Korintoe Hlɛ Shiinwo 5

1Fuŋga o chin na o tra mna katoo ŋga nu o nyi, a ki pe o wejiŋge ŋga we kla, a Nyiɛkpↄↄ we o ŋga wejiŋge nyjeeri a kia jaa kla fio. 2O jiin lɛɛ, a o yiɛ nyina o na o nyjeeri wejinyi yire chaa mbe yi o tↄ, 3na o waa o wejinyi yire ta a yi o tↄ na yoŋgo fↄŋgↄ yi kre, pia o Ŋumu nya wejiwaara na. 4O tra mna wejinyi nyjɛ yi tia o na jiin lɛɛ, la, o n na chaa mbe wejinyi la, o chaa mbe nyjeeri wejinyi ta mbe yi o tↄ, imi kie pe mbe o wejinyi nyjɛ yie ku yire kna mbe pe blenyini ŋmaa wee. 5Kre chinɛɛ ŋga oo chinɛ ŋga, Nyiɛkpↄↄ u o pe ma, mu o ŋga u Kpra Ŋumu wre mbe o chin na yɛŋgɛ oo chinɛ. 6Ki tia o kaan nyjila kro nu. O chin na nyjila ŋga nu oo wa tra mna wejinyi ni ŋga, wre na o Tafun wre katoo haa le. 7Shↄnlie ni o tni, ki n pe nyjɛ o nyaa na yi. 8O dankna kpↄↄ, na chaa na oo ku mbe wre na o Tafun wre sɛ tni. 9Ki tia na oo ŋmaa ni o, na o ku o, o jawala yi na o kee we u yiɛnyi. 10Ŋgi na, o kro we yire Kristo yiɛ mbe u o kpra kun. O kro we sɛ chichie, ndee sisaa nyjɛ o pe tra mna fↄtↄↄrↄ ta nununu. 11O chin na ki fna mbe o o Tafun wre fiɛ, ki tia o yiɛnyina o na leele kna. Nyiɛkpↄↄ o chin imi na o nyi, a ni kaan na yire chↄↄ e ni chin. 12Oyɛ ma o chaa mbe nyina e pan na, la, chaa o chaa mbe e nyina kolo chiriri ŋga na ee tro mbe o tɛɛ mbe eyɛ kpↄↄ, imi kie pe mbe e ja mbe mblɛ pe lewo nyaa to, pia u kepele ka nya, mbe u tɛɛ mbra peyɛ kpↄↄri kre, mbe e jaa pe nyu wↄ. 13Na o tↄↄlↄ yɛŋgɛ kre, kena Nyiɛkpↄↄ ndra na yi, a na o n na tↄↄlↄ naa, kena e nyumu na yi. 14Kristo koroo ŋga u o kori kre ki o le, ŋgi na, o chin na ndro nunu wra ku mu o kro ŋga, ki nyina na wre na wre kro o ku. 15Wra ku mu ndro kro ŋga mbe ki ti mblɛ pee ŋmaa ni kre, mbe pia tni mbe peyɛ ŋga, la, mbe pe tni mbe ŋmba u yila pe ndra na mu ku mu nyi wre ŋga. 16Kena waa ndro le yiɛ na mbe u kpra kun. Hali na jle kre o na Kristo le yiɛ na mna u kpra kun kuraa kre, waa pe ma na. 17Na lewo na Kristo pe nunu kre, u pe lewo fↄŋgↄ, u kelɛɛ yire wa mu kefↄnyi wru. 18Yire kee nyjɛ krɛrɛ Nyiɛkpↄↄ u yi pini, wre u yire Kristo na mu o wru nↄↄlↄ, ki tia o loŋgo ma na, wre u o ŋga tnumu o na plɛ pimi u nↄↄlↄ na. 19O kee ŋga o yuu kre yi na, Nyiɛkpↄↄ lewo kro chaa nunu, mbe yire Kristo na. Na ki pan ma, u n na lewo sisam sↄↄnri na. A u o ŋga kre kee ŋga na o leele nyina imi Kristo wre na Nyiɛkpↄↄ lalaa gbeele. 20Kena Kristo jeelee na o yire na paara, na Nyiɛkpↄↄ wre titi u yire o na, na paara na e nyina, na e tali. Kristo jeelee na o yire na e tali, e ti mbe Nyiɛkpↄↄ e wru nↄↄlↄ. 21Kristo nsra sisaa ka pe, la, Nyiɛkpↄↄ u yila o ndra na mu tia pe u le sisaa pefun, mbe ki yire u na mbe o fraka Nyiɛkpↄↄ yiɛ.

will be added

X\