Korintoe Hlɛ Shiinwo 6

1Kena ŋga wre na Nyiɛkpↄↄ pe nunu, na tnumu nunu tuni ŋga, u e dumi, kena o u tali, yaa ti mbe u dumiɛ kre pe waara. 2E loo kee ŋga Nyiɛkpↄↄ yo, mbo, "Nyjila ŋga kra fna nu ndaa loo e pan, mna ya e na, a ŋga ŋmaa shↄ ble kre na da, a ndaa ya e na." E loo nyjila ŋga nu Nyiɛkpↄↄ ya e na yi kre, a aŋga yi e ŋmaa shↄ ble. 3O n na chaa mbe ndro o tnumu kre kefↄↄn ka ta mbe yo, ki tia o n kee ka sembremu pe, ŋga kie jaa wa tↄ kolo. 4La, kee kro nu kre, o nyina na Nyiɛkpↄↄ sumifɛɛnlɛ lɛ wre, o frↄ kanyana na nyjila shelee, na kefuɛn kro nu. 5Pe o frↄ, mu o yii mu le nyuŋgo, mu krↄ wru na o ni. Pe tia o tnumu tun imi na ki n fna, mu tia o tni mu nyiŋge se, o n sni, mu tia o tni klo. 6A mu yire ŋga nɛɛrɛ ka n wa o na, a oo jawala ni, na frↄ, mu leele fooro chin kre ndra na, o oyɛ nyina na Nyiɛkpↄↄ sumifɛɛnlɛ lɛ wre, mu yire Kpra Ŋumu wre, na o kpra koroo na, 7na kpra kee ŋga o yuu kre na, na Nyiɛkpↄↄ jaŋga kre, yi tia o kpra ta na ŋunↄwiyirɛ yi, kamɛŋɛ na kalie. 8Plɛ o kaan yɛnyiŋge, plɛ na cheu woni o na, plɛ na o tɛɛlɛ, a plɛ na o kaan mɛɛ. Pe o pini na kala o fnɛ, nde kpra o yuu. 9Pe o pini na o n mɛɛ ni, nde oo mɛɛ ni. Pe o pini na o ku, nde o le. Pe o ndie tinii titi, nde o n ku. 10Pe o pini mbe ti o yiɛ je, nde o yiɛshio nyjila kro nu. O pe na shianfɛɛnlɛ lɛ, nde o tia tataara ta. O pe na yaka n wa o pan, nde o Ŋumu wre krↄ yirɛ ta. 11O wolo mblɛ ee wa Korinto na, o lɛɛ wↄ mu paara e pan chasi. 12Wre ma o n e kori, la, yire e n wre kori. 13Fuŋga rɛ, ni paara e pan na ni biile lɛ yire. E lɛɛ wↄ e o kori, imi na o lɛɛ wↄ mu e kori kre. 14Ki n fna mbe yire na mblɛ pe n Kristo shↄnli pre na chaa mbra kee nunu pini. Mni kpra na sisaa we pe mbe jaa chaa hin? Ndee mni kania na wↄmu nↄↄlↄ yiri hin? 15Nyu nunu ŋgi kii wa Kristo na Sutna lalaa hin? Ndee mni shↄnlifun na ŋmba u n shↄ mu li nↄↄlↄ yiri hin? 16Nyu nunu ŋgi kii wa Nyiɛkpↄↄ suminyuŋgo na sɛɛn lalaa hin? Ŋgi na, Nyiɛkpↄↄ ŋmba u le wre, u suminyuŋgo lɛ wre. Imi na Nyiɛkpↄↄ wre titi yo kre mbo, "Mbe tni ni ni leele nu, mbra nyaari pe lalaa, a mbe pe pe Nyiɛkpↄↄ, mbe pre pe ni leele." 17Kre ki tia o Tafun wre yo mbo, "E eyɛ wↄ e yili pe nu, a yaa shia kɛ taa yira ŋga ki n pe cheche na, kre mbe e shↄ." 18"A mbe pe e Lɛ, mbe yire pe ni bibilɛ, na ni bichiɛlɛ pan o Tafun jaŋgafun wre yo."

will be added

X\