Korintoe Hlɛ Shiinwo 4

1Nyiɛkpↄↄ yire u foorochiɛn na mu o ŋga kre tnumu ŋga, ki tia o sↄↄnrↄ wa jaa ku. 2La, o ndrandra kee, na nyifɛɛrɛ kepelee yire je, o n na leele fana, a o n na ka yaa Nyiɛkpↄↄ kee kre na. La, o kpra kee kre kpali chasi, mu yire Nyiɛkpↄↄ yiɛ mu oyɛ wↄ mu nyina ndro kro pan. 3Na ketaan ŋga o kpali kre ndra leele na kre, kena mblɛ pe shie mbe sɛ fun pre chiin na ki ndra. 4Sutna, waŋgra ŋga tafun wre, u mblɛ pe n shↄ mu li pre jawala tↄ, ki tia pia ketaan kre kania ŋga ki o nyina Kristo yɛnyiŋge kre nya, Nyiɛkpↄↄ wrumu wi Kristo. 5A oyɛ kee ma o kpali, Yesu Kristo kee o kpali, a wre wi o Tafun, a wre ndra na o pe e sumifɛɛnlɛ. 6Nyiɛkpↄↄ ŋmba wra yo mbo, "ndram ki saan mbe yili ndram wↄmu nu" kre, wre u kania le o lolonyi nu, mu tia o u yɛnyiŋge kre ki chiɛnri Kristo yiɛ na kre nↄↄloo. 7La, wre mblɛ o kre Kpra Ŋumu krↄ yira ŋga ta kre, pan o nyi na chↄɛ nyjɛ pe faanri na choo ni yi, mbe ki ti mbe leele chin na Nyiɛkpↄↄ pan jaŋga kpↄↄ yiri, o pan ma ki yiri. 8Nyjila kro nu o kala nyaa, nde ka n kun o na. Nyjila ka nu o n chin imi oo oyɛ pe, la, o kaan. 9O prafɛɛnlɛ nɛɛ, la, Nyiɛkpↄↄ wre n laa o kro, nyjila ka nu pe o gbuun na chaan, mbe o ndru mbe yiri. 10Nyjila kro nu o kumu nyaa, imi na Kristo na pe kre, imi kie pe mbe pe Yesu ŋmaa kre nya o wejinyi nu. 11Wre mblɛ oo wa na le kre, Yesu ndra na kumu kanyana o nyaa nyjila kro nu imi kie pe mbe pe Yesu ŋmaa kre nya o wejinyi nyjɛ yie ku yire nu. 12Kena wre rɛ, kumu kanyana nu o nyi, mbe ki ti mbe yire blenyini ŋmaa ta. 13Pe ki nyunↄ Nyiɛkpↄↄ hlɛ kre nu mu tɛɛ mbo, "Ndaa shↄ mu li, ki tia ndaa paara." Wre Kpra Ŋumu wre nunu chↄↄ o ta mu shↄnli, mu na paara na. 14O chin na Nyiɛkpↄↄ ŋmba wra o Tafun Yesu nyi mu u ŋga ŋmaa kre, we yire Yesu na mbe wre na yire nyi mbe sɛ u yiɛ na. 15Yire kee nyjɛ o nyaa ŋga krɛrɛ, e ndra na yi, imi kie pe mbe dumiɛ ŋga lenɛɛrɛ taa kre ti Nyiɛkpↄↄ mboo ŋgaa nɛɛ, mbe u yɛnyiŋge ta. 16Kre kee ŋga ndra na o sↄↄnrↄ na ku. La, o wejikaara nyjɛ, yi lee, la, o ŋumu faŋga taa blenyini. 17A yire kanyana fiɛn fiɛn nyjɛ o nyaa nyjila chiɛri nu ŋga, yie ti o blenyini yɛnyiŋge ŋga ki kpↄↄ mu wɛ yirɛ kro na kre ta. 18Ki tia yirɛ nyjɛ leele nyaa nyiɛlɛ ni yire na ma o yiɛ nyi, la, nyjɛ yi n na nyaa nyiɛlɛ ni yire na o yiɛ nyi. Yirɛ nyjɛ yi nyaa nyiɛlɛ ni yire, yira mu, la, nyjɛ yira nya nyiɛlɛ ni yiree wa blenyini.

will be added

X\