na leele u fana, a ufun wre Kristo loŋgo wi. 8 Kena e eyɛ dↄↄta, mbe yira ŋga na o fnai kre, mbe yaa fna ki na waara, la, mbe e kↄↄ fↄtↄↄrↄ ŋga ki fna ta. 9 Ndro ŋmba u n taa kee nyjɛ Kristo wre nyina yire na, mu kee yire wa kro kre, ufun n Nyiɛkpↄↄ chin. Ŋmba we taa Kristo kee yire na kre, u o Lɛ wre na u Pↄ wre ta. 10 Na ndro pan mbe paan e nyina kee ka, a u n ki pe Kristo kee kre, yaa shia ti u tuu e katoo, a yaa shia u shaari kple. 11 Ŋgi na, ŋmba we u shaari kre, kena wre na wre we pe nunu u sisam kee yire nu. 12 Nii wa na kee ni tataara mbe yo e pan, la, ni n na chaa mbe yi nyunↄ ni kaan na mbe paan e shaari, mbe o kro fni mbe paara, mbe ki ti o kro yiɛshↄ. 13 E jaa ŋmba Nyiɛkpↄↄ wↄ wre biile pre e shaari kro.
