Korintoe Hlɛ Shiinwo 10

1Mi Pↄↄl ni yire Kristo nyjiimu, na u latam kre na, na paara na e nyina. E yuu na, na nii wa e nu ni fiɛ, la, na nii wa lee, mbe ndaa gbuntitrem kee pini. 2Ni e tali, na ni pan e nu, yaa shia ni pe mbe ti ni gbuntitrem kee ka pe. Mblɛ pe yuu na nyu o yuu kre, pre na ki fna mbe ni gbuntitrem kee pe. 3Ki pe kpra na oo wa waŋgra ŋga nu, la, kolo ŋga na waŋgrafɛɛnlɛ tro na ŋunↄ wii kre na ma wre tro na wii. 4Ŋunↄ wiyirɛ nyjɛ ni o wii yire n pe waŋgra ŋga ŋunↄ wiyirɛ, la, yi pe Nyiɛkpↄↄ jaŋga wiyirɛ nyjɛ ni o Sutna jaŋga klai. 5O kakra kee, na kee ŋga ki kiyɛ kpↄↄri na Nyiɛkpↄↄ kee kre toni, mbe pia u nya kre klai, na jawala kro yiri, mbe ki ndie tɛɛ Kristo pan. 6O oyɛ kna, na e waa ndie tɛɛ mu kↄ kre, mbe o pan mbe mblɛ ndie ki kan pre ndie tini. 7Imi na e yira nyaa to, pan e ki le fimi na. E eyɛ le, waa wa e nu mu chin na Kristo wo wi ra? Ufun u uyɛ jawa chichie, ŋgi na, Kristo wolo lɛ wre na, imi na ufun nyi kre chↄↄ. 8Na ni o Tafun jaŋga ŋga u o ŋga kre teeri na niyɛ kpↄↄri mu tro kuraa kre, ni n na nyifɛɛrɛ pini, ŋgi na, kre jaŋga kre ki faŋga leni e nu, ki n na e klai. 9Ni n na chaa mbe ki sɛ pe na piɛri ni e piɛri na ni hlɛ yire ni. 10Wa we yo na, "Na Pↄↄl hlɛ nyunↄ, kekpↄɛ piin ki nu titi, a na wre titii wa e jaara mbe wra fiɛ, wa jaa paara chiriri." 11Ŋmba u yuu ma kre u jawa u chin na, na oo wa lee, hlɛ nyjɛ o nyunↄi yire, na kee nyjɛ oo pe e jaara yiree nunu. 12O n oyɛ wru na gbuun na mblɛ pe peyɛ kaan mɛɛ kre ni. Pre leele pre jijiele lɛ, peyɛ ni pe kaan, na peyɛ wru na gbuun peyɛ ni. 13A wre rɛ, waa oyɛ kpↄↄ mbe wɛ imi ki fna na. Tnumu ŋga Nyiɛkpↄↄ le o kɛɛ, a o ki tun e nu na kre, kre nu oo oyɛ kpↄↄ. 14Ŋga wre o na klu mu da na Kristo ketaan kre ni e na a ki pe tnumu ŋga Nyiɛkpↄↄ na o ŋga na o pe kre ka, a o nsra tun mu wɛ imi ki fna o pe na. 15Kena tnumu nyjɛ plɛ pan mu tun e nu kre, o n na oyɛ kpↄↄri na yi ni. La, o kaan na e shↄnlie we na kpↄↄri, mbe ki ti o jaa tnumu kpↄↄ tun e nu mbe sɛ su mna Nyiɛkpↄↄ o ŋga na o sɛ su. 16Kena na ki pan ma, oo jaa ketaan kre kpali lawee fↄnyi nu na, mbe waa sɛ wa tnumu ŋga u tun tra ka nu tɛɛ mbe oyɛ kpↄↄ. 17La, imi na pe ki nyunↄ mu tɛɛ Nyiɛkpↄↄ hlɛ kre nu kre mbo, "Ŋmba u chaa mbe uyɛ kpↄↄ kre, u uyɛ kpↄↄ kee ŋga o Tafun pe nu." 18Ŋgi na, lewo ŋmba u uyɛ kaan mɛɛ kre ma Nyiɛkpↄↄ pni, la, ŋmba o Tafun wre kaan mɛɛ wre Nyiɛkpↄↄ pni.

will be added

X\