1 Tinlɛ pe pe tafɛɛnlɛ ŋga buuro ŋga ki fna, mbe ndro wa Nyiɛkpↄↄ, ndee kee ŋga o e nyina kre kee sisaa ka ta mbe yo. 2 Tinlɛ mblɛ tafɛɛnlɛ pe pe Kristo sumifɛɛnlɛ kre waa shia pe tafɛɛnlɛ yiɛ le, ŋgi na, pe ŋmbilɛ Kristo sumifɛɛnlɛ lɛ. Ki fna mbe pe pe sumi kpↄↄ, ŋgi na, mblɛ pe e tnu taa kre pe shↄnlifɛɛnlɛ na mblɛ e kori. Kena yire kee nyjɛ ki fna mna nyina mbra yi kpali. 3 Ŋmba we kee fↄŋgↄ ka nyina, a u n li O Tafun Yesu Kristo kpra kee yire na, ndee mu li o sumiɛ ŋga kee o nyina ŋga na kre, 4 kena uyɛ u kpↄↄri finfin, u fun n yaka chin. U fun wre jawala n wa, kakra lie, na krↄ ni u paan, a yire kee nyjɛ krɛrɛ kɛyira, na kakrↄ, na tɛɛlɛɛ, na jawala sisaa, 5 pre leele mblɛ kakra sisaa ni pe paan, nyjila kro nu pe jawala n na tnumu tuni, a pe n kpra kre kee chin, pe jawa na, Nyiɛkpↄↄ kolo pe swa chaara kolo. 6 Nyiɛkpↄↄ sumiɛ ŋga ki fraka tii mbe lewo yira kro ta, na ŋga mu ta chiɛri kre mu yiɛ nyi wala. 7 O nsra pan na yaka ni waŋgra ŋga nu, a waa jaa yaka wru tra ŋga nu mbe sɛ. 8 Kena na o o nyu sro na o yonyi ta kre, mbe o ti yire o yiɛ nyi. 9 La, mblɛ pe chaa mbe pe swafɛɛnlɛ kre, pe tuuri penlee nu, na tuuri jijiere na niŋge sisaa pɛɛlɛɛ nyjɛ yi n nyu mu lewo ŋga nu. Yire yi lewo tinii na shie klamu nu. 10 Ŋgi na, swa chaara yi sisam kro kolo. Plɛ yila ki chaara sisaa na mu laa Nyiɛkpↄↄ kro, mu tia fooro pe yii kpↄↄ. 11 La, ŋu rɛ, Nyiɛkpↄↄ ndro wi ŋu, kena laa yire kee nyjɛ krɛrɛ kro, mu fraka, mu Nyiɛkpↄↄ sumiɛ, na shↄnlie, na koroo, na frↄ, na nyjiimu yii kɛshiin. 12 Shↄnlie wiire wi, mu blenyini ŋmaa kre yii kɛshiin, kre na Nyiɛkpↄↄ na yila mu mu yeeri, nyjila ŋga ni mna yire dansiɛfɛɛnlɛ tataara yiɛ na, mna nyu nyaa mu yo na mu Kristo shↄ mu li 13 Ni yire Nyiɛkpↄↄ ŋmba u yirɛ kro kaan ŋmaa, na Yesu Kristo ŋmba wra yire Pontio Pilato yiɛ na mna kpra yo wre yiɛ, na yuu mu pan na, 14 li ni kee nyjɛ ni yo mu pan nyjɛ kro na, maa shia ti mbe ndro mu kee sisaa ka ta mbe yo, mbe sɛ su na O Tafun Yesu Kristo wre we ndruu pan. 15 U paan kre we pe Nyiɛkpↄↄ wre titi nyjila ŋga u chaa nu. Nyiɛkpↄↄ wre, wre u dwamu kaan, wre wi jaŋga kro Nyiɛkpↄↄ, wre wi Ŋulo kro Ŋunu, tafɛɛnlɛ kro Tafun wi. 16 Wre chiin uu ŋmaa ni, a wa ku, wre uu wa kania nu, a ndro wa jaa da u na. Ndro n da mu u nya tun, a wa wa daa u nya na nyini ni. Wre wo yi yɛnyiŋge na blenyini jaŋga! Amin. 17 Leele mblɛ pee swa ni waŋgra ŋga nu kre, yo pe pan na pia na peyɛ kpↄↄri, ndee mbe peyɛ wru mbe taa yiɛ waara nyjɛ na, la, pe peyɛ wru pe taa Nyiɛkpↄↄ na, wre u o kaan yirɛ nyjɛ yi o shian, o na oyɛ lii. 18 Yo pe pan mbe pra chichie pini, pe ti mbe pe kepele nyu, mbe pra yirɛ kaan na lɛɛ nunu ni. 19 Na pe pe ma kre, kena pe lawee chichie chaa na teeri peyɛ pan nyjeeri. A pe tnimu we nyu mbe pe ŋga tra mna. 20 Timotio, kee ŋga pe le mu kɛɛ kre le chichie, muyɛ wↄ paaraa nyjɛ yi n fna, na jijiere kakra nyjɛ plɛ yeeri "Kachindɛ" kre nu. 21 Ŋgi na, leele plɛ yuu na pee kre "Kachindɛ" kre ni, a ki tia pe fun Nyiɛkpↄↄ kolo na. Yire na Nyiɛkpↄↄ dumiɛ e tni.
