Korintoe Hlɛ Shiinwo 3

1Kena kre kee ŋga nyina na oyɛ o nyina e pan ree? Ndee ki fna mbe leele plɛ hlɛ nyunↄ, imi na plɛ pini kre, mbe paan o nyina e pan, mbe yire hlɛ nyunↄ mbe sɛ o nyina plɛ pan ree? 2Yire lɛ o hlɛ ŋga ki o nyina, a ee wa o lolonyi nu, a ndro kro we jaa o nya mbe ki chin. 3E tia leele chin na Kristo hlɛ ŋga u nyunↄ lɛ yire, kre hlɛ ŋga, inki ni ma pe ki nyunↄ, la, Nyiɛkpↄↄ ŋmba u le wre, u Ŋumu ni u ki nyunↄ. A dnɛ kpɛfrɛ kpɛfrɛ shiin na ma wra kee yire nyunↄ. La, leele lolonyi nu u yi nyunↄ. 4O shↄnlie ta Nyiɛkpↄↄ nu mu yire Kristo na, na yire kee nyjɛ yuu. 5Yaka n nyina na o fna mbe jaa kre tnumu ŋga tun. Jaŋga ŋga o ta mu ja na kre tnumu ŋga tuni ŋga yiri Nyiɛkpↄↄ pan. 6Wre u tia o ja mu yire nyu nunu fↄŋgↄ kre na, na sumi, ki n pe mbra nyjɛ pe nyunↄ mu tɛɛ yire kolo na yi, la, Kpra Ŋumu wre kolo na. Mbra yire pe nyunↄ mu tɛɛ yire paan kumu ni, la, Kpra Ŋumu wre, ŋmaa wre kaan. 7Ŋga Nyiɛkpↄↄ na mbra nyjɛ pra nyunↄ dnɛ na yire ŋga kre, u yɛnyiŋge na yili. Mbose yiɛ ŋga kraa chiɛnri mbe Israel leele pre wa jaa ki le kre, kraa laari nyjila ka nu. Na yire mbra nyjɛ yi paan kumu ni kre ja mu pan kre yɛnyiŋge ŋga sembremu ni kre, 8mni kie pe mbe Kpra Ŋumu wre kee ŋga ki paan ŋmaa ni kre wa yɛnyiŋge ta kpↄↄ hin? 9Na kee ŋga ki leele gbuun pimi ni kre yɛnyiŋge ta, mni kie pe mbe kee ŋga ki tii mbe lewo fraka kre wa yɛnyiŋge ta kpↄↄ mbe wɛ hin? 10Yɛnyiŋge jle kre n ja mu sna ŋgi na, yɛnyiŋge shiin wo kre pan mu wɛ ki na. 11Na ŋga kra pan mu nyjila chiɛri li kre na yɛnyiŋge ta kre, ŋgi kie ti mbe ŋga kie tni nyjila kro nu kre wa yɛnyiŋge ta kpↄↄ hin? 12Ŋga o kre dankna ŋga ta kre ndra na, ki tia o gbun ta. 13O n pe na Mbose wi, wre wra yoŋgo tɛɛ mna u yiɛ tↄ, mbe Israel leele pre wa jaa yiɛ kan u na mbe u yiɛ ŋga kraa chiɛnri, mbe ndruu laa kre le. 14Hali mu pan mu su aŋga na, Israel leele pre na nyu nunu lɛɛ kre kee tↄↄnri kre, pan ki nyi na yoŋgo kre nyinii ki pe jawala tↄ tɛ, a ki tia pe n na ki nↄↄ ndru. Na lewo n yire Kristo na, kre yoŋgo kre nyini wa jaa laa u jawala na, mbe u nↄↄloo ta. 15Hali aŋga, na pe Mbose hlɛ yire tↄↄnri kre, kre yoŋgo kre nyinii wa mu pe jawala tↄ tɛ. 16La, na lewo laa u sisam kro, mu pan o Tafun wre pan kre, kre yoŋgo kre we laa, mbe u nↄↄloo ta. 17O Tafun wre wi Kpra Ŋumu wre, a mna o Tafun wre Ŋumu nyi kre, yɛtaaraa wa wa. 18A wre mblɛ yiɛ na yoŋgo n wa kre, o Tafun wre yɛnyiŋge ndilee wa o yiɛ na. A ŋga u Ŋumu wree wa o nu kre na, u o chinɛi mbe o na yɛnyiŋge taa na wre wi nyjila kro nu.

will be added

X\