Korintoe Hlɛ Shiinwo 1

1Mi Pↄↄl ŋmba Nyiɛkpↄↄ na yire wre titi chaara na, mna ni yeeri, na ni paan pe Yesu Kristo bituŋu wre, na o ŋmbrↄ Timotio pan hlɛ ŋga yiri, na shie Nyiɛkpↄↄ sumifɛɛnlɛ mblɛ pee wa Korinto na kre, na Kristo leele mblɛ pe nyina Achia tra nu kre kro pan. 2O Lɛ Nyiɛkpↄↄ, na o Tafun Yesu Kristo pe e dumi, mbe e ŋga wejinyiŋge. 3E ti mbe o Nyiɛkpↄↄ, o Tafun Yesu Kristo Lɛ wre ŋga mboo, foorochinfun wi, a Nyiɛkpↄↄ ŋmba u gbunnyiŋge kaan wi. 4Wre u o kaan gbunnyiŋge o kanyana nyjila, imi kie pe mbe o ja mbe yire gbunnyiŋge ŋga u o kaan kre na, mbe jaa mblɛ pe kanyana nyininyini nyaa kre gbunnyiŋge na. 5Imi na o Kristo kanyana kre ka nyaa kre, pan chↄↄ kie yire Kristo wre na mbe o gbunnyiŋge ta. 6E gbunnyiŋge, na e ŋmaashↄmu na o yila na kala nyaa, a na o gbunnyiŋge ta, kie ti mbe e gbunnyiŋge ta, mbe e jaa eyɛ yii, mbe frↄ ta, na e waa na o kanyana nyjɛ yɛ nyaa. 7O dankna kpↄↄ e na ŋgi na, O chin na ŋga e o kanyana yire yɛ nyaa ŋga, pan chↄↄ ee o gbunnyiŋge kre ka ta na. 8Ni wolo, o chaa mbe e sↄↄnri kanyana nyjɛ o na nya Asia tra nu kre. Kanyana yire na kpↄↄ mu wɛ o na, kra tia o dankna na kↄ, o nsra chin na oo ŋmaa ta. 9Kpra na, o naa jawa na o ku kuraa mu kↄ. La, Kre kee ŋga na pe, mbe ki ti mbe waa oyɛ taa oyɛ na, la, mbe o ndra taa Nyiɛkpↄↄ ŋmba u kuulo nyini wre chiin na. 10Yire wejiwrɛ nyjɛ krɛrɛ nu kre, wra o shↄ, a we ndru mbe o shↄ na. Wre na o kaan, mbe wra o shio. 11Ŋga e yaa o na na nyiɛtalaa ni ŋga, kie ti mbe e mblɛ e chin na Nyiɛkpↄↄ e nyiɛtalaa loo, mu o shↄ kre, mbe e Nyiɛkpↄↄ ŋga mboo tataara. 12Kee ŋga ni o oyɛ kpↄↄri yi kre, o jawala kee tia o chin na, o tnimu nu waŋgra ŋga nu, na imi na wre na yire tni kre, ki pe cheche, mu pe kpra ni, a Nyiɛkpↄↄ pan ki yiri. Nyiɛkpↄↄ dumiɛ jaŋga na yi, ki n pe waŋgra kachindɛ na yi. 13Kee nyjɛ ee jaa tↄↄnri, mbe yi nↄↄloo kre, yire o nyunↄ mu pan mu e ŋga. A ni kaan na ee o nↄↄloo chↄ. 14Ŋga e ta mu o nↄↄloo chiɛri ŋga, ee kↄↄ o nↄↄloo kpↄↄ na o Tafun Yesu Kristo ble kre waa da, mbe e jaa o tɛɛ mbe eyɛ kpↄↄ, imi na oo e tɛɛ mbe oyɛ kpↄↄ kre. 15Ŋga ni shↄ mu li na yire kee nyjɛ we pe kre ndra na, kre na ni yila mu ni jawala pe na mbe klu mbe tro e pan wa tun, imi kie pe mbe e ni dwamu ta gbee shiin. 16Ŋgi na, ni chaa na ni shie Makedonia na, mbe ni tro e pan wa, a na ndaa ndru na paan, mbe ni tro e pan wa na, mbe e ya ni na mbe ni sɛ Judea na. 17Ŋga ndaa kre jawala ŋga ta kre, ki nyina na ni jawala piin shiin shiin kee na ree? Ndee ki nyina na ni ni jawala piin na waŋgra ndro wi, na ni yo ɛnhɛɛn kee ka na, mbe ni ndru mbe yo ↄↄnhↄn titɛɛ kre nu ree? 18Ŋga Nyiɛkpↄↄ pe kprafun kre na, nyu ŋga ni yo e pan kre n pe kee ŋga ki chinɛ. 19Yesu Kristo, Nyiɛkpↄↄ pↄ wre, ŋmba kee mi na Silas na Timotio kpali e pan kre, u n pe ndro ŋmba u chinɛ, la, u kee kro pe kpra. 20Nyiɛkpↄↄ kee nyjɛ u yo mu tɛɛ yire kro, yi yire Kristo na mu pe kpra. Kre ki tia o na yire u na, na "Amin" yuu, mbe ki ti Nyiɛkpↄↄ yɛnyiŋge ta. 21Nyiɛkpↄↄ u tia o kro yire Kristo na mu yire gbiŋmbi. A wre u o wↄ, 22mu o tnↄ na u wolo lɛ wre, a wre u tia Kpra Ŋumu wre tni o lolonyi nu, mbe ki ti o chin na nyjɛ u yo we o ŋga yire kro, oo yi ta. 23Nyiɛkpↄↄ wi ni dansiɛfun na kpra ni yuu, ni nsraa chaa mbe e yiɛ je, kre ki tia ni nsra pan e pan Korinto na wa. 24O n na chaa mbe jaŋga wru e na e shↄnlie haa, ŋgi na? E shↄ mu li, mu yire gbiŋmbi, la, e yɛshↄↄrↄ ŋga ee ta na o yila, a wre na yire na tnumu tuni.

will be added

X\